តៃកុងរថយន្តកុងតឺន័រ បើកបរងងុយដេករេចង្កូតបុកបង្កាន់ដៃស្ពានហាយវ៉េនិងម៉ូតូធ្លាក់ចូលទន្លេវ៉ៃគោ

ស្វាយរៀង ៖ រថយន្តកុងតឺន័រមួយគ្រឿងរេចង្កូតបុកបង្កាន់ដៃស្ពាននិងម៉ូតូក្មេងស្ទូចត្រី ធ្លាក់ចូលទន្លេវ៉ៃគោ តែសំណាងល្អ គ្មានបង្កគ្រោះថ្នាក់ដល់អ្នកធ្វើដំណើរណាម្នាក់នោះទេ។

ករណីនេះ បានកើតឡើងកាលពីវេលាម៉ោង៤និង២៥នាទី ថ្ងៃទី២០ ខែសីហា ឆ្នាំ២០១៨ នៅលើផ្លូវជាតិលេខ១ ត្រង់ចំណុចក្បាលស្ពានហាយវ៉េខាងកើត ស្ថិតក្នុងភូមិ បាក់រនាស់ សង្កាត់ សង្ឃ័រ ក្រុង ស្វាយរៀង ខេត្តស្វាយរៀង។

បើតាមក្មេងប្រុសជាម្ចាស់ម៉ូតូមានឈ្មោះ សំ មន្ថារចនា អាយុ ១៥ឆ្នាំ មានទីលំនៅភូមិ វាលយន្ត សង្កាត់/ក្រុង ខេត្ត ស្វាយរៀងបានឲ្យដឹងថា រូបគេនិងមិត្តភក្ដិ បានមកស្ទូចត្រីនៅក្រោមស្ពានហាយវ៉េ ចំណែកម៉ូតូបញ្ឈរទុកអែបចិញ្ចើមថ្នល់ ស្រាប់តែមានរថយន្តកុងតឺន័រមួយគ្រឿងបើកបរយ៉ាងលឿនពីទិសខាងកើតមកលិច។

ប្រភពបានបន្តទៀតថា មកដល់ចំណុចភូមិឃុំខាងលើ ស្រាប់តែរេចង្កូតមកខាងឆ្វេងដៃបុករះបង្កាន់ដៃស្ពានជាង២០ម៉ែត្ររាបដល់ដី និងបន្តបុកម៉ូតូដែលបញ្ឈរទុកអូសធ្លាក់ចូលក្នុងទឹកទន្លេវ៉ៃគោជាមួយតែម្តង។

ក្រោយពីបង្កហេតុរួចមក គេឃើញបុរសម្នាក់ បានវារចេញតាមកញ្ចក់រថយន្តហែលទឹកឡើងលើគោក និងជិះម៉ូតូឌុបចេញទៅទិសខាងលិចបម្រុងហៅរថយន្តតាក់ស៊ីជិះគេចខ្លួន តែត្រូវបានសមត្ថកិច្ចតាមទាន់ឃាត់ខ្លួនមកកាន់ការិយាល័យចរាចរណ៍ផ្លូវគោកនៃស្នងការដ្ឋាននគរបាលខេត្តស្វាយរៀង។

តៃកុងរថយន្តបង្កគ្រោះថ្នាក់បានប្រាប់ថា ៖ រូបគេមិនមែនជាតៃកុងរថយន្តបង្កនោះទេ គាត់គឺជាព្រូឡានតែប៉ុណ្ណោះ ហើយក្នុងហេតុការណ៍ក៏មិនដឹងដែរពោលគឺដេកក្នុងរថយន្តភ្ញាក់ឡើងស្រាប់តែរថយន្តធ្លាក់ចូលទឹករួចទៅហើយ។

បុរសសង្ស័យបានបន្តទៀតថា រូបគាត់ចេញពីរថយន្តនៅក្នុងជាមួយតៃកុង ហើយសួរតៃកុងថាមានរឿងអីបានធ្លាក់ទឹកគេប្រាប់ថាងោកមួយភាំង ក៏បណ្តាលឲ្យរថយន្តរេចង្កូតបុករះបង្កាន់ដៃស្ពាននិងម៉ូតូធ្លាក់តែម្តងទៅ៕