សេតវិមានបានឲ្យដឹងកាលពីថ្ងៃព្រហស្បតិ៍ថា លោកប្រធានាធិបតីដូណាល់ត្រាំ បានទទួលលិខិតថ្មីពីមេដឹកនាំផ្តាច់ការកូរ៉េខាងជើងលោកគីមជុងអ៊ុន ប៉ុន្តែមិនបង្ហាញពីខ្លឹមសាររបស់វាទេ។
ខណៈដែលមានសញ្ញាជាសាធារណៈតិចតួចអំពីវឌ្ឍនភាពឆ្ពោះទៅរកគោលបំណងរបស់លោកត្រាំចំពោះការលុបបំបាត់អាវុធនុយក្លេអ៊ែររបស់កូរ៉េនោះ សេតវិមានបាននិយាយថា លិខិតនេះបានកើតឡើង បន្ទាប់ពីកិច្ចប្រជុំកំពូលរបស់អ្នកទាំងពីរកាលពីថ្ងៃទី១២ខែមិថុនា។
អ្នកនាំពាក្យសេតវិមានលោកស្រី Sarah Sanders បាននិយាយថា “លិខិតមួយដែលផ្ញើជូនលោកប្រធានាធិបតី ត្រាំ ពីលោកប្រធាន គីម គឺត្រូវបានទទួលនៅថ្ងៃទី១ខែសីហា។ ការឆ្លើយឆ្លង គ្នារវាងមេដឹកនាំទាំងពីរបានបន្តក្រោយកិច្ចប្រជុំរបស់ពួកគេនៅប្រទេសសិង្ហបុរីនិងជំរុញការសន្យាដែលបានធ្វើឡើងនៅក្នុងសេចក្តីថ្លែងការណ៍រួមរវាងសហរដ្ឋអាមេរិកនិងកូរ៉េខាងជើង”។
លោកស្រី Sanders បានថ្លែងថា មានការឆ្លើយតបទៅវិញ។
លោក ត្រាំ បាននិយាយអំពីលិខិតនេះនៅក្នុងការបង្ហោះ Twitter នាពេលយប់ជ្រៅដោយថ្លែងអំណរគុណដល់លោកគីមសម្រាប់ការប្រគល់នៅសប្តាហ៍នេះនៃអដ្ឋិធាតុទាហានអាមេរិករាប់សិបនាក់ដែលស្លាប់ក្នុងអំឡុងសង្គ្រាមកូរ៉េ។
លោក ត្រាំ បាននិយាយថា “សូមអរគុណដល់លោកប្រធាន គីម ជុងអ៊ុន ដែលបានរក្សាពាក្យសំដីរបស់អ្នកហើយចាប់ផ្តើមដំណើរការបញ្ជូនមកផ្ទះវិញនូវទាហានដ៏អស្ចារ្យនិងជាទីស្រឡាញ់របស់យើង។ សូមអរគុណផងដែរចំពោះសំបុត្រដ៏ល្អរបស់អ្នក។ ខ្ញុំទន្ទឹងរង់ចាំជួបអ្នកក្នុងពេលឆាប់ៗនេះ! ”។
បន្ទាប់មកសេតវិមានបានបកស្រាកអំពីការលើកឡើងរបស់លោកត្រាំអំពីកិច្ចប្រជុំមួយ។ លោកស្រី Sanders បានប្រាប់អ្នកយកព័ត៌មានថា “គ្មានការប្រជុំណាមួយត្រូវបានគ្រោងទុកទេ”។
លោកស្រីនិយាយថា “មិនមានកិច្ចប្រជុំជាលើកទីពីរកំពុងត្រូវបានពិចារណាឬរៀបចំនោះទេ។ ច្បាស់ណាស់ មានការបើកចំហចំពោះការពិភាក្សាប៉ុន្តែមិនមានកិច្ចប្រជុំដែលបានគ្រោងទុក ទេ”៕ AFP
Source: Kampuchea Thmey Daily
0 Comments