ប្រធានាធិបតីរុស្ស៊ីលោក Vladimir Putin កាលពីថ្ងៃពុធបានហៅការដាក់ទណ្ឌកម្មរបស់សហរដ្ឋអាមេរិកប្រឆាំងនឹងទីក្រុងមូស្គូថា “ខូចផលប្រយោជន៍និងគ្មានន័យ” បន្ទាប់ពីទីក្រុងវ៉ាស៊ីនតោន បានព្រមានថា “ការឈឺចាប់ផ្នែកសេដ្ឋកិច្ច” បន្ថែមទៀតនឹងមកដល់។
លោក Putin បាននិយាយក្នុងសន្និសីទសារព័ត៌មានមួយជាមួយសមភាគីហ្វាំងឡង់លោក Sauli Niinisto នៅរមណីយដ្ឋានសមុទ្រខ្មៅ Sochi របស់ប្រទេសរុស្ស៊ីថា “ខ្ញុំសង្ឃឹមថា សហសេវិកអាមេរិករបស់យើងនឹងដឹងថា គោលនយោបាយបែបនេះមិនមានអនាគតទេហើយយើងនឹងចាប់ផ្តើមសហការដូចធម្មតាឡើងវិញ”។
លោក Putin បាននិយាយថា “បញ្ហា” មិនត្រឹមតែមកពីប្រធានាធិបតីសហរដ្ឋអាមេរិកលោក Donald Trump ទេ។
ការកត់សម្គាល់របស់លោកបានកើតឡើងបន្ទាប់ពីមន្ត្រីជាន់ខ្ពស់ក្រសួងរតនាគារអាមេរិកលោកស្រី Sigal Mandelker បាននិយាយកាលពីថ្ងៃអង្គារថា ក្រុងវ៉ាស៊ីនតោនអាចធ្វើឲ្យមានការឈឺចាប់ខាងសេដ្ឋកិច្ចកាន់តែខ្លាំងហើយនឹងមិនស្ទាក់ស្ទើរក្នុងការធ្វើដូច្នេះទេប្រសិនបើក្រុងមូស្គូមិនបញ្ឈប់នូវអ្វីដែលលោកស្រីហៅថាជា “សកម្មភាពបណ្តាលឲ្យមានគ្រោះថ្នាក់” ។
រដ្ឋាភិបាលសហរដ្ឋអាមេរិកបានដាក់ទណ្ឌកម្មដល់អង្គភាពរុស្ស៊ីក្នុងរយៈពេលជាច្រើនឆ្នាំកន្លងមកនេះសម្រាប់ការជ្រៀតជ្រែកនៅអ៊ុយក្រែន, ការប៉ុនប៉ងជះឥទ្ធិពលដល់ការបោះឆ្នោតអាមេរិកនិងការរំលោភលើការដាក់ទណ្ឌកម្មរបស់អង្គការសហប្រជាជាតិដែលដាក់លើកូរ៉េខាងជើង។
ដោយធ្វើឡើងជាសាធារណៈនៅដើមខែសីហានិងបានចូលជាធរមានកាលពីថ្ងៃពុធ, ការដាក់ទណ្ឌកម្មចុងក្រោយរបស់សហរដ្ឋអាមេរិកគឺទាក់ទងនឹងការបំពុលដោយសារធាតុ Novichok លើអតីតចារកម្មរុស្ស៊ីលោក Sergei Skripal នៅចក្រភពអង់គ្លេស។
ទោះបីជាយ៉ាងណាក៏ដោយ មន្ត្រីរុស្ស៊ីបានអះអាងថា សេដ្ឋកិច្ចរបស់ប្រទេសនេះមិនមានផលប៉ះពាល់ធំធេងអ្វីទេពីវិធានការដាក់ទណ្ឌកម្មទាំងនេះ។
រដ្ឋមន្ត្រីការបរទេសរុស្ស៊ីលោក Sergei Riabkov បានប្រាប់កាសែត RIA Novosti ថា “ការដាក់ទណ្ឌកម្មរបស់អាមេរិកគឺមិនមានឥទ្ធិពលលើគោលនយោបាយរបស់យើងទេ”។ លោកបានបន្ថែមថា ពួកគេនឹងស្ថិតនៅក្នុងរបៀបវារៈនៅថ្ងៃព្រហស្បតិ៍ក្នុងកិច្ចពិភាក្សានៅទីក្រុងហ្សឺណែវរវាងទីប្រឹក្សាសន្តិសុខជាតិសហរដ្ឋអាមេរិកលោក John Bolton និងសមភាគីរុស្ស៊ីលោក Nikolai Patrushev ៕ AFP
Source: Kampuchea Thmey Daily
0 Comments