រតនគិរី ៖ លោក ចាន់ ប៊ុនធឿន ប្រធានមន្ទីរធនធានទឹក និងឧតុនិយមខេត្ត បានប្រាប់ឲ្យដឹងថា ស្រុកចំនួន ៤ ក្នុងចំណោមស្រុក-ក្រុង ទាំង៩ នៃខេត្តរតនគិរី បានជន់ទឹកលិច ដោយកម្ពស់ទឹកទន្លេសេសាន្ត ឡើងខ្ពស់ដល់ ៩,៧០ម៉ែត្រហើយ ដែលចំណុចនេះលើសកម្រិតប្រកាសអាសន្ន ត្រឹមតែ៩,៥០ម៉ែត្រ ខណៈមេឃនៅតែបន្តធ្លាក់ភ្លៀងជារៀងរាល់ថ្ងៃអស់រយៈពេលជិត៣ខែមកហើយនោះ រួមទាំងការបញ្ចេញធារទឹកពីអាងស្តុកទឹកសេសាន្ត៤ និងសេសាន្ត៤ A ប្រទេសវៀតណាមមកលើតំបន់ភាគខាងក្រោមទន្លេសេសាន នាថ្ងៃទី១៥ ខែសីហា ឆ្នាំ២០១៨ វេលាម៉ោង ៦និង៤៥នាទីព្រឹកម្សិលមិញនេះ ដែលមានធារទឹក ៣៤៧៨ m3/s។
ប្រធានមន្ទីរធនធានទឹក និងឧតុនិយមខេត្តរូបនេះ បានបញ្ជាក់ថា ស្រុកទាំង ៤ ដែលកំពុងរងគ្រោះដោយសារជំនន់ទឹកភ្លៀងនោះ គឺមានស្រុកអូរយ៉ាដាវ ស្រុកអណ្តូងមាស ស្រុកវើនសៃ និងស្រុកតាវែង ហើយគិតត្រឹមថ្ងៃរសៀលដដែលម្សិលមិញ ស្រុកអណ្ដូងមាស បានជន់លិចចូលដល់ទីរួមស្រុកហើយអាជ្ញាធរស្រុក បានជម្លៀសប្រជាពលរដ្ឋបានចំនួន ៥ភូមិហើយ ដោយអោយទៅរកទីទួលសុវត្ថិភាពផងដែរ។
លោក ចាន់ ប៊ុនធឿន ប្រធានមន្ទីរធនធានទឹក និងឧតុនិយមខេត្តរតនគិរី ក៏បានធ្វើការសន្និដ្ឋានថា កម្ពស់ទឹកទន្លេសេសាន្តនៅយប់នេះ នឹងបន្តកើនឡើងហើយនឹងបង្កអោយជន់លិចតំបន់មួយចំនួនក្នុងស្រុកទាំង ៤ ខាងលើនេះតែម្តង។ ដោយឡែកចំពោះស្ថានភាពកម្ពស់ទឹកទន្លេស្រែពកវិញ ពុំមានសញ្ញាណាមួយគួរអោយព្រួយបារម្ភថានឹងជន់លិចនោះទេ។ រហូតមកដល់ពេលនេះអាជ្ញាធរខេត្ត និងអាជ្ញាធរមូលដ្ឋានកំពុងត្រៀមមធ្យោបាយព្រមទាំងកម្លាំង ដើម្បីជម្លៀសប្រជាពលរដ្ឋដែលរស់នៅតាមបណ្តោយដងទន្លេសេសានទាំង៤ស្រុក រួមមាន ស្រុកអូរយ៉ាដាវ ស្រុកអណ្តូងមាស ស្រុកតាវែង និងស្រុកវើនសៃ មករកទីទួលសុវត្ថិភាពផងដែរ៕
Source: Kampuchea Thmey Daily
0 Comments