អាកាសធាតុ​ត្រជាក់​ជួយ​ឲ្យ​ក្រុម​ពន្លត់​អគ្គិភ័យ​ប្រយុទ្ធ​នឹង​ភ្លើង​ឆេះ​ព្រៃ​នៅ​រដ្ឋ​កាលីហ្វ័រ​នីញ៉ា​ភាគខាងត្បូង

ដោយមាន​ជំនួយ​ពី​សីតុណ្ហភាព​ចុះ​ត្រជាក់​បន្តិច​, អ្នក​ពន្លត់​អគ្គិភ័យ​បាន​ទទួលផល​វិជ្ជមាន​កាលពី​ថ្ងៃអាទិត្យ​ក្នុងការ​ប្រយុទ្ធ​នឹង​ភ្លើង​ឆេះ​ព្រៃ​ដែល​បាន​បំផ្លាញ​រចនាសម្ព័ន្ធ​ចំនួន​១៦ ​ខណៈដែល​វា​បាន​ឆាបឆេះ​តាម​ព្រៃ Cleveland National ភាគខាងត្បូង​នៃ​រដ្ឋ កាលីហ្វ័រ​នីញ៉ា។

លោកស្រី Lynne Tolmachoff មកពី​នាយកដ្ឋាន​ព្រៃឈើ​និង​អគ្គិភ័យ​រដ្ឋ​កាលីហ្វ័រ​នីញ៉ា​បាន​និយាយថា អគ្គិភ័យ Holy Fire ត្រូវ​គ្រប់គ្រង​បាន​៤១​ភាគរយ​កាលពី​រសៀល​ថ្ងៃអាទិត្យ​បន្ទាប់ពី​វា​បាន​ដុតបំផ្លាញ​ឈើ​ស្ងួត​និង​ឈើ​ប្រណីត​ក្នុង​ចម្ងាយ​៩២.៥​គីឡូម៉ែត្រ​។​

លោកស្រី Tolmachoff បាន​ថ្លែងថា “​អាកាសធាតុ​នៅទីនេះ​ក្នុង​រដ្ឋ​កាលីហ្វ័រ​នីញ៉ា​ហាក់ដូចជា​ចុះ​ត្រជាក់​នៅថ្ងៃនេះ​និង​ក្នុង​រយៈពេល​ប៉ុន្មាន​ថ្ងៃ​ខាងមុខ​ហើយ​វា​អាចជួយ​ដល់​អ្នក​ពន្លត់​អគ្គិភ័យ​ក្នុងការ​ទប់ស្កាត់​បន្ថែម​ទៀត​។ ពួកគេ​គួរតែមាន​វឌ្ឍនភាព​ប្រសើ​រ​ជាង​នេះ​ក្នុង​រយៈពេល​ពីរ​បី​ថ្ងៃ​ខាងមុខ​”​។​
​អគ្គិភ័យ Holy Fire គឺជា​អគ្គិភ័យ​មួយ​ក្នុងចំណោម​អគ្គិភ័យ​ជិត​២០​នៅ​ទូទាំង​រដ្ឋ​កាលីហ្វ័រ​នីញ៉ា​។​

ខណៈ​អ្នក​ពន្លត់​អគ្គិភ័យ​ចាប់ផ្តើម​ដោះស្រាយបាន​ល្អប្រសើរ​ជាង​មុន​លើ​អគ្គិភ័យ​នេះនោះ ពួកគេ​បានចាប់ផ្តើម​ដក​ការបញ្ជា​ជម្លៀស​ដែល​ដាក់​កាលពី​ចុង​សប្ដាហ៍​សម្រាប់​តំបន់​ដែល​កាលពីមុន​គឺជា​ផ្លូវ​របស់​អគ្គិភ័យ​។ មនុស្ស​ជាង​២០,០០០​នាក់​ត្រូវបាន​គេ​ប្រាប់​ឲ្យ​ជម្លៀស​នៅ​ចំណុច​មួយ​។​

យន្ដហោះ​បានធ្វើ​ការហោះហើរ ចាក់ទឹក​និង​ទម្លាក់​សារធាតុ​ពណ៌​ផ្កាឈូក​លើ​ភ្លើង​ដើម្បី​ការពារ​បឹង Elsinore និង​សហគមន៍​ខ្ពង់រាប​ផ្សេងៗ​ទៀត​នៅក្បែរ​អណ្តាតភ្លើង​។​

បុរស​ម្នាក់​ដែល​ត្រូវបាន​ចោទប្រកាន់​ពីបទ​លួច​ដុត​ភ្លើង​ដោយ​ចេតនា​គឺ​បាន​លេចមុខ​នៅក្នុង​តុលាការ​កាលពី​ថ្ងៃ​សុក្រ​ប៉ុន្តែ​ការកាត់ក្តី​របស់គាត់​ត្រូវបាន​ពន្យារពេល​។​

លោក Forrest Clark អាយុ​៥១​ឆ្នាំ​បាន​និយាយថា ជីវិត​របស់គាត់​កំពុង​រង​ការគំរាមកំហែង​ហើយ​និយាយថា ការចោទប្រកាន់​អំពី​ការដុត​បំផ្លាញ​គឺជា​ការ​កុហក​មួយ​។
​ស្នងការ​តុលាការ​ម្នាក់​បាន​បង្គាប់​ឲ្យ​គាត់​បង់ប្រាក់​ធានា​១​លាន​ដុល្លារ​៕

​

Source: Kampuchea Thmey Daily