កា​កា ជួប ជិ​ង​រឹត​ថង ខ​ណៈ​ចាន់ ស៊ី​ណាត ជួប ថូន ស​.​តះ​គូ​ន​ផេ​ត នៅ​សង្វៀន​បាយ័ន​ស្ទឹងមានជ័យ​

អ្នក​ប្រដាល់​ជើង​ខ្លាំង សុខ ធី អ្នក​ប្រដាល់​ក្លិប​សៅ​យ៉ាន់​នាគា ខេត្តបន្ទាយមានជ័យ និង​ជា​ម្ចាស់​ខ្សែក្រវាត់​គូ​បូ​តា​ទម្ងន់​៥៧​គីឡូក្រាម គេ​នឹង​ទទួល​ស្វាគមន៍​ការសុំ​ជួប​របស់​អ្នក​ប្រដាល់​ថៃ ជិ​ង​រឹត​ថង សរ​.​ស៊ូ​វ៉ាន់​ណា​រ៉ា​ន​(Jingreetthorng Sor.Suvannararn) នៅលើ​សង្វៀន​បាយ័ន​ស្ទឹងមានជ័យ នា​យប់​ថ្ងៃអាទិត្យ​ទី​០៥​ ខែ​សីហា ឆ្នាំ​២០១៨​នេះ។ ពីរ​នាក់​នេះ មិន​ធ្លាប់​ប៉ះ​គ្នា​ទេ​កន្លងមក។

ពួកគេ​ទាំងពីរ ជួប​ប្រកួត​គ្នា​ក្នុង​ទម្ងន់​៥៧​គីឡូក្រាម។ អ្នក​ប្រដាល់​ពីរ​នាក់​នេះ សុទ្ធតែ​ធ្លាប់​ឆ្លងកាត់​ការប្រកួត​ជាមួយ​អ្នក​ប្រដាល់​បរទេស​ដូចគ្នា។ បើ​និយាយ​ពី​បច្ចេកទេស​ និង​ល្បិចកល​ប្រកួត ពួកគេ​ទាំងពីរ​មាន​ដូចគ្នា។

