រតនគិរី ៖ ប្រជាពលរដ្ឋរស់នៅតាមបណ្តោយផ្លូវជាតិលេខ៧៨នៅក្រុង បានលុង បានធ្វើការរិះគន់ រថយន្តបែនមួយគ្រឿងដឹកថ្មចេញពីក្បែរភ្នំកូនសេកចូលមកក្រុងបានលុង បានជ្រុះថ្មរាយប៉ាយតាមដងផ្លូវធ្វើឲ្យប៉ះពាល់ដល់អ្នកធ្វើដំណើរនៅតាមដងផ្លូវជាតិលេខ៧៨។
ជាក់ស្តែង នៅវេលាម៉ោង៨និង៣០នាទីព្រឹកថ្ងៃទី២៦ ខែសីហា ឆ្នាំ២០១៨ មានរថយន្តមួយគ្រឿងម៉ាកហ៊ីយ៉ាន់ដាយ ពណ៌ស្វាយ មិនចាំស្លាកលេខ បានដឹកជញ្ជូនថ្មចេញពីក្បែរភ្នំកូនសេក ស្រុកកូនមុំយកមកចូលក្រុងបានលុង ហើយបានដាក់ថ្មហៀរទ្រុងបណ្តាលឲ្យជ្រុះរាយប៉ាយនៅតាមដងផ្លូវជាតិធ្វើឲ្យអ្នកជិះម៉ូតូនឹងអ្នកបើកបររថយន្តមានការភ័យខ្លាចកើតគ្រោះថ្នាក់ចរាចរណ៍ជាយថាហេតុ ពោលគឺបណ្តាលឲ្យមុតកង់រថយន្ត ម៉ូតូនឹងរអិលដួលមានការគ្រោះថ្នាក់ដល់អាយុជីវិតពួកគាត់។
លោកឃឹម រមន្នី អនុប្រធានមន្ទីរសាធារណការ និងដឹកជញ្ជូនខេត្តបានឲ្យដឹងថា គាត់បានដឹងហើយព្រឹកមិញនេះមានថ្មជ្រុះ ហើយគាត់នឹងណែនាំរថយន្តដឹកថ្មទាំងនោះមិនឲ្យមានចឹងទៀតទេ។
កន្លងមករថយន្តដឹកដី ដឹកដីខ្សាច់ និងដឹកថ្ម មិនបានគ្របស្បៃពីលើរថយន្តធ្វើឲ្យហុយដីជ្រុះឬដីខ្សាច់នឹងថ្ម ទៅលើអ្នកធ្វើដំណើរជិះម៉ូតូតាមដងផ្លូវហុយលើភ្នែកពួកគាត់បណ្តាលឲ្យមានគ្រោះថ្នាក់ផងដែរ។
ប្រជាពលរដ្ឋ បានសំណូមពរដល់អាជ្ញាធរក្រុងនិងមន្ទីរជំនាញពាក់ព័ន្ធនៅក្នុងខេត្តមេត្តារឹតបន្តឹងរថយន្តដឹកដី ដឹកដីខ្សាច់ នឹងដឹកថ្ម កុំគិតពីផលប្រយោជន៍ផ្ទាល់ខ្លួនឯង ហើយគិតពីអាយុជីវិតដល់អ្នកដទៃផង៕
Source: Kampuchea Thmey Daily
0 Comments