ប៉ូលិស​ទទួល​បាន​ពេលវេលា​បន្ថែមទៀត​ដើម្បី​ឃុំឃាំង​បុរស​ម្នាក់​ដែល​ត្រូវបាន​ចាប់ខ្លួន​ជុំវិញ​ការវាយប្រហារ​នៅ​ចក្រភព​អង់គ្លេស

ប៉ូលិស​អង់គ្លេស​កាលពី​ថ្ងៃ​ពុធ​ បានទទួល​ពេលវេលា​បន្ថែមទៀត​ដើម្បី​សួរចម្លើយ​បុរស​ម្នាក់​ ដែល​ត្រូវបាន​ចាប់ខ្លួន​នៅ​ខាងក្រៅ​សភា​សម្រាប់​ការប៉ុនប៉ង​ឃាតកម្ម​ និង​សង្ស័យ​ចំពោះ​អំពើ​ភេរវកម្ម​បន្ទាប់ពី​រថយន្ត​មួយ​គ្រឿង​បាន​បុក​អ្នកជិះ​កង់​មុនពេល​បុក​របាំង​ការពារ។

​មនុស្ស​៣​នាក់​បាន​រងរបួស​នៅពេល​បុរស​វ័យ​២៩​ឆ្នាំ​ដែល​ត្រូវបាន​អ្នកសារព័ត៌មាន​ប្រាប់​ឈ្មោះថា Salih Khater បាន​បើករថយន្ត​លើ​ចិញ្ចើមផ្លូវ​ហើយ​បុក​អ្នកជិះ​កង់​មួយក្រុម​អំឡុងពេល​ព្រឹក​ដ៏​មមាញឹក​កាលពី​ថ្ងៃ​អង្គារ​នៅក្នុង​តំបន់ Westminster​។​
​
ប៉ូលិស​បាន​និយាយថា បុរស​ម្នាក់នេះ​ដែលជា​ជនជាតិ​អង់គ្លេស​ដើមកំណើត​ស៊ូដង់​គឺ​ត្រូវបាន​ចាប់ខ្លួន​លើ​ការសង្ស័យ​ពីបទ​ភេរវកម្ម​ប៉ុន្តែ​ឥឡូវនេះ​ត្រូវបាន​ចាប់ខ្លួន​ពីបទ​ប៉ុនប៉ង​ឃាតកម្ម​។​
​
អាជ្ញាធរ​បាន​បន្ថែមថា តុលាការ​តំបន់ Westminster បានអនុម័ត​ដីកា​មួយ​កាលពី​ថ្ងៃ​ពុធ​ដើម្បី​បន្ត​ឃុំខ្លួន​ជនសង្ស័យ​រហូតដល់​ថ្ងៃ​ចន្ទ​។​

BBC បាន​រាយការណ៍​ថា គាត់​បានមក​ប្រទេស​អង់គ្លេស​ក្នុងនាម​ជា​ជនភៀសខ្លួន​ម្នាក់​ហើយ​ត្រូវបាន​ផ្តល់​សិទ្ធិ​ជ្រកកោន​។ គាត់​ត្រូវបាន​ឃុំខ្លួន​នៅ​ប៉ុស្តិ៍​ប៉ូលិស​ទីក្រុង​ឡុង​ដ៍​ភាគខាងត្បូង​។​
​
មន្ត្រីប៉ូលិស​ប្រឆាំង​ភេរវកម្ម​លោក Neil Basu បាន​និយាយ​កាលពី​ថ្ងៃ​អង្គា​រថា ជនសង្ស័យ​មិនត្រូវ​ភ្នាក់ងារ​ស៊ើបការណ៍​សម្ងាត់​ស្គាល់​ទេ​ប៉ុន្តែ​ប្រព័ន្ធ​ផ្សព្វផ្សាយ​អង់គ្លេស​បាន​រាយការណ៍​ថា គាត់​ត្រូវបាន​ស្គាល់​ដោយ​ប៉ូលិស​មូលដ្ឋាន​។​
​
របាយការណ៍​បាន​ឲ្យ​ដឹងថា លោក Khater ជា​អ្នកគ្រប់គ្រង​ហាង​មួយ​នៅ​ទីក្រុង Birmingham ហើយ​បាន​សិក្សា​នៅ​សាកលវិទ្យាល័យ​វិទ្យាសាស្ត្រ​និង​បច្ចេកវិទ្យា​ស៊ូដង់​។ នេះ​បើតាម​ការលើកឡើង​ពី​ប្រភពពី​ទំព័រ Facebook របស់គាត់​។​
​
បងប្រុស​របស់គាត់​បា​ន​ពិពណ៌នា​ថា គាត់​ជា​មនុស្ស​ធម្មតា​ដែល​គ្មាន​គំនិត​ជ្រុលនិយម​និង​គ្មាន​ទំនាក់​ទំនងជា​មួយក្រុម​សាសនា​ណាមួយ​ឡើយ​។​
​
ទន្ទឹមនឹង​នេះដែរ លោក Abubakr Ibrahim ដែលជា​មិ​ត្ដម្នាក់​កាលពី​កុមារភាព​បាន​ប្រាប់​កាសែត The Times ថា “​គាត់​មិនមែនជា​ភេរវ​ករ​ទេ ខ្ញុំ​ធ្លាប់​ស្គាល់​គាត់​តាំងពី​តូច​ហើយ​គាត់​ជាម​នុស្ស​ល្អ​”៕ AFP

​

Source: Kampuchea Thmey Daily