កំពង់ចាម ៖ ទឹកជំនន់ទន្លេមេគង្គ បាននិងកំពុងហក់ឡើង មានសន្ទុះខ្លាំងក្លា និងបានគំរាមបង្កការលំបាកដល់ការរស់នៅរបស់ប្រជាពលរដ្ឋ ព្រមទាំងសត្វពាហនៈផងដែរ។
ដើម្បីជួលសម្រួលរកដំណោះស្រាយជូនប្រជាពលរដ្ឋ ដែលរងគ្រោះដោយសារទឹកជំនន់ខាងលើនេះ លោកគួច ចំរើន អភិបាលនៃគណៈអភិបាលខេត្តកំពង់ចាម ក៏ដូចជាប្រធានមន្ទីរ អង្គភាព ជំនាញពាក់ព័ន្ធនានាជុំវិញខេត្ត បានត្រៀមលក្ខណៈជាស្រេច ដោយប្រើប្រាស់ម៉ាស៊ីនបូមទឹកតូច-ធំ ដើម្បីបូម រំដោះទឹកតាមប្រព័ន្ធលូចេញពីក្រុងកំពង់ចាម ចូលទៅក្នុងទន្លេវិញ ខណៈកម្ពស់ទឹកទន្លេមេគង្គនៅតែបន្តហក់ឡើងជាបន្តបន្ទាប់កម្ពស់១៥,២០ម៉ែត្រ ជាចំណុចប្រកាសអាសន្ន។
យោងតាមសេចក្តីជូនដំណឹង ស្តីពីស្ថានភាពទឹកជំនន់ទន្លេមេគង្គលើ ដែលក្រសួងធនធានទឹក និងឧតុនិយម បានប្រកាសកាលពីថ្ងៃទី២ ខែសីហា ឆ្នាំ២០១៨នេះ បានព្យាករណ៍ថា កម្ពស់ទឹកទន្លេមេគង្គផ្នែកខាងលើ ដែលមានខេត្តស្ទឹងត្រែង និងខេត្តក្រចេះ ទឹកនឹងអាចស្រកចុះជាបន្តបន្ទាប់បន្ថែមទៀត នៅថ្ងៃទី៣ ខែសីហា ឆ្នាំ ២០១៨នេះ ដោយឡែកទន្លេមេគង្គខេត្តកំពង់ចាម ទឹកអាចបន្តកើនឡើងបន្តិចបន្ថែមទៀត មុននឹងចាប់ផ្ដើមស្រកចុះ នៅថ្ងៃទី៤ ខែសីហា នេះ ចំពោះទន្លេមេគង្គក្រោម ទន្លេបាសាក់ និងទន្លេសាប ទឹកអាចនឹងបន្តកើនឡើងសន្សឹមៗក្នុងរយៈពេល១-២ថ្ងៃបន្ថែមទៀត។
លោក អ៊ុម វិបុល ប្រធានមន្ទីរធនធានទឹក និងឧតុនិយម ខេត្តកំពង់ចាម បានឲ្យដឹងថា សម្រាប់ខេត្តកំពង់ចាម ចាប់គិតត្រឹមថ្ងៃទី២ ខែសីហា ឆ្នាំ២០១៨នេះ ទឹកទន្លេមេគង្គ បានហក់ឡើងក្នុងមួយយប់ជិត០២តឹក ធ្វើឲ្យកម្ពស់ទឹកទន្លេមេគង្គក្នុងខេត្តកំពង់ចាមកើនឡើងកម្ពស់១៥,០២ម៉ែត្រ ធៀបនឹងថ្ងៃម្សិលមិញឡើង០,១៧ម៉ែត្រ គឺធំជាងឆ្នាំមុនដែលមានកម្ពស់ទឹកត្រឹមតែ១៤,៥៧ម៉ែត្រប៉ុណ្ណោះ ខណៈដែលកម្រិតកម្ពស់ទឹកត្រូវប្រកាសឲ្យមានការប្រុងប្រយ័ត្នគឺ១៥,២០ម៉ែត្រ។ លោក គួច ចំរើន អភិបាលខេត្តកំពង់ចាម បានអំពាវនាវដល់បងប្អូនប្រជាពលរដ្ឋ ដែលរស់នៅតាមដងទន្លេមេគង្គ សូមឲ្យមានការប្រុងប្រយ័ត្នយកចិត្តទុកដាក់ កូនចៅក្រែងមានលង់ទឹក ឬសត្វពស់ ក៏ដូចជាសត្វអាសិរពិសនានាចឹក។
លោកអភិបាលខេត្តបានបញ្ជាក់ថា បើក្នុងករណីមានសត្វ អាសិរពិស ចឹក សូមបញ្ជូនជនរងគ្រោះជាបន្ទាន់ទៅកាន់មន្ទីរពេទ្យបង្អែកមណ្ឌលសុខភាព ឬប៉ុស្តិ៍សុខភាព ដែលនៅជិតបំផុត ព្រោះមានក្រុមគ្រូពេទ្យ និងឱសថគ្រប់គ្រាន់សម្រាប់ព្យាបាលភ្លាមៗផងដែរ៕
Source: Kampuchea Thmey Daily
0 Comments