សុខ ធី ជា​អ្នក​ប្រដាល់​វ័យក្មេង​ស្រករ​ក្រោយ ជា​កូនសិស្ស​របស់​អតីត​អ្នក​ប្រដាល់​ជើង​ខ្លាំង​សាន សៅ​យ៉ាន់ ។ នេះ​ជា​លើក​ទី​១៣ របស់​សុខ ធី​ហើយ ដែល​មក​ប្រកួត​នៅ​ភ្នំពេញ​នេះ ។​
​សុខ ធី នៅ​ក្មេង តែមាន​ស្នៀត​ប្រដាល់​ល្អ វាយ​ខ្លាំង កម្លាំងកាយ​សម្បទា​រឹងមាំ ហើយ​គេ​អាច​វាយ​បាន​គ្រប់​ស្ថានភាព​ប្រកួត​ទាំងអស់ ។ ទោះបីជា​យ៉ាងណា សុខ ធី ក៏​មិនអាច​មើលស្រាល​ជិ​ង​រឹត​ថង​ដែរ ព្រោះ​អ្នក​ប្រដាល់​ថៃ​រូបនេះ គេ​ជា​ជើង​ខ្លាំង​ប្រចាំ​ទម្ងន់​នេះ​នៅ​ស្រុកថៃ ។ ចាំមើល សុខ ធី អាច​យកឈ្នះ​ជិ​ង​រឹត​ថង​បាន​ឬ​អត់ សម្រាប់​ជំនួប​លើកដំបូង​នេះ ?​។​
​
សូមបញ្ជាក់ថា សុខ ធី ក្នុងការ​ប្រកួត​ចុងក្រោយ​ជាមួយ​ថៃ​នៅ​ភ្នំពេញ​(០១​កក្កដា​២០១៨) គេ​បាន​ផ្តួល​Petch Ngen Thong អោយ​សន្លប់​ក្នុង​ទឹក​ទី​៤​លើស​ង្វៀន​បាយ័ន​ស្ទឹងមានជ័យ​នេះ ។​
​
ចំពោះ ចាន់ ស៊ី​ណាត អ្នក​ប្រដាល់​ក្លិប​និរោធ​មានជ័យ គេ​នឹងត្រូវ​តស៊ូ​ជាមួយ​អ្នក​ប្រដាល់​ថៃ​ថូន ស​.​តះ​គូ​ន​ផេ​ត​(Tone Sor.Takunpetch) ដោយ​ប្រកួត​ក្នុង​ទម្ងន់​៥៧​គីឡូក្រាម ។ អ្នក​ប្រដាល់​ថៃ​រូបនេះ ពុំ​ធ្លាប់​ដែល​មក​កម្ពុជា​នោះទេ​កន្លងមក​។​ជា​លើក​ទី​១​ហើយ ដែល​ថូ​នស​.​តះ​គូ​ន​ផេ​ត មកជួប​ប្រកួត​ជាមួយ​អ្នក​ប្រដាល់​ខ្មែរ​នោះ ។​
​
ស៊ី​ណាត ជា​ជើង​ខ្លាំង​ស្រករ​ក្រោយ​ម្នា​ក់នៅ​កម្ពុជា ។ គេ​មាន​កណ្តាប់ដៃ និង​ជង្គង់​ល្អ វាយ​ចេញចូល​រហ័ស ហើយ​ស្នៀត​ទាត់​និង​ជង្គង់ កែង ក៏​ល្អ​ថែមទៀត ។ តែ​អ្នក​ប្រដាល់​រូបនេះ វាយ​រាង​ឆាប់​អស់កម្លាំង​ស៊ុ​ហ្វ តែ​ស៊ូ​ចំពោះ​ការប្រកួត ។ ស៊ី​ណាត មាន​ប្រវត្តិ​ប្រកួត​ប្រមាណ​១០៦​លើក ក្នុងនោះ​វាយ​ឈ្នះ​៩២​លើក ចាញ់​១៧​លើក និង​ស្មើ​០៧​លើក និង​ធ្លាប់​ផ្តួល​គូប្រកួត​អោយ​សន្លប់​បាន​៣២​លើក​។ គេ​ជា​អ្នក​ប្រដាល់​ដែលមាន​ចិត្តធំ វាយ​មិន​សំចៃ​ដៃ​ឡើយ ។ ប៉ុន្តែ​យ៉ាងណា ចាន់ ស៊ី​ណាត មិនអាច​មើលស្រាល​ប្រា​ច័ន្ទ​បាន បានទេ ព្រោះថា​អ្នក​ប្រដាល់​ថៃ​រូបនេះ គេ​ក៏មាន​ផ្លែ​ល្អ និង​កលល្បិច​ខ្ពស់​ផងដែរ​។​
​
ចំណែក ថូ​នស​.​តះ​គូ​ន​ផេ​ត ជា​ជើង​ខ្លាំង​មួយរូប​ដែរ​នៅ​ស្រុកថៃ ។ បើតាម​ដំណឹង​ថា អ្នក​ប្រដាល់​ថៃ​រូបនេះ ធ្លាប់​ប្រកួត​បាន​៧៨​លើក ឈ្នះ​៦៦​លើក ចាញ់​១១​លើក និង​ស្មើ​០១​លើក ។ ចាំមើល ចាន់ ស៊ី​ណាត តើ​គេ​អាច​យកឈ្នះ ថូ​នស​.​តះ​គូ​ន​ផេ​ត បាន​ឬ​អត់​? ។​
​
ចាន់ ស៊ី​ណាត ប្រកួត​ចុងក្រោយ​ជាមួយ​ថៃ​(១៣​កក្កដា​២០១៨) វាយ​ចាញ់ ប្រា​ច័ន្ទ​បាន​( Prachan ban Sor.Jor Vichit Petriw) ដោយ​ពិន្ទុ ។​
​
ចំពោះ​ការប្រកួត​រវាង​អ្នក​ប្រដាល់​រួម​ជាតិ​វិញ ចេង គា អ្នក​ប្រដាល់​ក្លិប​សាល​វ័​ន្ត​កីឡា ត្រូវគេ​ផ្គូ​អោយ​ជួប​ជាមួយ ស៊ឹម វណ្ណ​ដេ​ត អ្នក​ប្រដាល់​ក្លិប​ថ្មគោល​ពោធិ៍​សែន​ជ័យ ដោយ​ប្រកួត​ក្នុង​ទម្ងន់​៦៣,៥០០​គីឡូក្រាម ។ ពីរ​នាក់​នេះ ពុំ​ធ្លាប់​ដែល​ប៉ះគ្នា​ទេ​ពីមុនមក ។​
​
ចំណែក ចាន់ វណ្ណ​ដេ​ត អ្នក​ប្រដាល់​ក្លិប​និរោធ​មានជ័យ នឹង​ជួប​ប្រកួត​ជាមួយ ខេ​ម ថា​រ៉ា​ក់ អ្នក​ប្រដាល់​ក្លិប​កងពលតូច​ទ័ព​ឆ័​ត្រ​យោង​៩១១ ដោយ​ជួបគ្នា​ក្នុង​ប្រភេទ​ទម្ងន់​៥១​គីឡូក្រាម ។ ពួកគេ​ទាំងពីរ​នាក់​នេះ ក៏​មិន​ធ្លាប់​ដែល​ជួបគ្នា​ដែរ​កន្លងមក៕
​

Source: Kampuchea Thmey Daily