ភ្នំពេញ ៖ ឪពុកដឹកកូនស្រីចេញពីរៀន ស្រាប់តែមែកក្ងោកងាប់ដ៏ធំមួយមែក បានបាក់ធ្លាក់ប៉ះបណ្ដាលឲ្យរងរបួសទាំង២នាក់ កាលវេលាម៉ោង១១និង៣០នាទី ថ្ងៃទី៦ ខែសីហា ឆ្នាំ២០១៨ ត្រង់ចំណុចក្បែរសាលាបឋមសិក្សាចតុមុខ ស្ថិតនៅតាមបណ្តោយផ្លូវ២១៤ ក្នុងសង្កាត់ជ័យជំនះ ខណ្ឌដូនពេញ។
ប្រភពព័ត៌មានពីប្រជាពលរដ្ឋជិតខាង បានប្រាប់ឲ្យដឹងថា នៅមុនពេលកើតហេតុគេឃើញជនរងគ្រោះជាឪពុកជិះម៉ូតូមួយគ្រឿងម៉ាកហុងដា គុបសេ៩០ ពណ៌ទឹកប៊ិច ពាក់ស្លាកលេខ ភ្នំពេញ ១CB-៥៨៦៦ដឹកកូនស្រីតូចចេញពីរៀនសាលាឯកជនធ្វើដំណើរតាមបណ្ដោយផ្លូវលេខ២១៤ ទិសដៅពីលិចទៅកើត ខណៈពេលមកដល់ចំណុចកើតហេតុ ក៏ស្រាប់តែមែកក្ងោកងាប់ដ៏ធំមួយមែកបានបាក់ប្រាវប៉ះពួកគាត់ទាំងពីរនាក់ឪពុកកូននោះ ដួលម៉ូតូត្រូវរងរបួសស្រាលផងដែរ។
ប្រភពដដែលបានបន្តទៀតថា ក្នុងហេតុការណ៍នោះ ប្រសិនបើឪពុក និង កូនទាំង២នាក់ជិះយឺតតែបន្តិចប្រាកដជាសង្កត់រងរបួសធ្ងន់ទាំង២នាក់ជាក់ជាមិនខានឡើយ។ នេះក៏ចាត់ទុកជាសំណាងមួយផងដែរ ដែលមិនបង្កគ្រោះថ្នាក់អាយុជីវិតនោះ។
ពាក់ព័ន្ធនឹងការរលំ ឬបាក់ដើមឈើ ដែលតែងតែបង្កការគ្រោះថ្នាក់ញឹកញាប់ដល់ប្រជាពលរដ្ឋឬក៏ខូចខាតទ្រព្យសម្បត្តិគ្មានអ្នកទទួលខុសត្រូវនោះដែរ ប្រជាពលរដ្ឋក៏បានទទូចស្នើសុំឲ្យខាងមន្ទីរជំនាញគួរណាចុះកាប់មែកឈើធំៗចេញឲ្យអស់ទៅ ព្រោះមែកឈើទាំងនោះ អាចបង្កគ្រោះថ្នាក់ជាយថាហេតុណាមួយទៀត ពេលដែលមេឃធ្លាក់ខ្យល់បោកបក់ខ្លាំងនោះ។
គួរបញ្ជាក់ថា មែកឈើ ដែលបាក់ធ្លាក់ត្រូវរបួសពីរនាក់ឪពុកនិងកូននោះដែរ ត្រូវបានអាជ្ញាធរមូលដ្ឋាន ចុះមកចាត់ចែងអារកាត់ចេញដើម្បីកុំឲ្យស្ទះចរាចរយូរពេកផងដែរ។ រីឯឪពុក ដែលរងរបួសស្រាលនោះ ក៏នាំកូនទៅពេទ្យដើម្បីព្យាបាលរបួសដែរ៕
Source: Kampuchea Thmey Daily
0 Comments