ឯម ឡេង​លី ជួប ភិ​ច អា​រុណ ខណៈ វ៉ែន សុវណ្ណ សាក​កណ្តាប់ដៃ​ជាមួយ​ហូ ស៊ិន អ៊ីរ៉ង់

អ្នក​ប្រដាល់​ជើង​ខ្លាំង​កម្ពុជា​២​រូប គឺ​ឯម ឡេង​លី អ្នក​ប្រដាល់​ក្លិប​ថ្មគោល​ពោធិ​សែន​ជ័យ និង ជើងចាស់​វ៉ែន សុវណ្ណ ក្លិប​កងកេង​មាន​រិ​ទ្ធ​ខេត្តបាត់ដំបង ត្រូវគេ​ផ្គូ​ឲ្យ​ជួប​ប្រកួត​ជាមួយ​អ្នក​ប្រដាល់​ថៃ និង​អ៊ីរ៉ង់ លើ​សង្វៀន​Ganzberg Top Fighter នា​យប់​ថ្ងៃ​សៅរ៍​ទី ២៥ សីហា ២០១៨​នេះ​។
​
អ្នក​ប្រដាល់​ជើង​ខ្លាំង​ស្រករ​ក្រោយ ឯម ឡេង​លី ក្លិប​ថ្មគោល​ពោធិ​សែន​ជ័យ ត្រូវគេ​ផ្គូ​ឲ្យ​ជួប​ជាមួយ​អ្នក​ប្រដាល់​ថៃ​ឈ្មោះ​ភិ​ច អា​រុណ​( Pheach Arun )​។ ពួកគេ​ទាំងពីរ នឹង​ប្រកួត​គ្នា​ក្នុង​ទម្ងន់​៧១​គីឡូក្រាម ។
​
ភិ​ច អា​រុណ គេ​ធ្លាប់​មក​ប្រកួត​នៅ​កម្ពុជា​ច្រើនលើក​ហើយ​កន្លងមក ។ អ្នក​ប្រដាល់​ថៃ​រូបនេះ បើ​ប្រៀប​ជាមួយ​ឯម ឡេង​លី គឺ​មិនដឹងថា យ៉ាងណា​នោះទេ ព្រោះថា ឡេង​លី គេ​ជា​អ្នក​ប្រដាល់​ស្រករ​ក្រោយ ។
​
ភិ​ច អា​រុណ នេះហើយ ដែល​បាន​ផ្តួល​យកឈ្នះ​ព្រំ សំណាង ក្លិប​កងពលតូច​ទ័ព​ឆ័​ត្រ​យោង​៩១១​ដោយ​ពិន្ទុ ដល់ទី​ពីរលើក និង​ឈ្នះ មាស ភារ​ម្យ ក្លិប​កងទ័ពជើងទឹក​ក្នុង​ទឹក​ទី​២​ផងដែរ​កន្លងមក ។ ប៉ុន្តែ​យ៉ាងណា អ្នក​ប្រដាល់​ថៃ​រូបនេះ មកជួប ឡុង​សុ​ភី ៥​លើក ឈ្នះ​១​ស្មើ​១​លើក​និង​ចាញ់​សុ​ភី​៣​លើក ។ Pheach Aroun មានកំនត់​ត្រា​ប្រកួត​ចំនួន​៩៦​លើក ឈ្នះ​៨៣​លើក ចាញ់​១៣​លើក និង​មិនដែល​ស្មើ​។​អ្នក​ប្រដាល់​ថៃ​រូបនេះ បានតែ​មក​ប្រកួត​ដំបូងៗ​ប៉ុណ្ណោះ ដែល​វាយ​ខ្លាំង​និង​ល្អ តែ​ដល់ពេល​មកលើ​ក​ក្រោយៗ​នេះ គឺ​វាយ​អន់​ណាស់ ដូច្នេះហើយ​ទើប​ធ្លាក់​មក​ផ្គូ​ជាមួយ​ជើង​ថ្មី ឯម ឡេង​លី​នោះ ។​
​
យ៉ាងណា ភិ​ច អា​រុណ ប៉ះ​ជាមួយ ឯម ឡេង​លី ក៏​ប្រហែលជា​ជួប​ការលំបាក​ដែរ ព្រោះថា ឡេង​លី ថ្វីត្បិតតែ​មាន​ប្រវត្តិ​ប្រកួត​ត្រឹមតែ​ជាង​៣០​លើក តែ​គេ​មាន​ស្នៀត​ប្រដាល់​ល្អ និង​ទើបតែ​ស្គាល់​ចាញ់​៥​លើក​ប៉ុណ្ណោះ ។ តែ​យ៉ាងណា ឯម ឡេង​លី ក៏ត្រូវ​ប្រយ័ត្ន​ដែរ សម្រាប់​ការប្រកួត​លើក​នេះ​។ ដូច្នេះ​ចាំមើល តើន​រណា​ឈ្នះ​រវាង​ឯម​ឡេង​លី និង ភិ​ច អា​រុណ នេះ ? ។
