ប្រទេសឥណ្ឌា កាលពីថ្ងៃពុធ បានច្រានចោលសំណើរបស់រដ្ឋាភិបាលអារ៉ាប់រួមក្នុងការផ្តល់ទឹកប្រាក់ចំនួន១០០លានដុល្លារដល់មូលនិធិពិសេសមួយ សម្រាប់រដ្ឋ Kerala បន្ទាប់ពីគ្រោះទឹកជំនន់បានសម្លាប់មនុស្សជាង៤០០នាក់។
ការច្រានចោលនេះបានធ្វើឡើងបើទោះបីជាមានការអំពាវនាវឲ្យទទួលយកការផ្តល់ជូនរបស់ប្រទេសឈូងសមុទ្រមួយនេះដោយប្រមុខរដ្ឋ Kerala ក៏ដោយ។ លោកប្រមុខរដ្ឋបានអំពាវនាវសុំជំនួយច្រើនជាងរដ្ឋាភិបាលឥណ្ឌាដែលផ្តល់ឲ្យ។
ក្រសួងការបរទេសបាននិយាយនៅក្នុងសេចក្តីថ្លែងការណ៍មួយដែលពន្យល់អំពីការច្រានចោលនេះថា “ស្របតាមគោលនយោបាយដែលមានស្រាប់ រដ្ឋាភិបាលបានប្តេជ្ញាចិត្តបំពេញតាមតម្រូវការសម្រាប់ការផ្តល់ជំនួយនិងការស្តារឡើងវិញតាមរយៈកិច្ចប្រឹងប្រែងក្នុងប្រទេស”។
ក្រសួងនេះបានបន្ថែមថា ប្រាក់បរទេសអាចត្រូវបានបរិច្ចាគតែតាមរយៈបុគ្គលឬមូលនិធិដែលមានដើមកំណើតឥណ្ឌាប៉ុណ្ណោះ។
ប្រទេសឥណ្ឌាមានកំណត់ត្រាមួយនៃការបដិសេធជំនួយបរទេសបន្ទាប់ពីគ្រោះមហន្តរាយ។ ប្រទេសនេះបានច្រានចោលជំនួយបរទេសបន្ទាប់ពីរលកយក្សស៊ូណាមិកាលពីឆ្នាំ២០០៤។
ក្រុមអ្នកជំនាញបាននិយាយថា រដ្ឋាភិបាលឥណ្ឌាចង់បង្ហាញថា ពួកគេអាចដោះស្រាយភាពអាសន្នណាមួយដោយខ្លួនឯងបាន។
ប្រទេសឥណ្ឌាមិនបានបញ្ជាក់ច្បាស់ទេអំពីការផ្តល់ជូនរបស់អារ៉ាប់រួមកាលពីថ្ងៃអង្គារដោយគ្រាន់តែនិយាយប៉ុណ្ណោះថា “ខ្លួនអរគុណយ៉ាងជ្រាលជ្រៅចំពោះការផ្តល់ជូនពីប្រទេសមួយចំនួនរួមទាំងពីរដ្ឋាភិបាលបរទេសផងដែរដើម្បីជួយដល់កិច្ចខិតខំប្រឹងប្រែងសង្គ្រោះនិងស្តារឡើងវិញបន្ទាប់ពីមានទឹកជំនន់ដ៏សោកសៅ”។
រដ្ឋាភិបាលម៉ាល់ឌីវក៏បានសន្យាផងដែរថានឹងផ្តល់ប្រាក់ជំនួយសម្រាប់ទឹកជំនន់។
ប្រមុខរដ្ឋ Kerala លោក Pinarayi Vijayan បានអំពាវនាវឲ្យមានកិច្ចចរចាកម្រិតខ្ពស់ជាមួយរដ្ឋាភិបាលជាតិដូច្នេះលុយរបស់អារ៉ាប់រួមគួរតែត្រូវបានទទួលយក។
លោក Vijayan បានស្នើសុំកញ្ចប់ថវិកាចំនួន៣៧៥លានដុល្លារពីរដ្ឋាភិបាលដោយនិយាយថា រដ្ឋនេះត្រូវតែប្រឈមមុខនឹងការបំផ្លិចបំផ្លាញអស់ទឹកប្រាក់ជាង៣ពាន់លានដុល្លារ។
ទឹកជំនន់រដូវមូសុងបានបណ្តាលឲ្យមនុស្សជាង៤២០នាក់ស្លាប់ចាប់តាំងពីខែមិថុនាមកខណៈមនុស្ស១.៣៤លាននាក់កំពុងរស់នៅក្នុងជំរំសង្គ្រោះជាង៣,៣០០កន្លែងនៅទូទាំងរដ្ឋនេះ៕ AFP
Source: Kampuchea Thmey Daily
0 Comments