ទីភ្នាក់ងារគ្រោះមហន្តរាយបាននិយាយកាលពីថ្ងៃសុក្រថា ការរញ្ជួយដីដ៏សាហាវជាបន្តបន្ទាប់ដែលវាយប្រហារកោះ Lombok របស់ប្រទេសឥណ្ឌូនេស៊ីបានសម្លាប់មនុស្សអស់៥៥៥នាក់ និងរងរបួសជិត១,៥០០នាក់ ខណៈមនុស្សរាប់សែននាក់ទៀតគ្មានផ្ទះសម្បែង។
កោះដ៏ស្រស់ស្អាតនៅក្បែរកោះបាលីមួយនេះត្រូវបានវាយប្រហារដោយការរញ្ជួយដីពីរលើកកាលពីថ្ងៃទី២៩ខែកក្កដានិងថ្ងៃទី៥ខែសីហា។ កាលពីថ្ងៃអាទិត្យមុន វាត្រូវបានធ្វើឲ្យរង្គើដោយការរញ្ជួយថ្មីៗជាបន្តបន្ទាប់ដែលមានកម្លាំងខ្លាំងបំផុតគឺ៦.៩រ៉ិចទ័រ។
ទីភ្នាក់ងារគ្រោះមហន្តរាយរបស់ប្រទេសឥណ្ឌូនេស៊ីបាននិយាយកាលពីថ្ងៃសុក្រថា ភាគច្រើននៃការស្លាប់គឺបានកើតឡើងនៅភាគខាងជើងនៃទីក្រុង Lombok ហើយមនុស្សមួយចំនួនក៏បានស្លាប់នៅលើកោះ Sumbawa ដែលស្ថិតនៅជិតខាងផងដែរ។
ជនរងគ្រោះជាច្រើននាក់ត្រូវបានសម្លាប់ដោយសារកំទេចកំទីបាក់ធ្លាក់លើនៅពេលមានរញ្ជួយញាប់ញ័រនៅទូទាំងកោះនេះដែលជាហេតុបង្កឲ្យមានការបំផ្លិចបំផ្លាញរីករាលដាល។
សហគមន៍ទាំងមូលត្រូវបានបំផ្លាញដោយបន្សល់ទុកនូវផ្លូវថ្នល់ដែលមានស្នាមប្រេះហើយអគារបានដួលរលំ។ ទីភ្នាក់ងារគ្រោះមហន្តរាយបាននិយាយថា មនុស្សប្រហែល៣៩០,០០០នាក់នៅតែផ្លាស់ទីលំនៅបន្ទាប់ពីការរញ្ជួយនេះ។
បណ្តាអង្គការផ្តល់ជំនួយបានប្តេជ្ញាបង្កើនជំនួយមនុស្សធម៌នៅលើកោះនេះស្របពេលដែលអ្នកភូមិបានតស៊ូនៅក្នុងជំរំបណ្តោះអាសន្ន។ ពួកគេបានព្រមានថា លទ្ធភាពទទួលបានស្បៀងអាហារ ជម្រកនិងទឹកស្អាតគឺមិនគ្រប់គ្រាន់សម្រាប់អ្នកភូមិមួយចំនួនដែលត្រូវផ្លាស់ទីលំនៅដោយសារគ្រោះមហន្តរាយនេះទេ។
អ្នកនាំពាក្យទីភ្នាក់ងារគ្រោះមហន្តរាយលោក Sutopo Purwo Nugroho បាននិយាយនៅក្នុងសេចក្តីថ្លែងការណ៍មួយថា “យើងបានដាក់ពង្រាយកងទ័ពទៅកាន់ភូមិដាច់ស្រយាលដែលពិបាកនឹងទៅដល់។ មានភូមិជាច្រើនដែលម៉ូតូពិបាកនឹងចូលដល់។ ជំនួយមួយចំនួនត្រូវនាំទៅដោយដើរ”។
គួរបញ្ជាក់ថា ការចំណាយសម្រាប់ការសាងសង់ឡើងវិញត្រូវបានគេប៉ាន់ស្មានថាមានចំនួន៧ពាន់ពាន់លានរូពៀ (៤៧៨លានដុល្លារ)៕ AFP
Source: Kampuchea Thmey Daily
0 Comments