Ad Code

លប​ឡើងផ្ទះ​លួច​ទូរស័ព្ទ​គេ​ទាំងយប់ វ័ណ្ឌ ក​ព្រោះ​ម្ចាស់​ភ្ញាក់​ទាន់



បាត់ដំបង​ ៖ ​យុវជន​ម្នាក់​ ដែល​ស្ថិត​ក្នុង​វ័យ​១៦ ឆ្នាំ ត្រូវ​បាន​កម្លាំង​កងរាជអាវុធហត្ថ​ស្រុក​មោងឫស្សី ធ្វើការ​ឃាត់ខ្លួន​ដើម្បី​បញ្ជូន​ទៅតាម​នីតិ​វិធី បន្ទាប់ពី​ជនសង្ស័យ​រូប​នេះ​ ត្រូវបាន​ប្រជាពលរដ្ឋ​ឃាត់ខ្លួន​បាន​ទាំងយប់ ដោយសារ​ការ​លប​ឡើងលើ​ផ្ទះ​គេ​ដើម្បី​ធ្វើ​សកម្មភាព​លួច​ទូរស័ព្ទដៃ។

ការ​ចាប់​ខ្លួន​បញ្ជូន​អោយ​សមត្ថកិច្ច​នេះ​ បាន​ធ្វើ​ឡើង​កាលពី​វេលា​ម៉ោង​ប្រមាណ ២ និង ១៥ នាទី រំលង​អធ្រាត្រ ឈានចូល​ថ្ងៃទី​២៤ ខែសីហា ឆ្នាំ​២០១៨ ត្រង់ចំណុច​ក្រុមទី​២ ភូមិ​របស់​មង្គល ឃុំ​របស់​មង្គល ស្រុក​មោងឫស្សី ខេត្តបាត់ដំបង។

បើតាម​ការ​អះអាង​ពី​ជនរងគ្រោះ​ឈ្មោះ កង តុលា ភេទ​ប្រុស អាយុ​២៣ ឆ្នាំ​ រស់នៅ​ភូមិ ឃុំ ខាងលើ បាន​បញ្ជាក់​ថា នៅ​មុន​ពេល​កើតហេតុ​គឺ​ខ្លួន​កំពុង​សម្រាក​យ៉ាង​លង់លក់​ក្នុង​ដំណេក​ទៅហើយ។ លុះ​ពេល​ភ្ញាក់​ដឹងខ្លួន ក៏​ស្រាប់តែ​ឃើញ​ជនសង្ស័យ​រូប​នេះ​ មិនដឹង​ជា​លប​ឡើង​មក​លើផ្ទះ​របស់​ខ្លួន​តាំងពី​ពេលណា បាន​មក​បើក​កាបូប​យក​ទូរស័ព្ទ​ដៃ ១ គ្រឿង ម៉ាក​អាយ​ហ្វូ​ន បម្រុង​ចាកចេញ តែ​ខ្លួន​ក៏បាន​ចាប់​ជាប់​រួច​បញ្ជូន​ទៅ​អោយ​សមត្ថកិច្ច​តែម្តង។

ជនសង្ស័យ​នេះ​មាន​ ឈ្មោះ គង់ ងួន ភេទ​ប្រុស អាយុ​១៦​ឆ្នាំ ស្នាក់​នៅក្នុង ភូមិ ឃុំ​ជាមួយគ្នា ហើយ​បច្ចុប្បន្ន​នេះ ជនសង្ស័យ​ត្រូវ​បាន​ឃាត់ខ្លួន​នៅ​មូលដ្ឋាន​កងរាជអាវុធហត្ថ​ស្រុក​មោងឫស្សី ដើម្បី​កសាង​សំណុំរឿង​តាម​នីតិវិធី៕ ​


Source: Kampuchea Thmey Daily

Post a Comment

0 Comments

Close Menu