ភ្នំពេញ ៖ អគ្គលេខាធិការអាជ្ញាធរជាតិប្រយុទ្ធនឹងជំងឺអេដស៍បានឲ្យដឹងថា ក្រុមស្រីស្រស់ត្រូវបានកំណត់ថា ជាក្រុមប្រឈមមុខខ្ពស់នឹងការឆ្លងមេរោគអេដស៍នៅប្រទេសកម្ពុជាដោយសារក្រុមនេះ ត្រូវបានគេរកឃើញថា មានការប្រើប្រាស់ស្រោមអនាម័យនៅមានកម្រិតទាប និងមានជំងឺកាមរោគកម្រិតខ្ពស់។
លោកវេជ្ជបណ្ឌិតតែង គន្ធី អគ្គលេខាធិការអាជ្ញាធរជាតិប្រយុទ្ធនឹងជំងឺអេដស៍បានមានប្រសាសន៍ថា ក្រុមស្រីស្រស់ ( Transgender ) គឺសំដៅទៅលើបុរសដែលកំណត់ខ្លួនឯងថាភេទស្រីហើយបានស្លៀកពាក់ជាស្រី មានឥរិយាបថ និងចរិតលក្ខណៈជាស្ត្រី។
លោកវេជ្ជបណ្ឌិតបានបន្តថា តាមការសិក្សាបានប៉ាន់ប្រមាណថានៅកម្ពុជាមាន ក្រុមស្រីស្រស់ប្រមាណ ៣១៩៩ នាក់ នៅទូទាំងប្រទេស ហើយជាទូទៅអត្រាផ្ទុកមេរោគអេដស៍ក្នុងចំណោមក្រុមស្រីស្រស់នេះ គឺមានចំនួន៥.៩ភាគរយនិងមានអត្រាខ្ពស់ជាងនេះនៅខេត្តសៀមរាប ឧត្តរមានជ័យ និង នៅភ្នំពេញ។
លោកវេជ្ជបណ្ឌិតបានបន្តថា ការដែលក្រុមស្រីស្រស់មានការប្រឈមខ្ពស់នឹងជំងឺអេដស៍ដោយសារតែអត្រាការប្រើប្រាស់ស្រោមអនាម័យនៅមានកម្រិតទាប និងមានជំងឺកាមរោគកម្រិតខ្ពស់។
ចំពោះមុខស្ថានភាពដ៏គ្រោះថ្នាក់នេះ លោកវេជ្ជបណ្ឌិតតែង គន្ធី បានស្នើឲ្យប្អូនៗ ក្មួយៗដែលជាក្រុមស្រីស្រស់ត្រូវចេះការពារខ្លួនកុំឲ្យឆ្លងមេរោគអេដស៍ និងរួសរាន់ទៅធ្វើតេស្តឈាមរកមេរោគអេដស៍ និង ទទួលឱសថប្រឆាំងមេរោគអេដស៍ដោយឥតគិតថ្លៃ។
ក្រៅពីនេះក្រុមបុរសរួមភេទនឹងបុរសនៅតែជាកង្វល់ដែលត្រូវបន្តយកចិត្តទុកដាក់ឲ្យបានខ្លាំងក្លាបន្ថែមទៀត ព្រោះក្រុមនេះក៏មានការប្រឈមនឹងការឆ្លងមេរោគអេដស៍ខ្ពស់ផងដែរ។
តាមរបាយការណ៍របស់ក្រុមការងារបច្ចេកទេសថ្នាក់ជាតិប្រយុទ្ធនឹងជំងឺអេដស៍បានឲ្យដឹងថា ក្នុងចំណោមក្រុមបុរសរួមភេទជាមួយបុរស និងក្រុមស្រីស្រស់នេះ ត្រូវបានគេរកឃើញថា មានផ្ទុកមេរោគអេដស៍បន្ថែមទៀត ដែលភាគច្រើនឋិតក្នុងចំណោមយុវវ័យ ហើយពួកគេទាំងនោះទើបនឹងបង្ហាញខ្លួននិងអ្នកខ្លះទៀតទើបនឹងឆ្លងថ្មី។
លោកវេជ្ជបណ្ឌិតបានឲ្យដឹងទៀតថា ផ្អែកលើស្ថានភាពនេះ សូមអំពាវនាវឲ្យប្អូនៗ ក្មួយៗដែលជាក្រុមបុរសរួមភេទបុរសមេត្តាប្រុងប្រយ័ត្ននឹងអនុវត្តវិធីបង្ការឲ្យបានខ្ជាប់ខ្ជួនតាមរយៈការប្រើប្រាស់ស្រោមអនាម័យជាមួយដៃគូរបស់ខ្លួន។
សូមកុំខ្មាសអៀនក្នុងការស្វែងរកសេវាធ្វើតេស្តឈាម និង ព្យាបាលព្រោះថា មេរោគអេដស៍/ជំងឺអេដស៍នៅមានបន្តចម្លង និងពុំទាន់មានថ្នាំព្យាបាលឲ្យជាសះស្បើយនៅឡើយទេ។
លោកថា «បើស្រឡាញ់ជាតិ និងគ្រួសាររបស់អ្នក ត្រូវការពារខ្លួនអ្នកកុំឲ្យឆ្លងមេរោគអេដស៍»។
គួរបញ្ជាក់ថា ការប្រយុទ្ធទប់ស្កាត់ការរីករាលដាលមេរោគអេដស៍ ជំងឺអេដស៍នៅកម្ពុជាដែលបានទទួលលទ្ធផលមកដល់សព្វថ្ងៃនេះ គឺជាលទ្ធផលនៃការចូលរួមជាពហុវិស័យ ពីគ្រប់ស្រទាប់វណ្ណៈ ទាំងប្រជាពលរដ្ឋទួទៅ ទាំងរដ្ឋាភិបាល និងទាំងសង្គមស៊ីវិល។ ការអនុវត្តរួមគ្នាបានបញ្ចៀសបានប្រជាពលរដ្ឋកម្ពុជាជាច្រើនម៉ឺននាក់មិនឲ្យស្លាប់ និងមិនអោយឆ្លងមេរោគអេដស៍។
ជាមួយគ្នាផងដែរ ធនធានមនុស្សថ្មីជាច្រើនត្រូវបានបណ្តុះបណ្តាល នៅពេលដែលធនធានមនុស្ស ដែលជាសកម្មជនដំបូងបានបាត់បង់ជាបន្តបន្ទាប់៕
Source: Kampuchea Thmey Daily
0 Comments