ឌុន រដ្ឋា អ្នកប្រដាល់ជើងខ្លាំង នៃក្លិបអេភូថងកីឡា នឹងត្រូវឡើងតស៊ូជាមួយអ្នកប្រដាល់ថៃSuper Chhai នាព្រឹកថ្ងៃអាទិត្យទី២៩ ខែមេសា ឆ្នាំ២០១៨នេះ នៅលើសង្វៀន Boo strong Fighter On Fire របស់SEA-TV។
Super Chhai ជាអ្នកប្រដាល់ជើងខ្លាំងរបស់ថៃ ហើយគេធ្លាប់ឈ្នះខ្សែក្រវាត់នៅកម្ពុជាថែមទៀតផង ។ អ្នកប្រដាល់ជើងខ្លាំងរបស់ថៃរូបនេះ មិនងាយមាននរណាវាយឈ្នះគេទេ។ គេប្រកួតមានប្លង់តាមលក្ខណះបច្ចេកទេស ទាំងកណ្តាប់ដៃ ទាំងជើងទាត់ ជង្គង់កែង គឺមានកំប្លេតែម្តង។
យ៉ាងណា Super Chhai នេះ ក៏ធ្លាប់វាយចាញ់អ្នកប្រដាល់កម្ពុជាយើងច្រើននាក់ដែរ។ អ្នកប្រដាល់ថៃរូបនេះ មានកំនត់ត្រាប្រកួតចំនួន១៣០លើក ឈ្នះ១១២លើក ចាញ់១៦លើក និងស្មើ ០២លើក ។
ឌុន រដ្ឋា អ្នកប្រដាល់កម្ពុជាយើងវិញ ជាអ្នកប្រដាល់ចាស់វស្សា។គេមានស្នៀតប្រដាល់ល្អនិង មានចិត្តប្រដាល់ធំ ហើយហ៊ានប្តូរជាមួយគូប្រកួតដោយមិនខ្លាចញញើតឡើយ។
សម្រាប់ការជួបប្រកួតជាមួយSuper Chhaiនេះ មិនដឹងថា ឌុន រដ្ឋា អាចយកឈ្នះបានឬអត់នោះទេ ? ។ ទោះជាយ៉ាងណា អ្នកប្រដាល់ឌុន រដ្ឋា គេមិនសូវជួបសំណាងល្អប៉ុន្មានទេ ក្នុងការជួបប្រកួតជាមួយថៃនោះ។ បើតាមការកត់សម្គាល់កន្លងមក ក្នុងការជួបថៃចំនួន១៣លើក រដ្ឋា វាយឈ្នះថៃបានតែ០៤លើកប៉ុណ្ណោះ។
ឌុន រដ្ឋា មានកំនត់ត្រាប្រកួត៨៤លើក ឈ្នះ៦២លើក ចាញ់១៧លើក និងស្មើ៥លើក ។ដូច្នេះ ចាំមើលរវាងឌុន រដ្ឋា និង Super Chhai ជួបគ្នាលើកទី១នេះ តើនរណាជាអ្នកឈ្នះនោះ ?។
ចាន់ ប៊ុនលាភ អ្នកប្រដាល់ជើងចាស់ក្លិបនិរោធមានជ័យ ត្រូវជួបជាមួយអ្នកប្រដាល់ថៃឈ្មោះPhich Nam Ek ដោយជួបប្រកួតក្នុងទម្ងន់ ៦៣,៥០០ គីឡូក្រាម ។ អ្នកប្រដាល់ថៃនេះ ធ្លាប់មកប្រកួតនៅស្រុកខ្មែរច្រើនលើកហើយកន្លងមក។
Phich Nam Ek ធ្លាប់វាយឈ្នះនិងចាញ់ជាមួយអ្នកប្រដាល់ជើងខ្លាំងរបស់កម្ពុជាច្រើននាក់ហើយ។ អ្នកប្រដាល់ថៃរូបនេះ មានប្រវត្តិប្រកួតចំនួន៩២លើក ក្នុងនោះវាយឈ្នះ៧៤លើក ចាញ់១៦នេះ និង ស្មើ០២លើក ហេតុនេះមិនធម្មតានោះឡើយ។
