រដ្ឋមន្ត្រី​ច្រើន​នាក់​ ស្នើ​លាលែង​ពី​តំណែង ​ខណៈ​វិបត្តិ​នយោបាយ​អូស្ត្រាលី​កាន់តែ​ជ្រៅ

រដ្ឋមន្ត្រី​យ៉ាងតិច​១០​នាក់​ បាន​ដាក់​សំណើ​លាលែង​ពី​តំណែង​របស់​ខ្លួន​ស្រប​ពេល​ ដែល​វិបត្តិ​ភាពជា​អ្នកដឹកនាំ​ក្នុង​នយោបាយ​របស់​ប្រទេស​អូស្ត្រាលី​កាន់តែ​ជ្រៅ​នៅ​ថ្ងៃ​ពុធ​ ហើយ​បញ្ហា​ប្រឈម​មួយទៀត​ប្រឆាំង​នឹង​លោកនាយក​រដ្ឋមន្ត្រី Malcolm Turnbull ហាក់ដូចជា​ជៀស​មិន​រួច។

មេដឹកនាំ​ដែលមាន​ជម្លោះ​រូបនេះ​បាន​រួច​ផុតពី​ការបោះឆ្នោត​មួយ​ដើម្បី​ទម្លាក់​គាត់​ដោយ​រដ្ឋមន្ត្រី​ក្រសួងមហាផ្ទៃ​របស់គាត់​គឺ​លោក Peter Dutton កាលពី​ថ្ងៃ​អង្គារ​ជាមួយនឹង​សំឡេងគាំទ្រ​របស់​គណបក្ស​សេរីនិយម​៤៨​ទល់នឹង​៣៥​។​

វា​បាន​កើតឡើង​បន្ទាប់ពី​ការ​ស្ទាបស្ទង់​មតិ​មិនល្អ​អស់​រយៈពេល​ច្រើន​ខែ​និង​ការបះបោរ​មួយ​ដោយ​អ្នកនយោបាយ​សេរីនិយម​កាលពី​ថ្ងៃ​ចន្ទ​ប្រឆាំងនឹង​ផែនការ​របស់គាត់​ក្នុងការ​ជួសជុល​គោលដៅ​បញ្ចេញ​ជាតិ​កាបូន​នៅក្នុង​ច្បាប់​ស្រប​ពេលដែល​តម្លៃ​ថាមពល​កើនឡើង​។​
​
ទោះបីជា​លោក Turnbull ទទួល​ជ័យជំនះ​ក៏ដោយ វា​បាន​បង្ហាញថា សមាជិកសភា​ជាច្រើន​នាក់​របស់គាត់​មិន​ចង់​ឲ្យ​គាត់​ធ្វើជា​មេដឹកនាំ​របស់​ពួកគេ​ទេ​ហើយ​លោក Dutton បានធ្វើការ​នៅ​ថ្ងៃ​ពុធ​ដើម្បី​បង្កើន​ការគាំទ្រ​បន្ថែមទៀត​សម្រាប់​តំណែង​កំពូល​។​
​
យោងតាម​បណ្តាញ​ផ្សព្វផ្សាយ ABC និង Sky News បាន​ឲ្យ​ដឹងថា លោក Dutton បាន​លាលែង​ពី​តំណែង​គណៈរដ្ឋមន្ត្រី​បន្ទាប់ពី​ការប៉ុនប៉ង​ភាពជា​អ្នកដឹកនាំ​របស់គាត់​ត្រូវ​បរាជ័យ​ហើយ​មាន​រដ្ឋមន្ត្រី​យ៉ាងតិច​៩​នាក់​ផ្សេងទៀត​ក៏​ស្នើ​លាលែង​ផងដែរ​។ ពួកគេ​រួមមាន​ទាំង​រដ្ឋមន្ត្រី​ក្រសួងសុខាភិបាល​និង​រដ្ឋមន្ត្រី​ពាណិជ្ជកម្ម​។​
​
មកទល់ពេលនេះ លោក Turnbull បាន​ទទួលយក​ការលាលែង​ពី​តំណែង​ត្រឹម​ពីរ​នាក់​ប៉ុណ្ណោះ​គឺ​លោក Dutton និង​រដ្ឋមន្ត្រីក្រសួង​អភិវឌ្ឍន៍​អន្តរជាតិ​លោកស្រី Concetta Fierravanti-Wells ។​
​
ដោយមាន​ការគាំទ្រ លោក Dutton បាន​ព្យាយាម​បន្ទន់​រូបភាព​ជា​បុរស​រឹងទទឹង​របស់គាត់​ដូចជា​រដ្ឋមន្ត្រី​ក្រសួងមហាផ្ទៃ​និង​រដ្ឋមន្ត្រី​ក្រសួងអន្តោប្រវេសន៍​ហើយនឹង​ដាក់ចេញ​នូវ​របៀបវារៈ​គោលនយោបាយ​របស់គាត់​។​
​
អតីតមន្ត្រី​ប៉ូលិស​ដែល​កម្រ​ញញឹម​រូបនេះ​មិនបាន​លាក់បាំង​ពី​បំណង​ចង់​គ្រប់គ្រង​ប្រទេស​នេះនោះ​ទេ​។ លោក​បាន​បន្ថែមថា លោក​គិតថា​លោក​អាច​ឈ្នះ​ការបោះឆ្នោត​នៅ​ពាក់កណ្តាល​ឆ្នាំ​ក្រោយនេះ​ក្នុងនាម​ជា​មេដឹកនាំ​ប្រឆាំងនឹង​លោក Bill Shorten ដែលជា​មេដឹកនាំ​គណបក្សប្រឆាំង​គឺ​គណបក្ស​ការងារ​។​
​
ប្រសិនបើ​ក្លាយជា​នាយករដ្ឋមន្ត្រី​មែន​នោះ លោក Dutton បាន​និយាយថា លោក​នឹង​ផ្តោតលើ​ការកាត់បន្ថយ​ថ្លៃ​អគ្គិសនី កាត់បន្ថយ​ការធ្វើ​អន្តោប្រវេសន៍​ដើម្បី​បន្ធូរ​សម្ពាធ​ប្រជាជន​និង​បង្កើន​ការវិនិយោគ​ទឹក​ដើម្បី​ជួយ​កសិករ​ដែល​រងគ្រោះ​ដោយសារ​គ្រោះរាំងស្ងួត​៕ AFP

​

Source: Kampuchea Thmey Daily