ភ្នំពេញ ៖ លោកសាស្ដ្រាចារ្យ ម៉ម ប៊ុនហេង រដ្ឋមន្ដ្រីក្រសួងសុខាភិបាល បានអំពាវនាវដល់ប្រជាពលរដ្ឋកុមារ និងទារក និងស្ដ្រីមានផ្ទៃពោះ មកចាក់ថ្នាំបង្ការ ឲ្យបានគ្រប់ចំនួនកំណត់នៅតាមមណ្ឌលសុខភាពដោយឥតគិតថ្លៃដើម្បីបញ្ជៀសការឆ្លងជំងឺផ្សេងៗ ដែលអាចការពារបានដោយវ៉ាក់សាំង។
ក្នុងឱកាសចុះសួរសុខទុក្ខ និងពិនិត្យព្យាលប្រជាពលរដ្ឋដោយឥតគិតថ្លៃ ដល់ប្រជាពលរដ្ឋរងគ្រោះដោយទឹកជំនន់ចំនួន៣០០គ្រួសារ នៅទួលមានសុវត្ថិភាពឧញ៉ាឌី ភូមិទន្លេបិទលើ ឃុំទន្លេបិទ ស្រុកត្បូងឃ្មុំ ខេត្ដត្បូងឃ្មុំ កាលពីថ្ងៃទី២១ ខែសីហា ឆ្នាំ២០១៨ លោករដ្ឋមន្ដ្រីក្រសួងសុខាភិបាល ក៏បានផ្ដល់នូវថ្នាំបង្ការ គ្រប់មុខ មានកញ្ជ្រិល ស្អូច តេតាណុស និងវីតាមីនអា ដល់កុមារក្រោមអាយុ៥ឆ្នាំ ប្រហែល១៣០នាក់ផងដែរ។
ពាក់ព័ន្ធនឹងទឹកជំនន់លោករដ្ឋមន្ត្រីបានអំពាវនាវដល់ប្រជាពលរដ្ឋ ដែលរងគ្រោះដោយទឹកជំនន់ ត្រូវបន្ដការប្រុងប្រយ័ត្នជានិច្ចចំពោះសុខភាព និងសុវត្ថិភាព ខណៈដែលអត្រាឈឺ និងស្លាប់ដោយសារលង់ទឹក និងសត្វពស់ចឹកកាន់តែមានចំនួនច្រើនឡើង។
ជាមួយគ្នានោះលោកសាស្ត្រាចារ្យម៉ម ប៊ុនហេង បានជំរុញឲ្យបងប្អូនប្រជាពលរដ្ឋដែលត្រូវពស់ចឹក សូមប្រញាប់ទៅកាន់មន្ទីរពេទ្យ ឬមណ្ឌលសុខភាព ដែលនៅជិតលោកអ្នកបំផុត កុំបន្ដទុកចោល ឬយកទៅព្យាបាលតាមរយៈរូបភាពផ្សេងឲ្យសោះ។
តាមរបាយការណ៍របស់អភិបាលខេត្ដកំពង់ចាម និងត្បូងឃ្មុំ បានឲ្យដឹងថា ក្នុងអំឡុងរងគ្រោះដោយទឹកជំនន់មានប្រជាជនលង់ទឹកស្លាប់ និងបានរងគ្រោះដោយសារពស់ចឹកប្រមាណ៦០នាក់ក្នុងនោះលង់ទឹកស្លាប់នៅខេត្ដកំពង់ចាមប្រមាណ១៤នាក់ និងរងគ្រោះដោយពស់ចឹក ជិត៥០នាក់រួមទាំងខេត្ដត្បូងឃ្មុំផង។
ទន្ទឹមនឹងនេះ លោករដ្ឋមន្ត្រីបានណែនាំឲ្យបងប្អូនប្រជាពលរដ្ឋ ដែលរងគ្រោះដោយទឹកជំនន់ ត្រូវបន្ដប្រុងប្រយ័ត្នខ្ពស់ចំពោះសុខភាព ដោយត្រូវសម្អាតលំនៅឋាន ឬទីទួលមានសុវត្ថិភាពដែលខ្លួនរស់នៅ កុំឲ្យមានជម្រកសព្វពស់ និងសត្វអាសិរពិសផ្សេងទៀត រួមទាំងជម្រកមូសខ្លាផងដែរ ដើម្បីការពារជំងឺគ្រុនឈាម និងជំងឺឆ្លង។
គួរបញ្ជាក់ថា ដោយយកចិត្ដទុកដាក់ខ្ពស់ ពីសម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកកម្ពុជា សម្ដេចបានអញ្ជើញចុះសំណេះសំណាលសួរសុខទុក្ខ និងនាំយកនូវអំណោយសង្គ្រោះប្រជាពលរដ្ឋជាបន្ទាន់ ចំនួន២លើកដោយផ្ទាល់ រួចមកហើយ។
ដោយឡែកលោកសាស្ត្រាចារ្យម៉ម ប៊ុនហេងរដ្ឋមន្ត្រីក្រសួងសុខាភិបាល ក៏បានចាត់មន្ដ្រីជំនាញមកប្រចាំការដាក់ប៉ុស្ដិ៍សុខភាពជាបណ្ដោះអាសន្ន នៅតាមទីទួលមានសុខវត្ថិភាព តាមបណ្ដាស្រុកដែលជនលិចដោយទឹកជំនន់ ដើម្បីផ្ដល់សេវាសុខភាពមួយនេះជូនប្រជាពលរដ្ឋដោយចាប់តាំងពីថ្ងៃទី២៩ ខែកក្កដារហូតមកដល់ថ្ងៃទី២១សីហាឆ្នាំ២០១៨មានប្រជាពលរដ្ឋជិត៥,០០០នាក់ ដែលទទួលបានការពិនិត្យព្យាបាលសុខភាព ដោយឥតគិតថ្លៃ ពីក្រសួងសុខាភិបាល៕
Source: Kampuchea Thmey Daily
0 Comments