បន្ទាយមានជ័យ ៖ សាខាកាំកុងត្រូលខេត្តបន្ទាយមានជ័យ បានដុតបំផ្លាញចោលទំនិញខូចគុណភាពចម្រុះចំនួន១០៣៣គីឡូក្រាម នៅព្រឹកថ្ងៃទី២២ ខែសីហា ឆ្នាំ២០១៨ នៅក្នុងសង្កាត់ ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។
ពិធីនេះ មានការអញ្ជើញចូលរួមពីលោកលី សារី អភិបាលរងខេត្តបន្ទាយមានជ័យ លោកស៊ុំ ណារុន អគ្គនាយករងនៃអគ្គនាយកដ្ឋានកាំកុងត្រូល មន្ត្រីគយ នគរបាល មន្ត្រីសាលាក្រុងប៉ោយប៉ែតចូលរួមផងដែរ។
លោក សាន វិជ្ជាសារ៉ាវុធ ប្រធានសាខាកាំកុងត្រូលខេត្តបន្ទាយមានជ័យ បានឲ្យដឹងថា ទំនិញខូចគុណភាពចម្រុះចំនួន១០៣៣គីឡូក្រាមទាំងនេះ គឺយើងធ្វើការដកហូតបាននៅតាមសាលារៀន តាមផ្សារនានានៅក្នុងខេត្តបន្ទាយមានជ័យអំឡុងខែ៧ដើមឆ្នាំ២០១៨ ក្រោមកិច្ចសហការរបស់មន្ត្រី សាខាកាំកុងត្រូល ជាមួយកម្លាំងនគរបាលប្រឆាំងបទល្មើសសេដ្ឋកិច្ច និងមន្ទីរពាណិជ្ជកម្មខេត្ត ដោយធ្វើការត្រួតពិនិត្យឆែកឆេរ និង រកឃើញទៅលើអាជីវករលក់ដូរនៅផ្សារ និងនៅតាមផ្ទះ ហើយបានធ្វើការអប់រំនិងប្រមូលយកមករក្សាទុក និងបានយកដុតកម្ទេចនៅពេលនេះ។
ផលិតផលម្ហូបអាហារខូចគុណភាពទាំងនេះ មិនមានគុណភាព អនាម័យ និងសុវត្ថិភាពសម្រាប់មនុស្សយកទៅបរិភោគបានឡើយ និង គ្មានអនុលោមភាពតាមច្បាប់ស្តីពីការគ្រប់គ្រងគុណភាព សុវត្ថិភាពលើផលិតផលទំនិញ និង សេវា ទើបសមត្ថកិច្ចកាំកុងត្រូលយកផលិតផលម្ហូបអាហារខូចគុណភាពទាំងនេះ ទៅដុតកម្ទេចចោល។
លោក លី សារី អភិបាលរងខេត្តបន្ទាយមានជ័យបានថ្លែងអំណរគុណដល់សមត្ថកិច្ច ដែលនាំគ្នាយកចិត្តទុកដាក់ ចំពោះសុវត្ថិភាពសុខភាពម្ហូបអាហារប្រជាពលរដ្ឋនៅក្នុងខេត្តក៏ដូចប្រជាពលរដ្ឋនៅក្នុងប្រទេសផងដែរ។
លោក លី សារី បានផ្តាំផ្ញើដល់មន្ត្រីកាំកុងត្រូលនិងសមត្ថកិច្ចជំនាញទាំងអស់ជួយសហការគ្នាឲ្យបានល្អ ដើម្បីប្រជាពលរដ្ឋទាំងអស់គ្នា។ លោក ស៊ុំ ណារុន អគ្គនាយករងនៃអគ្គនាយកដ្ឋានកាំកុងត្រូល បានឲ្យមន្ត្រីជំនាញបន្តចុះត្រួតពិនិត្យទំនិញទីផ្សារយ៉ាងហោចណាស់១ត្រីមាសបាន២ដង ដើម្បីបង្ការទប់ស្កាត់ទំនិញមានហានិភ័យបង្កប៉ះពាល់សុខភាពប្រជាពលរដ្ឋនោះ។
សូមបញ្ជាក់ថា ការចុះត្រួតពិនិត្យគុណភាពសុវត្ថិភាពផលិតផលម្ហូបអាហារនៅលើទីផ្សារក្នុងខេត្តមន្ត្រីជំនាញក៏បានធ្វើតេស្តរកសារធាតុគីមីបូរ៉ាក់ទៅលើសរសៃគុយទាវ និង ចាហួយខ្មៅ ដែលផ្ទុកសារធាតុគីមីបូរ៉ាក់ជាប្រចាំផងដែរតែមិនសូវមានទេ៕
Source: Kampuchea Thmey Daily
0 Comments