ចាន់ ប៊ុនលាភ គេមានផ្លែល្អ ពិសេសគឺផ្លែកែង និងជង្គង់ ប៉ុន្តែអ្វីដែលគេបារម្ភជំនួសប៊ុនលាភនោះ គឺខ្លាចតែចាញ់កម្លាំងស៊ុហ្វ Phich Nam Ek មួយមុខប៉ុណ្ណោះ ។ចាន់ ប៊ុនលាភ មានប្រវត្តិប្រកួតចំនួន៨៥លើក ឈ្នះ៦៧លើក ចាញ់១៤លើកនិងស្មើ០២លើក។ ប្រកួតជាមួយថៃលើកចុងក្រោយនេះ វាយចាញ់Jakpetch Sor.Silakដោយពិន្ទុ កាលពីថ្ងៃទី ២០ កក្កដា ២០១៨។
ជាលើកទី២៦របស់ចាន់ ប៊ុនលាភ ដែលឡើងប្រកួតជាមួយថៃ។ គេមិនហ៊ានអះអាងមុនថា ប៊ុនលាភឈ្នះក្នុងការប្រកួតនេះទេ ។ ចាំមើល តើប៊ុនលាភ អាចយកឈ្នះ Phich Nam Ek បានឬអត់ ?សម្រាប់ការជួបគ្នាលើកទី១នេះ។
សេន កុសល អ្នកប្រដាល់ក្លិបមោងឫស្សីមរតកគុនខ្មែរខេត្តបាត់ដំបង ត្រូវជួបប្រកួតជាមួយអ្នកប្រដាល់Ireland ឈ្មោះJodan O’conner។ ពួកគេប្រកួតគ្នាក្នុងប្រភេទទម្ងន់៥៧ គីឡូក្រាម ។
អ្នកប្រដាល់ Jodan O’conner ដែលមកជួបសេន កុសល នេះ គេមិនធ្លាប់មកប្រកួតនៅកម្ពុជានោះទេកន្លងមក ។ អ្នកប្រដាល់ Ireland រូបនេះ មានកំនត់ត្រាប្រកួតចំនួនទើបតែបាន១៥លើកប៉ុណ្ណោះ ក្នុងនោះឈ្នះ១២លើក និងចាញ់៣លើក។
សេន កុសល ជាជើងខ្លាំងស្រករក្រោយរបស់កម្ពុជា ។ នេះជាលើកទី២ សម្រាប់កុសលដែលឡើងប្រកួតជាលក្ខណះអន្តរជាតិនេះ ។ កាលពីលើកទី១ គេបានផ្តួលថៃSing Phunsai ក្នុងទឹកទី២ ។ សេន កុសល គេមានបទពិសោធន៍ក្នុងការប្រកួតចំនួន៦១លើក គឺឈ្នះ៤៧លើក ចាញ់១២លើក និងស្មើ០២លើក ។ គេមានកណ្តាប់ដៃល្អ វាយចេញចូលរហ័ស ហើយស្នៀតទាត់និងជង្គង់ កែង ក៏ល្អថែមទៀត។
ទោះជាបែបនេះក្តី មិនទាន់ហ៊ានសន្និដ្ឋានថា សេន កុសល ជួបសំណាងល្អនៅក្នុងការប្រកួតជាអ្នកប្រដាល់Ireland នេះឡើយ ? ។ ចាំមើល សេន កុសល អាចយកឈ្នះ Jodan O’conner បានឬអត់សម្រាប់ជំនួបលើកដំបូងនេះ?៕
Source: Kampuchea Thmey Daily
0 Comments