ហួន សុខនីម អ្នកប្រដាល់ក្លិបមហិទ្ធរិទ្ធតាដំបងដែក ត្រូវគេផ្គូផ្គងអោយជួបប្រកួតជាមួយថន វាសនា អ្នកប្រដាល់ក្លិបនាគរាជមានជ័យ នាយប់ថ្ងៃសុក្រទី២៤ ខែសីហា ឆ្នាំ២០១៨នេះ នៅលើសង្វៀនបាយ័នស្ទឹងមានជ័យ។
ពីរនាក់នេះ មិនធ្លាប់ជួបគ្នាទេកន្លងមក។ ដូច្នេះ ជំនួបលើកនេះ គឺជាការជួបគ្នាលើកដំបូង។ ពួកគេទាំងពីរ ប្រកួតគ្នាក្នុងប្រភេទទម្ងន់៦៣,៥០០គីឡូក្រាម។
ថន វាសនា ជាអ្នកប្រដាល់មានឈ្មោះបោះសំឡេងគួរសមដែរ តែគេជាអ្នកប្រដាល់ដែលមានចិត្តតូច។ ជាទម្លាប់របស់ថន វាសនា គេឡើងប្រកួតច្រើនវ៉ៃមិនយោគយល់អ្វីនោះទេ។ ការប្រកួតចុងក្រោយ(២១កក្កដា២០១៨)កន្លងទៅនេះ គេបានវាយចាញ់សុខ សុវណ្ណ អ្នកប្រដាល់ជើងខ្លាំងក្លិបកងពលធំអន្តរាគមន៍លេខ២ ដោយពិន្ទុ ។
ចំពោះហួន សុខនីមវិញ ជាអ្នកប្រដាល់ជើងចាស់ ដោយត្រូវបានអ្នកស្នេហាកីឡាប្រដាល់ចាប់អារម្មណ៍ ដោយសារតែការប្រកួតរបស់គេល្អ ហើយលទ្ធផលឈ្នះច្រើនជាងចាញ់ ។
ទោះជាគេមានវ័យច្រើនជាង ថន វាសនា បន្តិចក្តី សម្រាប់ស្នៀតប្រដាល់របស់ហួន សុខនីម មិនជាចាញ់វាសនានោះទេ ។ សំរាប់ការជួបគ្នានេះ បើសិនជាហួន សុខនីម ពុំមានបញ្ហាអ្វីកើតឡើងទេនោះ វាសនាគឺពិបាកហើយ ព្រោះសុខនីមមានទិចនិចល្អជាង ។ សុខនីម យ៉ាប់តែបញ្ហាកម្លាំងកាយសម្បទាមួយមុខប៉ុណ្ណោះ ឯស្នៀតប្រដាល់របស់គេមានផ្លែល្អ ។ តែយ៉ាងណា ថនវាសនាក៏មានផ្លែល្អដែរ ។ ដូច្នេះ ក្នុងការជួបប្រកួតគ្នាលើកនេះ គឺមិនអាចទាយមុនថា ហួន សុខនីមឈ្នះឬថន វាសនាឈ្នះនោះឡើយ ? ។
យ៉ាម ខេមរា អ្នកប្រដាល់ក្លិបរស្មីកុមារកំព្រា នឹងជួបជាមួយសំអាង ឌុន អ្នកប្រដាល់ក្លិបអេភូថងកីឡា ដោយជួបប្រកួតគ្នាក្នុងទម្ងន់៦៧គីឡូក្រាម ។
សំអាង ឌុន បានអាក់ខានឡើងសង្វៀនជាងកន្លះឆ្នាំហើយ បន្ទាប់ពីគេវាយចាញ់គឹម វាសនាអ្នកប្រដាល់ក្លិបកងពលតូចទ័ពឆ័ត្រយោង៩១១ក្នុងទឹកទី២កាលពីចុងឆ្នាំ២០១៧កន្លងមកនោះ ។តាមពិត សំអាងឌុន គឺពិបាករកគូអោយគេប្រកួតជាមួយដោយសារតែទម្ងន់នេះមិនសូវមាន ពោលគឺមានអ្នកខ្លាំងខ្លាំងពេក អ្នកអន់គឺអន់ពេក មិនស្មើគ្នា ទើបមិនអាចផ្គូផ្គងឲ្យជួបប្រកួតបាន ។
យ៉ាម ខេមរា មិនជាខ្លាំង និងល្អប៉ុន្មាននោះទេ តែរាល់ពេលជួប យ៉ាម ខេមរា គេវាយឈ្នះច្រើនជាងចាញ់ ។ប្រកួតចុងក្រោយមាស ភារម្យ អ្នកប្រដាល់ជើងចាស់ក្លិបកងទ័ពជើងទឹកក្នុងទឹកទី៣ កាលពីថ្ងៃទី២៥កុន្ភះ២០១៨ ។ ចាំមើល តើយ៉ាម ខេមរា គេអាចយកឈ្នះ សំអាង ឌុន បានឬអត់នៅក្នុងការជួបគ្នាលើកនេះ ? ។
វុត្ថា លាន់លិញ អ្នកប្រដាល់ក្លិបអង្គរធំគុនខ្មែរ មិនដឹងថាមានសំណាងឈ្នះឈាន រស្មី អ្នកប្រដាល់ក្លិបរាជសីហ៍ខេត្តរតនគិរី ឬអត់នោះទេ នៅក្នុងការជួបគ្នាលើកដំបូងនេះ ។
រវាង វុត្ថា លាន់លិញ និង ឈាន រស្មីនេះ ពីមុនមកពុំដែលប៉ះគ្នានោះទេ ។ និយាយរួម វុត្ថា លាន់លិញ គេជាអ្នកប្រដាល់ស្រករក្រោយឈាន រស្មី ។ តែលាន់លិញគេមានចិត្តប្រដាល់ធំ មានផ្លែល្អនិងកម្លាំងស៊ុហ្វរឹងមាំ ។
ចំពោះ ឈាន រស្មី វិញនោះ ជាអ្នកប្រដាល់ចាស់វស្សា ប៉ុន្តែគេមានភាពស្ពឹកស្រពន់ ស្នៀតគុន ក៏មិនជាមានផ្លែល្អដែរ ។ អ្វីដែលជាចំណុចខ្សោយរបស់រស្មី គឺការការពាររបស់គេ មិនសូវល្អ ម្ល៉ោះហើយរាល់ពេលប្រកួត គេឧស្សហ៍បែកឈាម ដោយសារកែងរបស់គូប្រកួត ។ ទោះជាយ៉ាងណា សម្រាប់ការប្រកួតនេះ ឈាន រស្មី គេត្រូវការឈ្នះ ព្រោះថាបើវាយចាញ់វុត្ថា លាន់លិញ ដែលជាអ្នកប្រដាល់ស្រករក្រោយនោះ គឺ យ៉ាប់ហើយ ។
ចាំមើល រវាងឈាន រស្មី និង វុត្ថា លាន់លិញ ជួបប្រកួតគ្នានេះ តើនរណាជាអ្នកទទួលបានជ័យជំនះនោះ ? ។
ចាន់ គឹមលន់ អ្នកប្រដាល់ក្លិបនិរោធមានជ័យ ត្រូវគេផ្គូអោយជួបប្រកួតជាមួយហេង សុភ័ក្រ អ្នកប្រដាល់ក្លិបព្រៃទទឹងខេត្តបាត់ដំបង ដោយជួបគ្នាក្នុងទម្ងន់៦០គីឡូក្រាម៕
Source: Kampuchea Thmey Daily
0 Comments