កំពង់ចាម ៖ ជនសង្ស័យ មិនស្គាល់អត្តសញ្ញាណម្នាក់ ដែលបានគាស់ទ្វារបន្ទប់ លួចយកម៉ូតូប្រជាពលរដ្ឋ ហើយគេចខ្លួនបាត់ត្រូវបានកម្លាំងសមត្ថកិច្ចស្រាវជ្រាវ តាមចាប់ខ្លួន។
សមត្ថកិច្ច បានឲ្យដឹងថា នៅថ្ងៃទី២ ខែសីហាឆ្នាំ២០១៨ នៅវេលាម៉ោង៩ នគរបាលប៉ុស្តិ៍បានទទួលពាក្យបណ្ដឹងពីឈ្មោះអ៊ីត សុខនីម ភេទស្រី អាយុ ៣២ឆ្នាំ ជនជាតិខ្មែរ មុខរបរកសិករ ប្តីឈ្មោះ ធី ស៊ីថា អាយុ ៤០ឆ្នាំ មានទីលំនៅភូមិស្រក ឃុំស្រក ស្រុកកំពង់សៀម ខេត្តកំពង់ចាម ដែលបាន ប្ដឹងពីជនមិនស្គាល់អត្តសញ្ញាណបានធ្វើសកម្មភាពលួចយកម៉ូតូចំនួន 01 គ្រឿងម៉ាកហុងដា សេ១២៥ ស៊េរី២០១៨ ពណ៌ខ្មៅ ជាម៉ូតូបង់រំលស់ ដែលខ្លួនទុកនៅក្នុងបន្ទប់ក្រោមផ្ទះ(បន្ទប់ធ្វើពីដែកស័ង្កសីបាំងជុំវិញ) ដោយពុំបានចាក់សោបិទត្រឹមត្រូវទេ គឺគ្រាន់តែចាក់សោ សូឡុចទ្វារបន្ទប់។
ប៉ូលិសបានបញ្ជាក់ថា ពុំមានស្លាកស្នាមគាស់ ឬ កាត់សោ ស្រយូវទ្វារទេ តែបាត់ មេសោសូឡិចមិនឃើញនៅកន្លែងកើតហេតុ។
ជនរងគ្រោះបានបញ្ជាក់ឲ្យដឹងថា នៅពាក់កណ្តាលអធ្រាត្រ ថ្ងៃកើតហេតុគាត់បានឮសូរសម្លេងឆ្កែព្រុសនៅចន្លោះម៉ោង២៤ ភ្លាមនោះគាត់បានងើបចុះមកដីពិនិត្យមើលម៉ូតូឃើញម៉ូតូរបស់ខ្លួននៅដដែលពុំមានបាត់បង់ទេ ហើយជនរងគ្រោះបានចូលទៅដេកវិញ។
រហូតដល់ម៉ោង១និង៣០នាទីរំលងអធ្រាត្រជនរងគ្រោះបានមកអើតមើលតាមប្រហោងរនាបផ្ទះម្តងទៀត ក៏ឃើញទ្វារបន្ទប់ក្រោមផ្ទះចំហ ក៏ចុះមកពិនិត្យមើលម៉ូតូរបស់ខ្លួនស្រាប់តែបាត់ម៉ូតូរបស់ខ្លួនតែម្ដង។
បន្ទាប់ពីទទួលបានព័ត៌មាននិងបណ្ដឹងភ្លាម កម្លាំងសមត្ថកិច្ចជំនាញការិយាល័យនគរបាលព្រហ្មទណ្ឌកំរិតស្រាលសហការជាមួយកម្លាំងជំនាញអធិការដ្ឋាននគរបាលស្រុកកំពង់សៀមនិងកម្លាំងសមត្ថកិច្ចនគរបាល ប៉ុស្តិ៍ឃុំស្រក បានចាត់វិធានការជាបន្ទាន់ចុះដល់ទីកន្លែងកើតហេតុធ្វើការពិនិត្យស្រាវជ្រាវនិងរៀបចំកសាងឯកសារសំណុំរឿងតាមនីតិវិធី៕
Source: Kampuchea Thmey Daily
0 Comments