បាត់ដំបង ៖ ករណីឃាតកម្មមួយ បានកើតឡើងដ៏សែនឃោរឃៅជាទីបំផុត ដោយជនសង្ស័យបានប្រើប្រាស់កាំភ្លើងខ្លីបាញ់ចំក្បាលយុវជនរងគ្រោះ ដែលមានមុខរបរបើកបររថយន្តដឹកទឹកកកលក់តែប៉ុណ្ណោះ បណ្តាលអោយស្លាប់តែម្តង ក្រោយពីបានបញ្ជូនទៅកាន់មន្ទីរពេទ្យ ដែលអំពើឃាតកម្មនេះហាក់បីដូចជាមានគំនុំតាំងពីពេលណាមក។
តាមប្រភពដែលយើងទទួលបានគឺ ហេតុការណ៍នេះបានកើតឡើង កាលពីថ្ងៃទី៥ ខែសីហា ឆ្នាំ២០១៨ នៅលើកំណាត់ផ្លូវលេខ ១៥៧០ ត្រង់ចំណុចវាលអន្ទង់ស ក្នុងភូមិក្រពើជើង ឃុំភ្នំសំពៅ ស្រុកបាណន់ ខេត្តបាត់ដំបង ដែលបានបង្កឡើងដោយជនមិនស្គាល់មុខ និងមានបក្ខពួកចំនួន២នាក់ ប្រើប្រាស់រថយន្តម៉ាក ហាយឡិនឌ័រ មិនស្គាល់ស្លាកលេខ។
តាមការរៀបរាប់ពីជនរងគ្រោះដែលគេចផុតពីសេចក្តីស្លាប់បាននិយាយថា នៅមុនពេលកើតហេតុពួកគេមានគ្នា៣នាក់ បានបើកឡានដឹកទឹកកកវិលត្រឡប់ទៅផ្ទះវិញ ដោយចេញដំណើរពីបាត់ដំបង ឆ្ពោះទៅកាន់អាងទឹកកំពីងពួយ ស្ថិតក្នុងភូមិតាង៉ែន ឃុំតាគ្រាម។
សាក្សីដដែលបានបន្តថា ក្នុងការធ្វើដំណើរនោះហាក់បីដូចជាមានរថយន្តមួយគ្រឿងបានបើកតាមពីក្រោយរហូតតាំងពីផ្លូវបំបែកភ្នំក្រពើ ប៉ុន្តែដោយសារតែពួកគេមិនបានចាប់អារម្មណ៍ ក៏ចេះតែបន្តដំណើរទៅមុខរហូត លុះទៅដល់ត្រង់ចំណុចកើតហេតុខាងលើដែលជាវាលស្រែមិនសូវមានផ្ទះប្រជាពលរដ្ឋ ស្រាប់តែរថយន្តម៉ាក ហាយឡិនឌ័រ នោះបានឡើងជែងព្រមទាំងបានឈប់ពាំងនៅពីមុខរថយន្តដឹកទឹកកករបស់ពួកគេតែម្តង។
ភ្លាមៗនោះ ក្រុមជនល្មើសគឺមានគ្នា២នាក់ បានចុះពីរថយន្តដើរមកសួរថា « ពួកអ្ហែងបើកឡានប៉ះពារឡានអញហើយ ម៉េចមិនព្រមឈប់និយាយគ្នាសិន » នៅពេលនោះដែរពួកគេទាំង៣នាក់ ហាក់បីដូចជាស្រឡាំងកាំង ក៏បានឆ្លើយទៅវិញថា ពួកខ្ញុំមិនបានដឹងអីផង ហើយប៉ះនៅកន្លែងណា ? ភ្លាមៗនោះ ក្នុងចំណោមជនសង្ស័យទាំង២នាក់ គឺមានម្នាក់បានដកកាំភ្លើងខ្លីចេញពីចង្កេះ បាញ់សំដៅទៅលើក្បាលជនរងគ្រោះម្នាក់ បណ្តាលអោយចំក្បាលផ្នែកខាងឆ្វេងហូរឈាមពេញប្រាណតែម្តង ដោយឡែកជនសង្ស័យ ក៏បាននាំគ្នាបើកឡានត្រឡប់ក្បាលមកក្រុងបាត់ដំបងវិញ យ៉ាងស្ងៀមស្ងាត់។
ជនរងគ្រោះដែលត្រូវខ្មាន់កាំភ្លើងបាញ់ឆៅៗនោះមានឈ្មោះ ពេជ្រ ភិសាល ហៅពី ភេទប្រុស អាយុ ២៥ឆ្នាំ បណ្តាលអោយស្លាប់ពេលបញ្ជូនទៅដល់់មន្ទីរពេទ្យបង្អែក ខេត្តបាត់ដំបង រីឯជនរងគ្រោះ២នាក់ទៀត មានឈ្មោះ ហេង ចិត្រា ហៅឡិច ភេទ ប្រុស អាយុ ២០ឆ្នាំ និងឈ្មោះ ប៊ូ ចាន់ធី ហៅប៉ោង ភេទប្រុស អាយុ២៧ឆ្នាំ អ្នកទាំង៣ រស់នៅភូមិ តាង៉ែនឃុំតាគ្រាម ស្រុកបាណន់ ដូចគ្នា។
ជាលទ្ធផលក្រោយការត្រួតពិនិត្យនៅកន្លែងកើតហេតុ គឺមានបន្សល់នូវ សំបកកាទុស្ស ដែលបាញ់រួច ចំនួន១គ្រាប់ និងគ្រាប់ដែលមិនទាន់បាញ់ ចំនួន២គ្រាប់ ដែលការបាញ់នេះ ខ្មាន់កាំភ្លើងបានប្រើប្រាស់កាំភ្លើងខ្លីម៉ាក ( ប៉េអាម៉ាប់ ) ដោយបច្ចុប្បន្នសមត្ថកិច្ចទាំង២អង្គភាព កំពុងដុតដៃ ដុតជើង ក្នុងការស្រាវជ្រាវដើម្បីវែកមុខឃាតករ ដែលបានបាញ់សម្លាប់មនុស្សយ៉ាងឃោរឃៅបែបនេះ៕
Source: Kampuchea Thmey Daily
0 Comments