រដ្ឋមន្ត្រីការបរទេសកម្ពុជា ចូលរួមកិច្ចប្រជុំរដ្ឋមន្ត្រីការបរទេសអាស៊ាន និងកិច្ចប្រជុំពាក់ព័ន្ធ រយៈពេល៦ថ្ងៃ នៅសិង្ហបុរី

ភ្នំពេញ ៖ លោកទេសរដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិកម្ពុជា បានដឹកនាំគណៈប្រតិភូអញ្ជើញទៅចូលរួមកិច្ចប្រជុំរដ្ឋមន្ត្រីការបរទេសអាស៊ាន និងកិច្ចប្រជុំពាក់ព័ន្ធ នៅសាធារណរដ្ឋសិង្ហបុរី កាលពីព្រឹកថ្ងៃអង្គារ ទី៣១ ខែកក្កដា ឆ្នាំ២០១៨ តាមការអញ្ជើញរបស់លោក វីវៀន បាឡាគ្រីស្សណាន (Vivian Balakrishnan) រដ្ឋមន្ត្រីការបរទេសនៃសាធារណរដ្ឋសិង្ហបុរី ដែលកិច្ចប្រជុំនេះ ប្រព្រឹត្តទៅពីថ្ងៃទី៣០ ខែកក្កដា ដល់ថ្ងៃទី០៤ ខែសីហា ឆ្នាំ២០១៨។

កិច្ចប្រជុំទាំងនោះរួមមាន កិច្ចប្រជុំគណៈកម្មការតំបន់អាស៊ីអាគ្នេយ៍គ្មានអាវុធនុយក្លេអ៊ែរ, ជំនួបរវាងរដ្ឋមន្ត្រីការបរទេសអាស៊ានជាមួយតំណាងគណៈកម្មការអន្តររដ្ឋាភិបាលអាស៊ាន ស្តីពីសិទ្ធិមនុស្ស, កិច្ចប្រជុំរដ្ឋមន្ត្រីការបរទេសអាស៊ានលើកទី៥១, សន្និសីទក្រោយកិច្ចប្រជុំរដ្ឋមន្ត្រីការបរទេស, កិច្ចប្រជុំរដ្ឋមន្ត្រីការបរទេសអាស៊ានបូកបីលើកទី១៩, កិច្ចប្រជុំរដ្ឋមន្ត្រីការបរទេសនៃកិច្ចប្រជុំកំពូលអាស៊ី-បូព៌ាលើកទី៨ និងវេទិកាតំបន់អាស៊ានលើកទី២៥។

តាមក្រសួងការបរទេសបានបញ្ជាក់ថា កិច្ចប្រជុំរដ្ឋមន្ត្រីការបរទេសអាស៊ានលើកទី៥១ និងកិច្ចប្រជុំពាក់ព័ន្ធ នឹងប្រព្រឹត្តទៅក្រោមប្រធានបទ “ភាពរឹងមាំ និងនវានុវត្តន៍របស់អាស៊ាន” នឹងឆ្លុះបញ្ចាំងអំពីការតាំងចិត្តដ៏មុះមុតរបស់អាស៊ាន ក្នុងការពន្លឿនដំណើរការកសាងសហគមន៍អាស៊ាន និងបន្តស្ថិតនៅជាអង្គការតំបន់គួរឲ្យទុកចិត្តនៅក្នុងការថែរក្សា និងលើកស្ទួយសន្តិភាព ស្ថេរភាព និងវិបុលភាព។

