លោកប៊ូ ឡាំ អ្នកតំណាងរាស្ត្រមណ្ឌលរតនគិរី ថ្លែងអំណរគុណចំពោះប្រជាពលរដ្ឋក្នុងក្រុងបានលុង

Cambodia News August 22, 2018

រតនគិរី ៖ នាព្រឹកថ្ងៃទី២២ ខែសីហា ឆ្នាំ ២០១៨នេះ លោក ប៊ូ ឡាំ អ្នកតំណាងរាស្ត្រមណ្ឌល រតនគិរី បានអញ្ជើញចុះសំណេះសំណាល និងថ្លែងអំណរគុណចំពោះបងប្អូនប្រជាពលរដ្ឋ ដែលជាអាជីវករ ពាណិជ្ជករ ក្នុងផ្សារក្រុងបានលុង ដែលបានអញ្ជើញទៅបោះឆ្នោតជ្រើសតាំងតំណាងរាស្ត្រនីតិកាលទី៦ កាលពីថ្ងៃទី២៩ ខែកក្កដា ឆ្នាំ២០១៨កន្លងទៅ ហើយបានបោះឆ្នោតគាំទ្រគណបក្សប្រជាជនកម្ពុជាឈ្នះសំឡេងភ្លូកទឹកភ្លូកដី ។

លោកតំណាងរាស្ត្រថ្លែងថា គណបក្សប្រជាជនកម្ពុជា បានឈ្នះសំឡេងឆ្នោត១២៥ លើ ១២៥ កៅអីក្នុងរដ្ឋសភា ហើយរាជរដ្ឋាភិបាលនីតិកាលទី៦ នឹងបង្កើតឡើងក្នុងពេលឆាប់ៗខាងមុខនេះ ដែលមានសម្តេចតេជោ ហ៊ុន សែន ជានាយករដ្ឋមន្ត្រីដឹកនាំបន្តក្នុងការកសាង និងអភិវឌ្ឍប្រទេសជាតិអោយកាន់តែល្អជាងមុន សកម្មជាងមុន និងប្រសិទ្ធភាពជាងមុន ក្នុងបម្រើប្រជាពលរដ្ឋ។

លោកបានសង្កត់ធ្ងន់ថា គណបក្សប្រជាជនឈ្នះឆ្នោតមានន័យថា ប្រជាជនយើងនៅទូទាំងប្រទេសជាអ្នកឈ្នះដូចគ្នា ដូច្នេះប្រជាពលរដ្ឋមានកាតព្វកិច្ច ក៏ដូច តួនាទីថែរក្សាសុខសន្តិភាព ដែលយើងទាំងអស់គ្នាខិតខំរកបានដោយលំបាក បើយើង ថែរក្សាសុខសន្តិភាពបាន គឺប្រជាពលរដ្ឋរស់នៅក្រោមម្លប់សន្តិភាព មានឱកាសគ្រប់ៗគ្នា ក្នុងការប្រកបរបរទទួលទាន និងមានឱកាសកសាង និងអភិវឌ្ឍ ប្រទេសជាតិអោយកាន់តែ រីកចម្រើនលើគ្រប់វិស័យបន្តទៀត។

លោក ប៊ូ ឡាំ ក៏បានសន្យាផងដែរថា ក្នុងអាណត្តិទី៦ ក្នុងនាមលោកជាអ្នកតំណាងរាស្ត្រប្រចាំមណ្ឌលរតនគិរី នឹងខិតខំប្រឹងប្រែងអោយអស់ ពីលទ្ធភាពក្នុងការបម្រើប្រជាពលរដ្ឋក្នុងខេត្ត និងអ្វីៗគ្រប់យ៉ាងដើម្បីផលប្រយោជន៍ ប្រជាពលរដ្ឋ៕