ភ្នំពេញ ៖ មុខសញ្ញាធ្លាប់ជាប់គុកពីបទប្លន់ម៉ូតូ និង ជួញដូរគ្រឿងញៀនចំនួន៣នាក់ ត្រូវបានកម្លាំងសមត្ថកិច្ចនគរបាលប៉ុស្តិ៍ស្រះចកឃាត់ខ្លួននៅថ្ងៃអាទិត្យ ១កើត ខែស្រាពរណ៍ ឆ្នាំច សំរឹទ្ធស័ក ព.ស២៥៦២ ត្រូវនឹងថ្ងៃទី១២ ខែសីហា ឆ្នាំ២០១៨ វេលាម៉ោង១៤ និង៣០នាទី ខណៈពេលពួកគេធ្វើសកម្មភាពឆក់ទ្រព្យសម្បត្តិអ្នកដំណើរ។
កម្លាំងប៉ុស្តិ៍នគរបាលរដ្ឋបាលស្រះចក នៃអធិការដ្ឋាននគរបាលខណ្ឌដូនពេញឲ្យដឹងថា ជនសង្ស័យត្រូវឃាត់ខ្លួនពីបទលួចមានស្ថានទម្ងន់ទោសប្រើអំពើហិង្សា(ជិះម៉ូតូឆក់ទូរស័ព្ទដៃ) នៅចំណុចមុខហាងយីហោថាយជី ផ្លូវលេខ៨៤កែងផ្លូវលេខ៧៥ ភូមិ០៩ សង្កាត់ស្រះចក ខណ្ឌដូនពេញ រាជធានីភ្នំពេញ។
សមត្ថកិច្ចបានឲ្យដឹងទៀតថា អត្តសញ្ញាណជនសង្ស័យទី១.ឈ្មោះ ជួន បញ្ញា ភេទប្រុស អាយុ២៨ឆ្នាំ ជនជាតិខ្មែរ មុខរបរ មិនពិតប្រាកដ ស្នាក់នៅផ្ទះជួល សង្កាត់ទួលសង្កែ ខណ្ឌឬស្សីកែវ រាជធានីភ្នំពេញ ជាអ្នកបើកម៉ូតូ (ឃាត់ខ្លួន)ទី២.ឈ្មោះ វៀងទ្រី មីលិន ភេទស្រី អាយុ២២ឆ្នាំ ជនជាតិវៀតណាម មុខរបរ មិនពិតប្រាកដ ស្នាក់នៅផ្ទះជួល ផ្លូវរថភ្លើង សង្កាត់ទួលសង្កែ ខណ្ឌឫស្សីកែវ រាជធានីភ្នំពេញ ជាអ្នកឆក់ទូរស័ព្ទដៃ (ឃាត់ខ្លួន) ទី៣.ឈ្មោះ សរ រក្សា ភេទប្រុស អាយុ២២ឆ្នាំ មុខរបរមិនពិតប្រាកដ ស្នាក់នៅផ្ទះជួល សង្កាត់ស្រះចក ខណ្ឌដូនពេញ រាជធានីភ្នំពេញ ជាអ្នករួមដំណើរ(ឃាត់ខ្លួន)។ ចំណែកវត្ថុតាងចាប់យករួមមានម៉ូតូមួយគ្រឿងម៉ាក viva ពណ៌ខ្មៅ ពាក់ស្លាកលេខ ភ្នំពេញ 1AI-5414 លេខតួ និងលេខម៉ាស៊ីន១៥០៣២៥(ជារបស់ជនសង្ស័យឈ្មោះជួន បញ្ញា)ទូរស័ព្ទដៃមួយគ្រឿងម៉ាក Iphone5 ពណ៌ទឹកប្រាក់(ជារបស់ជនរងគ្រោះ)។
ជនរងគ្រោះឈ្មោះ ឆេង ចិន្តា ភេទស្រី អាយុ៣១ឆ្នាំ ជនជាតិខ្មែរ មុខរបរ បុគ្គលិកហាងយីហោថាយជី ទីលំនៅផ្ទះជួល ផ្លូវលេខ៦៥ ភូមិ១០ សង្កាត់ស្រះចក ខណ្ឌដូនពេញ រាជធានីភ្នំពេញ។
យោងតាមចម្លើយសារភាពរបស់ក្រុមជសង្ស័យ២នាក់ ក្នុងចំណោមគ្នា៣នាក់នោះមានឈ្មោះជួន បញ្ញានិងវៀងទ្រី មីលិន ភេទស្រី បានឲ្យដឹងថា ពួកគេធ្លាប់ជាប់គុកពីបទប្លន់ម៉ូតូនិងជួញដូរគ្រឿងញៀន។ ហើយក្រោយពីពួកគេបានចេញពីគុកហើយនោះក៏ត្រូវកម្លាំងសមត្ថកិច្ចចាប់ពួកគេទៀតខណៈធ្វើសកម្មភាពឆក់ទូរស័ព្ទដៃរបស់ជនរងគ្រោះលើកនេះទៀត។
បច្ចុប្បន្នជនសង្ស័យកំពុងកសាងសំណុំរឿងបញ្ជូនទៅអធិការដ្ឋាននគរបាលខណ្ឌដូនពេញដើម្បីចាត់ការតាមនីតិវិធី៕
Source: Kampuchea Thmey Daily
0 Comments