បាត់ដំបង ៖ យុវជនម្នាក់ដែលបានបើកបរម៉ូតូទាំងកណ្តាលអធ្រាត្រ ត្រូវបានរថយន្តបុកពេញទំហឹង បណ្តាលអោយប៉ើងរំលងកាបូ ទៅធ្លាក់លើទ្រុងរថយន្ត ព្រមទាំងបានទៅជាមួយរថយន្តប្រមាណជាង ២០ គីឡូម៉ែត្រ ទើបម្ចាស់រថយន្តចតទុកចោលដើម្បីរត់គេចខ្លួនដោយមិនបានដឹងថា ការបើករត់របស់ខ្លួននាំយកទាំងសពទៅជាមួយផងនោះទេ។
ហេតុការណ៍ដ៏កម្រនេះ បានកើតឡើង នាថ្ងៃទី៦ ខែសីហា ឆ្នាំ២០១៨ វេលាម៉ោង ៩និង ៥ នាទី យប់ នៅចំណុច ភូមិថ្មី ឃុំព្រៃតូច ស្រុកមោងឫស្សី ខេត្តបាត់ដំបង តាមបណ្តោយផ្លូវជាតិលេខ៥ ចន្លោះគីឡូម៉ែត្រ លេខ ២៦០ និង ២៦១ រវាងរថយន្តមួយគ្រឿង ម៉ាកនីសាន់ ពណ៌ទឹកប្រាក់ បាត់ដំបង 2A-4820 ជាមួយនឹង ម៉ូតូមួយគ្រឿង ម៉ាកហុងដាឃ្លីក ពណ៌ស ពាក់ស្លាកលេខ បាត់ដំបង1AA. 8759 ក្នុងទិសដៅច្រាស់គ្នា។
តាមការអះអាងពីមន្ត្រីប៉ុស្តិ៍បានអោយដឹងថា នៅមុនពេលកើតហេតុ គឺគេសង្ស័យថា ម៉ូតូជនរងគ្រោះ ដែលបានបើកបរក្នុងទិសដៅពីបាត់ដំបង ទៅកាន់ភ្នំពេញ អាចទំនងជាមានការឡើងជែងទៅនឹងអ្វីមួយ ទើបធ្វើអោយម៉ូតូជ្រែឆ្លងគំនូសលឿងចូលទៅខាងឆ្វេង ហើយបានបុកជាមួយនឹងរថយន្ត ដែលកំពុងបើកមកពីមុខ បណ្តាលអោយអ្នកបើកបរម៉ូតូហោះផ្លោងរំលងកាបូរថយន្តទៅធ្លាក់ចូលក្នុងឃ្លុបខាងក្រោយ ស្លាប់នៅក្នុងគូទរថយន្តនោះតែម្តង។
សមត្ថកិច្ចបានបន្តថា ភ្លាមៗនោះដែរ អ្នកបើកបររថយន្តមិនបានឈប់ទេ គេបានបន្ថែមល្បឿន ឆ្ពោះទៅកាន់ក្រុងបាត់ដំបង ប៉ុន្តែការបើករត់នេះ បានប្រមាណជាង ២០ គីឡូម៉ែត្រ ប៉ុណ្ណោះ គឺទៅដល់ត្រង់ចំណុចភូមិពុកឆ្មា ឃុំអន្លង់វិល ស្រុកសង្កែ ទើបគេបានទុករថយន្តចោល រួចរត់គេចខ្លួនបាត់ស្រមោលទាំងយប់តែម្តង លុះក្រោយពេលសមត្ថកិច្ចតាមប្រមាញ់ ក៏បានប្រទះឃើញរថយន្តដែលគេចតទុកចោល ព្រមទាំងមាន សពជនរងគ្រោះជាប់តាមរថយន្តមកជាមួយផង។
បច្ចុប្បន្ន រថយន្តត្រូវបានសមត្ថកិច្ចយកទៅរក្សាទុកនៅការិយាល័យចរាចរណ៍ផ្លូវគោកខេត្ត រីឯម៉ូតូគឺរក្សាទុកនៅប៉ុស្តិ៍ នគរបាលរដ្ឋបាលឃុំព្រៃតូច ចំណែកសពជនរងគ្រោះ ក្រោយមកទើបដឹងថាមានឈ្មោះ ឡាប សាមាន ភេទប្រុស អាយុ២២ឆ្នាំ រស់នៅភូមិចកធំ ឃុំកកោះស្រុកមោងឫស្សី ដោយកំលាំងបានប្រគល់ទៅអោយក្រុមគ្រួសារ ដើម្បីយកទៅធ្វើបុណ្យហើយ៕
Source: Kampuchea Thmey Daily
0 Comments