​
ឡេង​លី គេ​មាន​កំនត់ត្រា​ប្រកួត​ទើបតែ​៣៩​លើក​ប៉ុណ្ណោះ តែ​គេ​វាយ​ឈ្នះ​៣០​លើក​ទៅហើយ ដោយ​ចាញ់​តែ ០៨ លើក​និង​ស្មើ​០១​លើក​ប៉ុណ្ណោះ ។ គេ​ប្រកួត​ចុងក្រោយ បាន​វាយ​ចាញ់​អ្នក​ប្រដាល់​ជើង​ខ្លាំង​ថៃ កាំ​ឡៃ ភី​ត (Kamlai Phith ) ក្នុង​ទឹក​ទី ១ កាលពី​ថ្ងៃទី​០៣​សីហា​កន្លងទៅនេះ ។​
​
ចំពោះ វ៉ែន សុវណ្ណ គេ​នឹងត្រូវ​ជួប​ប្រកួត​សាក​កណ្តាប់ដៃ​ជាមួយ​អ្នក​ប្រដាល់​អ៊ីរ៉ង់ ហូ សិន ណា​សា​រិ (Hosein Nasari ) ។ វ៉ែន សុវណ្ណ និង ហូ សិន ណា​សា​រិ នឹង​ប្រកួត​គ្នា​ក្នុង​ប្រភេទ​ទម្ងន់​៧០​គីឡូក្រាម ។​
​
អ្នក​ប្រដាល់​អ៊ីរ៉ង់​ហូ សិន ណា​សា​រិ នេះ ជា​អ្នក​ប្រដាល់​ម្នាក់​ដែល​ហ្វឹកហាត់​នៅ​ប្រទេស​ថៃ​ហើយ​គេ​ធ្លាប់​មក​ប្រកួត​នៅ​កម្ពុជា​ម្តង​ហើយ​កន្លងមក តែ​មិនអាច​ទប់​ជាមួយ​ឯម ឡេង​លី ក្លិប​ថ្មគោល​ពោធិ​សែន​ជ័យ​បាន ដោយ​ត្រូវ​ឡេង​លី​វាយ​អោយ​សន្លប់​ក្នុង​ទឹក​ទី​១ ។ ជើង​ថ្មី​អ៊ីរ៉ង់​រូបនេះ មាន​ប្រវត្តិ​លើ​រេញ តែ​៣៥​លើក​ប៉ុណ្ណោះ ក្នុងនោះ​វាយ​ឈ្នះ​២៥​លើក ចាញ់​១០​លើក មិនដែល​ស្មើ ។​
​
ឆ្លងកាត់​ការប្រកួត​ប៉ុន​នេះ ហូ សិន ណា​សា​រិ ប្រហែលជា​ទប់​ជាមួយ​វ៉ែន សុវណ្ណ មិនបាន​នោះឡើយ ព្រោះ​សុវណ្ណ ជា​អ្នក​ប្រដាល់​ជើង​ខ្លាំង​ជើងចាស់ ។ គេ​មាន​ស្នៀត​ប្រដាល់​ល្អ ហើយ​ទិច​និ​ច​ប្រកួត​របស់គេ ក៏​ខ្ពស់​និង​មាន​កលល្បិច​ច្រើន​ដែរ ដែល​មិន​អាចអោយ​ហូ សិន ណា​សា​រិ យកឈ្នះ​បាន​នោះឡើយ ។​
​
តែ​យ៉ាងណា​ខ្លាច វ៉ែន សុវណ្ណ ចាញ់​កម្លាំង​របស់​អ្នក​ប្រដាល់​អ៊ីរ៉ង់​នោះ ព្រោះ​សុវណ្ណ​មាន​វ័យ​ច្រើន ហើយ​កម្លាំង​ស៊ុ​ហ្វ ក៏​មិនជា​ខ្លាំង​និង​រឹងមាំ​ដូច​ពីមុន​នោះដែរ ។ គេ​ធ្លាប់​វាយ​ឈ្នះ​ជប៉ុន Takaya ដោយ​ពិន្ទុ កាលពីពេល​កន្លងមក​នៅ​សង្វៀន​អាស៊ីអាគ្នេយ៍​នេះ ។
​
ទោះជា​យ៉ាងណា វ៉ែន សុវណ្ណ មិនទាន់​ប្រាកដថា​ឈ្នះ ហូ សិន ណា​សា​រិ នោះទេ ត្បិត​សុវណ្ណ អាច​ចាញ់​កម្លាំង​ស៊ុ​ហ្វ​អ្នក​ប្រដាល់​អ៊ីរ៉ង់ ។ ប៉ុន្តែ​រឿង​ឈ្នះ​ចាញ់ មិនអាច​កំនត់​មុន​បាន​នោះឡើយ ។ ចាំមើល​រវាង​វ៉ែន សុវណ្ណ និង ហូ សិន ណា​សា​រិ តើន​រណា​ឈ្នះ ?៕



Source: Kampuchea Thmey Daily