រូបភាព​បង្ហាញថា កូរ៉េខាងជើង​បញ្ឈប់​ការរុះរើ​ទីតាំង​បាញ់​នុយក្លេអ៊ែរ

វិទ្យាស្ថាន​មួយ​នៅ​ទីក្រុង​វ៉ាស៊ីនតោន​បាន​រាយការណ៍​កាលពី​ថ្ងៃ​ពុធ​ថា រូបភាព​ផ្កាយរណប​កាលពី​សប្តាហ៍​មុន​បាន​បង្ហាញថា ប្រទេស​កូរ៉េខាងជើង​បាន​បញ្ឈប់​ការងារ​រុះរើ​កន្លែង​សាកល្បង​មី​ស៊ី​ល​នៅ​ដើមខែ​សីហា​ បើទោះបីជា​មានការ​សន្យា ​របស់​លោក​ប្រធានាធិបតី​សហរដ្ឋអាមេរិក ដូ​ណា​ល់ ត្រាំ នៅឯ​កិច្ចប្រជុំ​កំពូល​កាលពី​ខែមិថុនា​ក៏ដោយ។

គម្រោង 38 North បាន​និយាយថា រូបភាព​ផ្កាយរណប​នៃ​ស្ថានីយ៍​បាញ់​បង្ហោះ​ផ្កាយរណប Sohae ដែល​បាន​ថត​កាលពី​ថ្ងៃទី​១៦​ខែសីហា​បាន​បង្ហាញថា មិនមាន​សកម្មភាព​រុះ​រើ​សំខាន់​ទេ​ទាំង​នៅក្នុង​កន្លែង​សាកល្បង​ម៉ាស៊ីន​ឬ​ទីតាំង​បាញ់​បង្ហោះ​ចាប់តាំងពី​ថ្ងៃទី​៣​ខែសីហា​មក​។​

រដ្ឋមន្ត្រី​ក្រសួងការបរទេស​សហរដ្ឋអាមេរិក​លោក Mike Pompeo បាន​និយាយ​កាលពី​ខែ​មុន​ថា របាយការណ៍​ដែលថា កូរ៉េខាងជើង​បានចាប់ផ្តើម​រុះរើ​ទីតាំងនៅ Sohae គឺ​ស្រប​ជាមួយនឹង​ការប្តេជ្ញាចិត្ត​របស់​មេដឹកនាំ​កូរ៉េខាងជើង​លោក​គីម​ជុង​អ៊ុន​ដែល​បានធ្វើ​ឡើង​នៅឯ​កិច្ចប្រជុំ​កំពូល​មួយ​ជាមួយ​លោក​ត្រាំ​ក្នុងប្រទេស​សិង្ហ​បុរី​កាលពី​ថ្ងៃទី​១២​ខែមិថុនា​។​
​
របាយការណ៍​របស់ 38 North បាន​និយាយថា ការរីកចម្រើន​គួរ​ឲ្យ​កត់សម្គាល់​ក្នុងការ​រុះរើ​កន្លែង​ធ្វើតេស្ត​នេះ​ត្រូវបាន​ធ្វើឡើង​ចាប់ពី​ខែកក្កដា​ដល់​ដើមខែ​សីហា​ប៉ុន្តែ​បាន​បន្ថែមថា “​សមាសធាតុ​ជាច្រើន​ដែល​ត្រូវបាន​ដកចេញ​កាលពីមុន​គឺ​នៅតែ​ស្ថិត​លើដី​”​។​
​
របាយការណ៍​របស់ 38 North បាន​កើតឡើង​ចំពេល​មានការ​សង្ស័យ​យ៉ាងខ្លាំង​អំពី​ឆន្ទៈ​របស់​កូរ៉េខាងជើង​ក្នុងការ​ធ្វើតាម​ការទាមទា​រ​របស់​សហរដ្ឋអាមេរិក​ដើម្បី​ឲ្យ​ខ្លួន​បោះបង់ចោល​អាវុធ​នុយក្លេអ៊ែរ​។​
​ទោះបីជា​យ៉ាងណាក៏ដោយ មិនមាន​ការអធិប្បាយ​ភ្លាមៗ​ពី​សេត​វិមាន​ទេ​។​
​អង្គការ​ឃ្លាំមើល​នុយក្លេអ៊ែរ​របស់ UN គឺ​ទីភ្នាក់ងារ​ថាមពល​អា​តូ​មិ​ក​អន្តរជាតិ (IAEA) បាន​និយាយ​នៅក្នុង​របាយការណ៍​មួយ​កាលពី​ថ្ងៃ​ចន្ទ​ថា ខ្លួន​ពុំបាន​រកឃើញ​សញ្ញា​ណាមួយ​ដែលថា​កូរ៉េខាងជើង​បាន​បញ្ឈប់​សកម្មភាព​នុយក្លេអ៊ែរ​របស់ខ្លួន​នោះទេ​។​
​
នៅ​ប្រទេស​សិង្ហ​បុរី លោក​គីម​បាន​យល់ស្រប​ក្នុងន័យ​ទូលំទូលាយ​ដើម្បី​ធ្វើការ​ឆ្ពោះទៅរក​ការលុបបំបាត់​អាវុធ​នុយក្លេអ៊ែរ​នៅ​ឧបទ្វីប​កូរ៉េ​ប៉ុន្តែ​លោក​មិនបាន​ផ្តល់​សញ្ញា​ថា លោក​នឹង​សុខចិត្ត​បោះបង់ចោល​អាវុធ​របស់លោក​ដោយ​ឯកតោភាគី​នោះទេ​៕ REUTERS

​

Source: Kampuchea Thmey Daily