តាមការឲ្យដឹងពីលោកទេសរដ្ឋមន្ត្រី ប្រាក់ សុខុន បញ្ជាក់ថា នៅឯកិច្ចប្រជុំនោះ លោកបានជួបពិភាក្សាការងារជាមួយថ្នាក់ដឹកនាំ និងរដ្ឋមន្ត្រីការបរទេស នៃបណ្តាប្រទេសជាមិត្តមួយចំនួនផងដែរ ដូចជា លោក Dionisio Soares Babo រដ្ឋមន្ដ្រីការបរទេសនៃសាធារណរដ្ឋប្រជាធិបតេយ្យទីម័រខាងកើត ដោយបានពិភាក្សាទំនាក់ទំនងទ្វេភាគី, ជួបពិភាក្សាទ្វេភាគីជាមួយលោកជំទាវ Ine Marie Eriksen Søreide រដ្ឋមន្ដ្រីការបរទេសន័រវេស, ជួបពិភាក្សាការងារលោកជំទាវ Kang Kyung-wha រដ្ឋមន្ដ្រីការបរទេសនៃសាធារណរដ្ឋកូរ៉េ ដោយបានពិភាក្សាអំពីទំនាក់ទំនងទ្វេភាគីរវាងប្រទេសទាំងពីរ លើបញ្ហាតំបន់ និងអន្តរជាតិ, ជួបពិភាក្សាការងារជាមួយលោកជំទាវ Retno Marsudi រដ្ឋមន្ដ្រីការបរទេសនៃសាធារណរដ្ឋឥណ្ឌូណេស៊ី, ជំនួបរវាងរដ្ឋមន្ត្រីការបរទេសអាស៊ាន ជាមួយតំណាងគណៈកម្មការអន្តររដ្ឋាភិបាលអាស៊ាន ស្តីពីសិទ្ធិមនុស្ស, ជួបពិភាក្សាការងារទ្វេភាគីជាមួយលោក Wang Yi ទីប្រឹក្សារដ្ឋ និងជារដ្ឋមន្ដ្រីការបរទេសនៃសាធារណរដ្ឋប្រជាមានិតចិន ដោយបានពិភាក្សាអំពីទំនាក់ទំនងទ្វេភាគីរវាងប្រទេសទាំងពីរ និងបញ្ហាតំបន់ និងអន្តរជាតិ, ចូលជួបសម្ដែងការគួរសមជាមួយឯកឧត្ដម Lee Hsien Loong នាយករដ្ឋមន្ដ្រីនៃសាធារណរដ្ឋសិង្ហបុរី, ជួបពិភាក្សាការងារទ្វេភាគីជាមួយឯកឧត្ដម Pham Binh Minh ឧបនាយករដ្ឋមន្ដ្រី រដ្ឋមន្ដ្រីការបរទេសវៀតណាម, ជួបពិភាក្សាការងារជាថ្មីម្តងទៀត ជាមួយលោក Sergey Lavrov រដ្ឋមន្ដ្រីការបរទេស នៃសហព័ន្ធរុស្ស៊ី និងបានពិភាក្សាអំពីបញ្ហាដែលមានការព្រួយបារម្ភរួមគ្នាទ្វេភាគី និងតំបន់, ជួបពិភាក្សាការងារជាមួយលោក Saifuddin Abdullah រដ្ឋមន្ដ្រីការបរទេសម៉ាឡេស៊ី, ចូលរួមកិច្ចប្រជុំរដ្ឋមន្ដ្រីអាស៊ាន ជាមួយរដ្ឋមន្ត្រីការបរទេសជប៉ុន (ឯកឧត្តម Taro KONO) និងចូលរួមកិច្ចប្រជុំរដ្ឋមន្ដ្រីអាស៊ាន ជាមួយរដ្ឋមន្ត្រីការបរទេសនូវែលសេឡង់ លោក Winston Peters ជាដើម។

គួរកត់សម្គាល់ថា ក្នុងនាមជាប្រទេសសម្របសម្រួលសម្រាប់ទំនាក់ទំនងដៃគូសន្ទនាអាស៊ាន-សាធារណរដ្ឋកូរ៉េ លោកទេសរដ្ឋមន្ត្រី ប្រាក់ សុខុន នឹងធ្វើជាសហប្រធានកិច្ចប្រជុំ “សន្និសីទក្រោយកិច្ចប្រជុំរដ្ឋមន្ត្រីការបរទេស បូកសាធារណរដ្ឋកូរ៉េ” ជាមួយលោកជំទាវ កាង ឃ្យុងវ៉ា (Kang Kyung-wha) រដ្ឋមន្ត្រីការបរទេសនៃសាធារណរដ្ឋកូរ៉េ៕