ក្លិបបាល់ទាត់វិសាខា សមាជិកពានរង្វាន់លីគកំពូលកម្ពុជា (Metfone Cambodian League 2018) បានដាក់គោលដៅទៅរៀបចំកម្មវិធីចែករំលែកបទពិសោធន៍បាល់ទាត់នៅកីឡដ្ឋានទីរួមខេត្តបាត់ដំបង នៅថ្ងៃទី២៧ ខែសីហា ឆ្នាំ២០១៨ ខាងមុខ ហើយកម្មវិធីមួយនេះមានឈ្មោះថា«សប្បុរសធម៌ស្ដីពីកីឡាបាល់ទាត់»។
ប្រភពមកពីក្លិបកំពុងឈរចំណាត់ថ្នាក់លេខ៣ លីគកំពូលកម្ពុជា មួយនេះបានលើកឡើងថា ក្រៅពីគោលដៅចែករំលែកបទពិសោធន៍បាល់ទាត់ដល់កុមារនៅខេត្តបាត់ដំបង ក្រុមវិសាខា ក៏នឹងមានចែកសម្ភារៈកីឡា និងពង្រីកវិសាលភាពក្លិបវិសាខាទៅកាន់អ្នកគាំទ្រ ផងដែរ។ លោក ហុក សុចិត្រា អ្នកចាត់ការទូទៅរបស់ក្លិបបាល់ទាត់វិសាខា ធ្លាប់បានលើកឡើងថា «ការចែករំលែកបទពិសោធន៍បាល់ទាត់ជូនដល់កុមារនៅតាមខេត្ត ជាទិសដៅរបស់ក្លិប។ យើងមានទិសដៅ២គឺទី១ ជំរុញឲ្យក្លិបជាក្លិបអាជីព និងទី២គឺចូលរួមក្នុងការងារសង្គម។ នៅពេលក្លិបទំនេរគឺយើងចូលរួម។ យើងធ្វើនេះគឺគោលដៅ១ផ្តល់បទពិសោធន៍ឱ្យក្មេង ហើយការធ្វើនេះគឺជាបង្ហាញពីមូលដ្ឋានបាល់ទាត់»។
CNCC បានស្រង់សម្តីរបស់លោក ហុក សុជីវ័ន្ត ជុំវិញដំណើរទៅខេត្តបាត់ដំបង នេះថា «យើងចង់ផ្សព្វផ្សាយពីក្លិបបាល់ទាត់វិសាខាដើម្បីចូលរួមដឹកនាំក្មេងៗឲ្យស្គាល់ពីបាល់ទាត់ ដើម្បីចែកសម្ភារៈកីឡា និង សិក្សា ខ្លះៗដល់ពួកគាត់ និង ចង់ផ្សព្វផ្សាយពីក្លិបដល់តំបន់ថ្មីៗឲ្យគេស្គាល់ពីក្លិបវិសាខា ឲ្យបានច្រើន។ ចំណុចដែលសំខាន់នោះ គឺយើងធ្វើការងារសង្គមមួយដែលយើងនាំក្មេងៗមកលេងបាល់ទាត់បញ្ចៀសពីអំពើអបាយមុខផ្សេងៗ»។
តាមគម្រោងកម្មវិធីនេះអាចមានវត្តមានកុមារចូលរួមប្រមាណពីចន្លោះ១០០ទៅ២០០នាក់ និង ប្រព្រឹត្តទៅនៅវេលាម៉ោង៣និង៣០នាទីរសៀល។នេះជាលើកទី៣ហើយនៅឆ្នាំ២០១៨ នេះដែលក្លិបវិសាខា បានរៀបចំកម្មវិធីសប្បុរសធម៌ស្ដីពីកីឡាបាល់ទាត់នេះឡើង បន្ទាប់ពីបានរៀបចំនៅខេត្តព្រៃវែង ចំនួន២លើកដោយជោគជ័យអំឡុងខែមេសា និង កក្កដា កន្លងទៅនេះ៕
Source: Kampuchea Thmey Daily
0 Comments