ភ្នំពេញ ៖ ស្ត្រី២នាក់ ត្រូវបានកម្លាំងនគរបាលប៉ុស្តិ៍ស្រះចកឃាត់ខ្លួនពីបទជួញដូរគ្រឿងញៀនព្រមទាំងដកហូតថ្នាំជាង៧០កញ្ចប់ កាលពីព្រឹក ថ្ងៃទី០៣ ខែសីហា ឆ្នាំ២០១៨ នៅចំណុចភូមិ០៣ ផ្លូវរថភ្លើង ក្នុងសង្កាត់ស្រះចក ខណ្ឌដូនពេញ។
សមត្ថកិច្ចប៉ុស្ដិ៍ស្រះចកបានឲ្យដឹងថា ការចុះបង្ក្រាបករណីជួញដូរ និង ប្រើប្រាស់គ្រឿងញៀននៅក្នុងផ្លូវរថភ្លើងនោះ បានឃាត់ខ្លួននារីពីរនាក់នោះ ទី១ឈ្មោះប្លុយ ស្រីអូន អាយុ៣៥ឆ្នាំ មានកូន២នាក់ ស្នាក់នៅផ្ទះជួលក្នុងផ្លូវភូមិ៣ សង្កាត់ស្រះចក ខណ្ឌដូនពេញ ទី២ឈ្មោះវី ចាន់ធី អាយុ២៣ឆ្នាំ មានកូន២នាក់ស្នាក់នៅផ្ទះជួលក្នុងផ្លូវរថភ្លើង ភូមិ៣ សង្កាត់ស្រះចកខណ្ឌដូនពេញ។
សមត្ថកិច្ចបានឲ្យដឹងទៀតថា ការឃាត់ខ្លួនជនសង្ស័យ២នាក់នោះ ត្រូវបានដកហូតវត្ថុតាងថ្នាំញៀនចំនួន៧៥កញ្ចប់ ដែល៥កញ្ចប់តូចដកហូតពីឈ្មោះវី ចាន់ធី និង៧០កញ្ចប់តូចទៀតដកហូតពីឈ្មោះខ្លុយ ស្រីអូន។
សមត្ថកិច្ចបានឲ្យដឹងទៀតថា មុនពេលឈានដល់ការឃាត់ខ្លួនជនសង្ស័យទាំង២នាក់នោះ គឺកម្លាំងប៉ុស្តិ៍បានចេញទទួលព័ត៌មានសម្ងាត់ថា មានស្ត្រី២នាក់កំពុងតែសង្ងំជួញដូរគ្រឿងញៀននៅចំណុចភូមិ០៣ជាតំបន់ស្មុគស្មាញនោះ ទើបកម្លាំងបានចុះទៅច្បាមឈានដល់ការបង្ក្រាបជាក់ស្តែងដោយឃាត់ស្ត្រី២នាក់ ព្រមទាំងដកហូតថ្នាំញៀន៧៥កញ្ចប់ នាំមកសួរនាំ និង កសាងសំណុំរឿងបញ្ជូនទៅតុលាការ៕
Source: Kampuchea Thmey Daily
0 Comments