តាកែវ ៖ ដំណាំកញ្ឆា ដែលឈ្មួញលួចលាក់ដាំដុះដោយខុសច្បាប់នៅលើជួរភ្នំបាយ៉ងកោរាប់រយដើម ត្រូវបានកម្លាំងកងរាជអាវុធហត្ថខេត្តតាកែវធ្វើការឆ្មក់ចុះកាប់បំផ្លាញចោលសាជាថ្មី។
ការឆ្មក់ចុះកាប់បំផ្លាញដំណាំកញ្ឆានេះ បានធ្វើឡើងនៅរសៀលថ្ងៃទី០៣ ខែសីហា ឆ្នាំ២០១៨ ដែលដឹកនាំបញ្ជាដោយលោកវរសេនីយ៍ឯក ង៉ែត ចាន់ធី មេបញ្ជាការរងកងរាជអាវុធខេត្តតាកែវ នៅទីតាំងដំណាំកញ្ឆាខុសច្បាប់ស្ថិតនៅភូមិពោធិរោង ឃុំព្រះបាទជាន់ជុំ ស្រុកគីរីវង់ ខេត្តតាកែវ។ ក្នុងប្រតិបត្តិការនោះ កម្លាំងកងរាជអាវុធហត្ថខេត្ត បានធ្វើការកាប់បំផ្លាញដើមកញ្ឆា និងដុតបំផ្លាញចោលនៅនឹងកន្លែង ចំនួនជិត១ពាន់ដើម ស្មើនឹង២៤រង កាប់ទម្លាយអាងស្តុកទឹកចំនួន០២អាង និងដុតកម្ទេចទុយោបូមទឹក០២ខ្សែ ប្រហែល២០០ម៉ែត្រ។
ជួបជាមួយអ្នកសារព័ត៌មាននាឱកាសនោះដែរ លោកវរសេនីយ៍ឯក ង៉ែត ចាន់ធី ក៏បានឲ្យប្រព័ន្ធផ្សព្វផ្សាយជួយផ្សព្វផ្សាយ និងបានអំពាវនាវដល់ប្រជាពលរដ្ឋបញ្ឈប់ការដាំដំណាំកញ្ឆានេះតទៅទៀត ព្រោះវាខុសច្បាប់ ដោយឲ្យងាកមកដាំដំណាំរួមផ្សំផ្សេងៗ ដែលជាដំណាំស្របច្បាប់វិញ ដើម្បីទ្រទ្រង់ជីវភាពក្រុមគ្រួសារ។
ក្រោយការកាប់ដុតបំផ្លាញចោលដំណាំកញ្ឆាដែលរកឃើញទាំងប៉ុន្មាននោះហើយ បច្ចុប្បន្នកម្លាំងជំនាញកំពុងធ្វើស្រាវជ្រាវស្វែងរកម្ចាស់ទីតាំងយកមកផ្ដន្ទាទោសទៅតាមផ្លូវច្បាប់ឲ្យខាងតែបាន ព្រោះកន្លងមកសមត្ថកិច្ចជំនាញផ្សេងៗធ្លាប់បានធ្វើការហាមឃាត់រាល់ការដាំដុះកញ្ឆានេះជារឿយៗហើយដែរ៕
Source: Kampuchea Thmey Daily
0 Comments