ព្រឹត្តិការណ៍ប្រកួតប្រដាល់ជម្រុះដណ្ដើមប្រាក់១០លានរៀល របស់ក្រុមហ៊ុនស្រាបៀរ Ganz berg ក្នុងប្រភេទទម្ងន់៦៥គីឡូក្រាម នៅលើសង្វៀនទូរទស្សន៍អាស៊ីអាគ្នេយ៍ បានឈានដល់សប្ដាហ៍ទី៤ ហើយ នៅយប់ថ្ងៃសៅរ៍ទី២៥ ខែសីហា ឆ្នាំ២០១៨នេះ។
សម្រាប់ការប្រកួតជម្រុះសប្តាហ៍ទី៤នេះ ជាការប្រកួតជុំទី២ ដែលមាន២គូ រវាងមាស សុជាតិ អ្នកប្រដាល់ក្លិបឃ្លាំងមឿងកីឡា និង ប៊ី ចាន់ណា អ្នកប្រដាល់ក្លិបមហិទ្ធរិទ្ធតាដំបងដែក ហើយមួយគូទៀត ជាការជួបគ្នារវាងហ៊ឹម សារ៉ាន់ អ្នកប្រដាល់សមាគមកីឡាប្រដាល់ក្រសួងការពារជាតិ និង ឌធឿន ធី អ្នកប្រដាល់ក្លិបអង្គរមានជ័យខេត្តសៀមរាប ។
រវាងមាស សុជាតិ និង ប៊ី ចាន់ណា មិនធ្លាប់ប៉ះគ្នាទេកន្លងមក ។ ពួកគេទាំងពីរ សុទ្ធតែមានសមត្ថភាពបច្ចេកទេសខ្ពស់ដូចគ្នា ដែលមិនមាននរណាហ៊ានមើលស្រាលគ្នានោះទេ ក្នុងការជួបគ្នាលើកទី១នេះ ។
កាលពីប្រកួតជុំទី១ មាស សុជាតិ វាយឈ្នះ ធឿន ធី ដោយពិន្ទុ បាន៣ពិន្ទុ ឯ ប៊ី ចាន់ណា វាយឈ្នះហ៊ឹម សារ៉ាន់ ក្នុងទឹកទី៣ បាន៣ពិន្ទុដែរ ។ ចាំមើល តើក្នុងការប្រកួតជុំទី២នេះ រវាងមាស សុជាតិ និង ប៊ី ចាន់ណា តើអ្នកណារកបាន៣ពិន្ទុបន្ថែមនោះ ? ។
ចំពោះការជួបគ្នារវាង ហ៊ឹម សារ៉ាន់ និង ធឿន ធី វិញ ក៏ពុំធ្លាប់ដែលប៉ះគ្នាដែរកន្លងមក ។ សារ៉ាន់ ថ្វីត្បិតតែគេជាអ្នកប្រដាល់ជើងខ្លាំងនិងមានឈ្មោះបោះសម្លេងពីមុន ប៉ុន្តែសម្រាប់បច្ចុប្បន្នគេស្រុតធ្លាក់ច្រើនណាស់ ដែលមិនអាចទុកចិត្តបានក្នុងជួបប្រកួតជាមួយធឿន ធី ដែលជាអ្នកប្រដាល់ស្រករក្រោយ តែមានកម្លាំងកាយសម្បទារឹងមាំនោះ ។
ក្នុងការប្រកួតជុំទី១កន្លងមក ពួកគេទាំងពីរវាយចាញ់ បាន១ពិន្ទុដូចគ្នា ។ ដូច្នេះចាំមើល ការជួបគ្នានៅជុំទី២នេះ តើអ្នកណារកបាន៣ពិន្ទុបន្ថែមន់ ? ។
ព្រឹត្តិការណ៍ប្រកួតប្រដាល់គុនខ្មែរ ដណ្ដើមប្រាក់១០លានរៀល របស់ក្រុមហ៊ុនស្រាបៀរGanz berg ក្នុងប្រភេទទម្ងន់៦៥គីឡូក្រាមនេះ មានអ្នកប្រដាល់ជើងចាស់ចំនួន០៨នាក់ មកពីសមាគមក្លិបចំនួន៨ បានចូលរួមប្រកួតក្នុងព្រឹត្តិការណ៍នេះ។ អ្នកប្រដាល់ទាំង០៨រូបនោះ ត្រូវបែងចែកជាពីរពូល មួយពូលមាន៤រូប ដែលក្នុងពូល A មានកីឡាករ ហុង ជីវ៉ុង ក្លិបមិត្តប៉ូលីស, មុត ខ្លឹមខ្មៅក្លិបមកុដរាជសីហ៍ , មាស សុជាតិ ក្លិបឃ្លាំងមឿងកីឡា និង ហ៊ឹម សារ៉ាន់សមាគមកីឡាប្រដាល់ក្រសួងការពារជាតិ។ ចំណែកពូល B មាន ង៉ែត រដ្ឋា ក្លិបតាព្រហ្មមានជ័យ, អ៊ុំ វណ្ណេត ក្លិបការិយាល័យទី៥កងទ័ពជើងគោក , ធឿន ធី ក្លិបអង្គរមានជ័យខេត្តសៀមរាប និង កីឡាករ ហួន សុខនីម ក្លិបមហិទ្ធរិទ្ធតាដំបងដែក ។
ចំពោះរូបមន្តនៃការប្រកួត គឺធ្វើតាមរូបមន្តវិលជុំសន្សំពិន្ទុក្នុងពូល ដោយអ្នកទាំង ៨ ត្រូវជួបគ្នាទាំងអស់ ។ការប្រកួតជម្រុះទម្លាក់ចោល ៦ នាក់ចេញទុក ១ នាក់ដែលមានពិន្ទុលើសគេក្នុងពូលនីមួយៗ ពោលគឺយកលេខ១ពូលA និងលេខ១ពូលB ដើម្បីឡើងទៅប្រកួតផ្តាច់ព្រ័ត្រដណ្តើមយកប្រាក់១០លានរៀលតែម្តង៕
Source: Kampuchea Thmey Daily
0 Comments