ភ្នំពេញ ៖ ការបញ្ជាក់បែបនេះ ធ្វើឡើងនៅក្នុងជំនួបនេះ រវាងលោកទេសរដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិកម្ពុជា ជាមួយលោក Haoliang Xu ឧបការីអគ្គលេខាធិការ អ.ស.ប និងជានាយកប្រចាំតំបន់អាស៊ី-ប៉ាស៊ីហ្វិក នៃ UNDP ដែលបានចូលចួបសំដែងការគួរសម កាលពីព្រឹកថ្ងៃទី២២ ខែសីហា ឆ្នាំ២០១៨។
លោក កេត សោផាន់ អ្នកនាំពាក្យក្រសួងការបរទេស និងសហប្រតិបត្តិការអន្តរជាតិកម្ពុជាបានថ្លែងប្រាប់អ្នកសារព័ត៌មានក្រោយជំនួបនោះថា លោកទេសរដ្ឋមន្ត្រី ប្រាក់ សុខុន បានទទួលជួបពិភាក្សាការងារជាមួយឧបការីអគ្គលេខាធិការ អ.ស.ប និងជានាយកប្រចាំតំបន់អាស៊ី-ប៉ាស៊ីហ្វិក នៃកម្មវិធីអភិវឌ្ឍន៏សហប្រជាជាតិ (UNDP) ដែលលោកបានអញ្ជើញមកចូលរួមសន្និសីទ នៅខេត្តសៀមរាប។ នៅក្នុងជំនួបនោះ លោកទេសរដ្ឋមន្ត្រី ប្រាក់ សុខុន បានសម្ដែងការស្វាគមន៍ចំពោះដំណើរទស្សនកិច្ចរបស់លោក Haoliang Xu មកកាន់ព្រះរាជាណាចក្រកម្ពុជា និងបានអរគុណភ្នាក់ងារអភិវឌ្ឍន៍ទាំងអស់របស់អង្គការសហប្រជាជាតិ នៅប្រទេសកម្ពុជា ដែលកន្លងមកបានចូលរួមចំណែកនៅក្នុងការកសាង និងសម្រេចបាននូវគោលដៅអភិវឌ្ឍន៍សហស្សវត្ស ក៏ដូចជាគោលដៅអភិវឌ្ឍន៍ប្រកបដោយចីរភាពនៅឆ្នាំ២០៣០។
តាមលោក កេត សោផាន់ UNDP ក៏បានរួមចំណែកចូលរួមដល់សកម្មភាពមនុស្សធម៌ផ្សេងៗទៀត ដូចជាការដោះមីន និងយុទ្ធភណ្ឌមិនទាន់ផ្ទុះ និងការបញ្ជូនបេសកកម្មរក្សាសន្តិភាពរបស់អង្គការសហប្រជាជាតិផងដែរ។
នៅក្នុងជំនួបនោះដែរ លោកឧបការី បានកត់សម្គាល់អំពីវឌ្ឍនភាព និងការរីកចម្រើនយ៉ាងច្រើននៅប្រទេសកម្ពុជា ជាពិសេសលើការកាត់បន្ថយភាពក្រីក្រ ដែលបានកាត់បន្ថយរហូត ៥០ភាគរយ។ ជាមួយគ្នានោះ UNDP ក៏បានត្រៀមខ្លួនក្នុងការចូលរួមជួយអភិវឌ្ឍប្រទេសកម្ពុជាបន្តទៀតផងដែរ ពីព្រោះ យូអិនឌីភី មិនមែនជាអង្គការនយោបាយទេ គឺជាអង្គការដែលផ្ដល់ចំណេះដឹង ជំនាញ និងបច្ចេកទេស ដើម្បីជួយដល់បណ្ដាប្រទេសទាំងអស់នៅអាស៊ីប៉ាស៊ីហ្វិច។
ចំណែកលើកម្មវិធីអភិបាលកិច្ច UNDP ក៏បានជួយផ្នែកជំនាញដល់រដ្ឋាភិបាល គឺការផ្ដល់សេវាប្រកបដោយប្រសិទ្ធភាពជូនដល់ប្រជាពលរដ្ឋ ហើយលោកទេសរដ្ឋមន្ត្រី ប្រាក់ សុខុន ក៏បានជម្រាបជូនលោកឧបការីផងដែរ អំពីដំណើរការអនុម័តនូវឯកសារគោលដៅនៃការវិវត្តន៍ប្រកបដោយចីរភាព របស់កម្ពុជាដល់២០៣០ ដែលឯកសារនេះ គ្រោងនឹងដាក់ចូលគណៈរដ្ឋមន្ត្រីដើម្បីអនុម័តនៅក្នុងកិច្ចប្រជុំដំបូងរបស់រដ្ឋាភិបាលថ្មី ហើយនៅពេលឯកសារនោះត្រូវបានអនុម័ត និងត្រូវបញ្ចូលទៅក្នុងផែនការយុទ្ធសាស្ត្រជាតិ៕
Source: Kampuchea Thmey Daily
0 Comments