រៀម ច័ន្ទបរមី មានវិបត្តិផ្លូវចិត្តរឿងអ្វី បានជាពោលពាក្យប្លែកៗបែបនេះ?

Cambodia News August 23, 2018

ភ្នំពេញ ៖ តារាចម្រៀង និងសម្តែងសំឡេងស្រទន់អង្រួនចិត្តអ្នកស្តាប់កញ្ញា រៀម ច័ន្ទបរមី ថ្មីៗនេះតាមការកត់សម្គាល់នាងតែងទម្លាយពីអារម្មណ៍ហាក់មិនសូវសប្បាយចិត្តដូចជួបវិបត្តិផ្លូវចិត្តអ្វីមួយដែលធ្វើឲ្យតារាស្រីដែលធ្លាប់តែមានស្នាមញញឹមរូបនេះ នៅមិនស្ងប់ក្នុងផ្លូវជីវិតនោះឡើយ។

កញ្ញា រៀម ច័ន្ទបរមី បើចាប់អារម្មណ៍សង្កេតមើលពីអាជីពសិល្បៈរបស់នាងបច្ចុប្បន្នគឺដូចជាមានការមមាញឹកច្រើនតាមរយៈការចេញថតសម្តែងខ្សែភាពយន្តនៅតាមបណ្តាផលិតកម្មក្នុងស្រុកនានា។ មិនតែប៉ុណ្ណោះនាងក៏កាន់តែរំលេចនូវរូបសម្ផស្សដ៏ស្រស់ស្អាតខុសប្លែកជាងគ្រាមុនៗទៀតផង។

ថ្វីត្បិតតែអាជីពសិល្បៈ និងភាពហ៊ឺហារំលេចជាមួយភាពស្រស់ស្អាតទាញបានចំណាប់អារម្មណ៍និងការគាំទ្រពីទស្សនិកជនបែបនេះក្តី។ ប៉ុន្តែក្នុងចិត្តរបស់ស្រីស្រស់ រៀម ច័ន្ទបរមី នាអំឡុងមួយរយៈពេលចុងក្រោយនេះ នាងដូចជាជួបនូវបញ្ហាស្មុគស្មាញ និងចាក់ស្រេះច្រើនចំពោះខ្សែជីវិតប្រចាំថ្ងៃខណៈមានការលើកជាសំណួរថាតើកញ្ញា រៀម ច័ន្ទបរមី សព្វថ្ងៃកំពុងមានរឿងមិនសប្បាយចិត្តអ្វីលាក់ទុកក្នុងចិត្ត?។

ជុំវិញការចោទសំណួររបស់មហាជនលើតារាស្រីកញ្ញា រៀម ច័ន្ទបរមី នេះដែរ គិតមកទល់ពេលនេះពុំត្រូវបានការផ្តល់ចម្លើយស្រាយមន្ទិលឲ្យទស្សនិកជនបានដឹងពីការពិតនោះឡើយ។ ប៉ុន្តែបើចាប់អារម្មណ៍នៅលើបណ្តាញសង្គមហ្វេសប៊ុករបស់នាង គឺមិនខុសគ្នានឹងអ្វីដែលបានលើកឡើងនោះទេ ដោយហេតុថាតារាស្រីកញ្ញា រៀម ច័ន្ទបរមី ថ្មីៗនេះ បានទម្លាយសារមួយប្រយោគនិយាយថា ការសើចសប្បាយគ្រាន់តែសំបកផ្នែកខាងក្រៅនៃបញ្ហាតែប៉ុណ្ណោះ តែធាតុពិតគ្មានណាដឹងនោះឡើយ។

កញ្ញា រៀម ច័ន្ទបរមីបានបញ្ជាក់បន្ថែមថា អ្នកមិនមែនជារូបខ្ញុំ អញ្ចឹងហើយអ្នកមិនដឹងថាខ្ញុំមាន ទុក្ខបែបណាទេញញឹម រីករាយ សើច សប្បាយ គ្រាន់ជាសំបកក្រៅតែធាតុពិត…!ខ្ជិលនិយាយ ច្រើន អ្នកណាដឹងក៏ដឹង អ្នកមិនដឹងក៏មិនដឹងចុះ៕