ភ្នំពេញ ៖ យុវជន២នាក់បានរងរបួស ព្រោះតែជួបគ្រោះថ្នាក់ចរាចរណ៍មួយ បង្កឡើងរវាងរថយន្តតាក់ស៊ី ម៉ែត្របើកឆ្លងផ្លូវ មិនប្រុងប្រយ័ត្នក៏បុកម៉ូតូពេញទំហឹងកាលពីម៉ោង២និង៣០នាទី រំលងអធ្រាត្រឈានចូលថ្ងៃទី១៣ ខែសីហា ឆ្នាំ២០១៨ ស្ថិតនៅតាមបណ្តោយផ្លូវព្រះនរោត្តម កែងផ្លូវ២២២ សង្កាត់បឹងរាំង ខណ្ឌដូនពេញ។
ប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេឃើញរថយន្តព្រូសមួយគ្រឿង ជារថយន្តតាក់ស៊ីម៉ែត្រ ពណ៌សលាយក្រហម និងខៀវ ពាក់ស្លាកលេខភ្នំពេញ 2AQ-3514 បានធ្វើដំណើរតាមបណ្តោយផ្លូវព្រះនរោត្តមឆ្លង ទៅផ្លូវ២២២ ស្រាប់តែមានម៉ូតូ ម៉ាកស្កូបពី ពណ៌ប្រផេះមួយគ្រឿង ពាក់ស្លាកលេខភ្នំពេញ 1CL-1112 បើកតាមបណ្តោយផ្លូវព្រះនរោត្តម ទិសដៅពីជើងមកត្បូង ក្នុងល្បឿនលឿនពេកក៏បានបុកជាមួយរថយន្តតាក់ស៊ីម៉ែត្រនោះពេញទំហឹង បណ្តាលឲ្យបុរស២នាក់រងរបួសធ្ងន់ ត្រូវបញ្ជូនទៅមន្ទីពេទ្យ រីឯរថយន្ត និងម៉ូតូរងការខូចខាតយ៉ាងដំណំ។
ប្រភពព័ត៌មានបានបន្តទៀតថា ក្រោយពេលកើតហេតុសមត្ថកិច្ចជំនាញ បានចុះមកដល់ទីតាំងកន្លែងកើតហេតុ ធ្វើការវាស់វែង យករថយន្ត និងម៉ូតូយកទៅរក្សាទុក នៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ ដើម្បីរង់ចាំភាគីទាំងសងខាងមកដោះស្រាយទៅតាមនីតិវិធីច្បាប់៕
Source: Kampuchea Thmey Daily
0 Comments