ភ្នំពេញ ៖ នេះជារឿង ដែលប្លែក និងចាប់អារម្មណ៍សម្រាប់ទស្សនិកជនអ្នកគាំទ្រ បន្ទាប់ពីតារាសម្តែងលោក សាវិន ហ្វីលីព ថ្មីៗនេះបានទម្លាយរូបភាពនៃការលួចចម្លងស្តាយតាមតារាចម្រៀងប្រុសរួមអាជីពសិល្បៈដូចគ្នាគឺលោក សាន ផានិត បង្កឲ្យមានការបញ្ចេញប្រតិកម្មពីសំណាក់សាមីខ្លួនលោក សាន ផានិត។
ស្តាយដែលត្រូវបានតារាសម្តែងលោក សាវិន ហ្វីលីព ជ្រើសរើសការលេងខ្លួនដូចតារាចម្រៀងម្ចាស់បទ ទូរស័ព្ទប្រាប់ផង គឺលោក សាន ផានិត នោះគឺត្រង់ចំណុចនៃការលេងម៉ូដសក់ត្រងោល និងមានរំលេចជាមួយពុកមាត់ដុះរ៉ុយៗភ្ជាប់នឹងការថតរូបបែបលក្ខណៈបងធំតួសម្តែងក្នុងសាច់រឿង។
ដោយសារមានការបង្ហោះរូបភាពបង្កឲ្យមានការចាប់អារម្មណ៍និងលើកការប្រៀបធៀបគ្នាថា ស្តាយរបស់លោក សាវិន ហ្វីលីព និងលោក សាន ផានិត មានសណ្ឋានដូចគ្នានេះហើយ ទើបមានការចេញមុខបកស្រាយពីសំណាក់សាមីខ្លួនលោក សាន ផានិត ថាលោក សាវិន ហ្វីលីព ពុំមានចេតនាលួចចម្លងស្តាយរបស់ខ្លួនដោយគ្មានការអនុញ្ញាតនោះទេ ពោលគឺជាការព្រមព្រៀងនិងឯកភាពគ្នាប៉ុណ្ណោះ។
លោក សាន ផានិត បានបញ្ជាក់ថា សាវិន ហ្វីលីព មិនបានលួចចម្លងស្តាយអច្ឆរិយៈរបស់ខ្ញុំទេ គឺគាត់បានពិភាក្សា សុំអាជ្ញាប័ណ្ណត្រឹមត្រូវពីខ្ញុំកាលពីខែមុន លើសពីហ្នឹងខ្ញុំក៏បានជំរុញឲ្យមិត្តភក្ដិលេងស្តាយត្រងោលរលោង ពុកម៉ាត់រ៉ុយៗដូចគ្នាដែរ។
សូមបញ្ជាក់ថា តារាសម្តែងលោក សាវិន ហ្វីលីព និងលោក សាន ផានិត គឺជាមិត្តភក្តិសិល្បៈរួមអាជីពជាមួយគ្នាមានរយៈពេលយូរឆ្នាំមកហើយ។ ម្យ៉ាងទៀតតារាប្រុសទាំងពីររូបខាងលើនេះកន្លងមកតែងបង្ហាញសកម្មភាពការងារមនុស្សធម៌តាមរយៈការចុះចែកអំណោយដល់កុមារខ្វះខាតនៅតាមសហគមន៍មួយចំនួនជាដើម៕
Source: Kampuchea Thmey Daily
0 Comments