ឆ្មាំ​អ៊ីរ៉ង់​និយាយថា ខ្លួន​បានធ្វើ​សមយុទ្ធ​ឈូង​សមុទ្រ​ ខណៈ​ភាព​តានតឹង​ជាមួយ​អាមេរិក​កើនឡើង

ទីភ្នាក់ងារសារព័ត៌មាន​រដ្ឋ IRNA បាន​រាយការណ៍​ថា ឆ្មាំ​បដិវត្តន៍​អ៊ីរ៉ង់​បានបញ្ជាក់​កាលពី​ថ្ងៃអាទិត្យ​ថា ខ្លួន​បានរៀបចំ​សមយុទ្ធ​សង្គ្រាម​នៅ​ឈូង​សមុទ្រ​កាលពី​ប៉ុន្មាន​ថ្ងៃមុន​ ដោយ​និយាយថា ពួកគេ​មានបំណង “​ប្រឈមមុខ​នឹង​ការ​គំរាមកំហែង​ដែល​អាច​កើតមាន​” ពី​សំណាក់​សត្រូវ។

ក្រុមមន្ត្រី​អាមេរិក​បាន​ប្រាប់​រ៉​យ​ទ័​រ​កាល​ពីថ្ងៃ​ព្រហស្បតិ៍​មុន​ថា សហរដ្ឋអាមេរិក​ជឿថា អ៊ីរ៉ង់​បានចាប់ផ្តើម​ធ្វើ​លំ​ហាត់​សមយុទ្ធ​ជើង​ទឹក​នៅក្នុង​ឈូង​សមុទ្រ​ដែល​ទំនងជា​ផ្លាស់ប្តូរ​ពេលវេលា​នៃ​សមយុទ្ធ​ប្រចាំឆ្នាំ​ចំពេល​មាន​ភាព​តានតឹង​កាន់តែខ្លាំង​ឡើង​ជាមួយ​ទីក្រុង​វ៉ាស៊ីនតោន​។​

អ្នកនាំពាក្យ​ឆ្មាំ​បដិវត្តន៍​លោក Ramezan Sharif បាន​និយាយថា “​សមយុទ្ធ​នេះ​ត្រូវបាន​ធ្វើឡើង​ក្នុង​គោលបំណង​ដើម្បី​ត្រួតពិនិត្យ​និង​ការពារ​សុវត្ថិភាព​ផ្លូវទឹក​អន្តរជាតិ​និង​ស្ថិតក្នុង​ក្របខ័ណ្ឌ​នៃ​កម្មវិធី​សមយុទ្ធ​យោធា​ប្រចាំឆ្នាំ​របស់​ឆ្មាំ​បដិវត្តន៍​”​។​

បញ្ជាការ​កណ្តាល​របស់​យោធា​អាមេរិក​កាលពី​ថ្ងៃ​ពុធ​បាន​បញ្ជាក់ថា ខ្លួន​បាន​មើលឃើញ​សកម្មភាព​របស់​កងទ័ព​ជើង​ទឹក​អ៊ីរ៉ង់​កំពុង​កើនឡើង​។ សកម្មភាព​នេះ​បាន​ពង្រីក​ទៅដល់​ច្រក​សមុទ្រ Hormuz ដែលជា​ផ្លូវទឹក​ដ៏​សំខាន់​សម្រាប់​ការដឹកជញ្ជូន​ប្រេង​ដែល​ឆ្មាំ​បដិវត្តន៍​គំរាម​បិទ​។​
​
មេបញ្ជាការ​ឆ្មាំ​លោក Mohammad Ali Jafari បាន​សម្តែង​ការពេញចិត្ត​ចំពោះ​ការអនុវត្ត​ប្រកបដោយ​ជោគជ័យ​នៃ​សមយុទ្ធ​កងទ័ពជើងទឹក​របស់​ឆ្មាំ​ដោយ​លោក​បាន​សង្កត់ធ្ងន់​លើ​តម្រូវការ​នៃ​ការថែរក្សា​និង​បង្កើន​ការត្រៀមខ្លួន​ការពារជាតិ​និង​សន្តិសុខ​នៃ​ឈូង​សមុទ្រ​និង​ច្រក​សមុទ្រ Hormuz ហើយ​ដើម្បី​ប្រឈមមុខ​នឹង​ការគំរាមកំហែង​និង​សកម្មភាព​ផ្សងព្រេង​របស់​សត្រូវ​។​
​
មន្ត្រី​អាមេរិក​មួយរូប​ដែល​និយាយ​ក្នុង​លក្ខខណ្ឌ​អនាមិក​បាន​លើកឡើងថា នាវា​ជាង​១០០​គ្រឿង​បាន​ចូលរួម​នៅក្នុង​សមយុទ្ធ​នេះ​រួមទាំង​ទូក​តូចៗ​ផងដែរ​។​
​
មន្ត្រី​អាមេរិក​បាន​និយាយថា ការធ្វើ​សមយុទ្ធ​នេះ​បាន​បង្ហាញថា​ត្រូវបាន​ធ្វើឡើង​ដើម្បី​ផ្ញើ​សារ​ទៅកាន់​ទីក្រុង​វ៉ាស៊ីនតោន​ដែល​កំពុង​បង្កើន​សម្ពាធ​សេដ្ឋកិច្ច​និង​ការទូត​របស់ខ្លួន​លើ​ទីក្រុង​តេ រ៉ង់​។​
​
អ៊ីរ៉ង់​មានការ​ខឹងសម្បា​យ៉ាងខ្លាំង​ចំពោះ​សេចក្ដីសម្រេច​របស់​ប្រធានាធិបតី​អាមេរិក​លោក Donald Trump ក្នុងការ​ដកខ្លួន​ចេញពី​កិច្ចព្រមព្រៀង​អន្ដរជាតិ​មួយ​ស្តីពី​កម្មវិធី​នុយក្លេអ៊ែរ​របស់​អ៊ីរ៉ង់​
​និង​ការដាក់ទណ្ឌកម្ម​ឡើងវិញ​លើ​ទីក្រុង​តេ​រ៉ង់​។ មន្ត្រីជាន់ខ្ពស់​អ៊ីរ៉ង់​បាន​ព្រមាន​ថា ប្រទេស​នេះ​នឹងមិន​ងាយ​បន្ទន់ខ្លួន​ទៅតាម​យុទ្ធនាការ​ថ្មី​របស់​សហរដ្ឋអាមេរិក​ដើម្បី​រារាំង​ការនាំចេញ​ប្រេង​ដ៏​សំខាន់​របស់​អ៊ីរ៉ង់​នោះទេ​៕ REUTERS

​

Source: Kampuchea Thmey Daily