អ្នកប្រដាល់ជើងចាស់របស់កម្ពុជា សូត្រ ប៊ុនធី ក្លិបបក្សីស្លាបដែក នឹងត្រូវជួបប្រកួតជាអ្នកប្រដាល់ថៃជាលក្ខណៈមិត្តភាពអន្តរជាតិ នៅលើសង្វៀនBoostrong Fighter On Fire នៅ SEATV នាព្រឹកថ្ងៃអាទិត្យទី១៩ ខែសីហា ឆ្នាំ២០១៨នេះ។
សូត្រ ប៊ុនធី ត្រូវជួបជាមួយអ្នកប្រដាល់ថៃឈ្មោះ Phetchhit Chhai ដោយជួបប្រកួតក្នុងទម្ងន់ ៦០ គីឡូក្រាម ។ អ្នកប្រដាល់ថៃនេះ ជាអ្នកប្រដាល់ចំណូលថ្មី មិនធ្លាប់មកប្រកួតនៅស្រុកខ្មែរទេកន្លងមក។
បើតាមលោកញាណ សុធី អ្នកចាត់ចែងកម្មវិធីប្រដាល់នៅSEATV អោយដឹងនោះថា Phet chhit Chhai គេជាអ្នកប្រដាល់ដែលមានថ្វីដៃល្អ និង ខ្លាំង ដោយមានប្រវត្តិប្រកួតចំនួន៦៨លើក វាយឈ្នះ៥៦លើក ចាញ់១១លើក និងស្មើ ០១លើក។
ចំណែក សូត្រ ប៊ុនធី គេក៏ជាជើងខ្លាំងស្រករក្រោយរបស់កម្ពុជា ក្នុងប្រភេទទម្ងន់៦០គីឡូក្រាមនេះ។ ក្រោយពេលឆ្លងកាត់ការប្រកួតជាមួយថៃប្រមាណជាង៣០លើក ដោយវាយឈ្នះជាង ២០ លើកនោះ បានធ្វើឲ្យគេមានបទពិសោធន៍ច្រើនក្នុងការប្រកួត ដោយគេវាយជាមួយថៃដូចវាយជាមួយខ្មែរគ្នាឯងអីចឹង គឺគ្មានញញើតខ្លាចដូចពីមុននោះឡើយ។ ប៊ុនធី មានកណ្តាប់ដៃល្អ វាយចេញចូលរហ័ស ហើយស្នៀតទាត់ និង ជង្គង់ កែង ក៏ល្អថែមទៀត។
សូត្រ ប៊ុនធី មានកំណត់ត្រាប្រកួតចំនួន១០៩លើក វាយឈ្នះ៨៥លើក ចាញ់២០លើក និងស្មើ០៤លើក។ កណ្ដាប់ដៃ កែង ជង្គង់និងជើងធាក់របស់ប៊ុនធី វាយចេញខ្លាំង និងមានទម្ងន់ធ្ងន់គួរសមដែរ។ ជាអ្នកប្រដាល់ដែលមិនចេះវាយបន្ធូរដៃនោះទេ អោយតែគេយល់ថាដៃគូអាចបង្ក្រាបបាន គឺគេមិនប្រោះទុកយូរទេ គេផ្តួលយកឈ្នះតែម្តង។ និយាយពីបច្ចេកទេស និងកលល្បិចនោះ ប៊ុនធីគេមានពេញខ្លួន។ ចាំមើល សូត្រ ប៊ុនធី គេអាចបង្ក្រាបអ្នកប្រដាល់ថៃចំណូលថ្មី Phetchhit Chhai នេះបានឬអត់ ?។
សូត្រ ប៊ុនធី គេឡើងប្រកួតជាមួយថៃ ប្រមាណ៨នាក់ជាប់ៗគ្នាចុងក្រោយនេះ គឺគេវាយឈ្នះទាំង៨នាក់តែម្តង ដោយក្នុងនោះ គេវាយឈ្នះដោយពិន្ទុ៣នាក់ និងវាយអោយសន្លប់ចំនួន០៥នាក់ ដែលការឈ្នះលើកចុងក្រោយគេនោះ គឺឈ្នះ Chom Det ក្នុងទឹកទី៣ កាលពីថ្ងៃទី២៣មិថុនា ២០១៨កន្លងទៅនេះ។
ចំពោះស៊ូ វណ្ណះ អ្នកប្រដាល់ក្លិបនាគរាជមានជ័យ ត្រូវជួបប្រកួតសាកណ្តាប់ដៃជាមួយ ម៉ន ព្រហ្មម៉ាញ អ្នកប្រដាល់ក្លិបការិយាល័យទី៥កងទ័ពជើងគោក ដោយជួបប្រកួតក្នុងទម្ងន់៦៣,៥០០គីឡូក្រាម។
ពីរនាក់នេះ មិនធ្លាប់ជួបប្រកួតគ្នាទេកន្លងមក។ ដូច្នេះ ការជួបគ្នាលើកនេះ គឺជាលើកដំបូងរបស់ពួកគេទាំងពីរ ដែលការឈ្នះចាញ់ មិនដឹងថា បានទៅលើនរណានោះឡើយ?។
ស៊ូ វណ្ណះ មានស្នៀតទាត់និងកណ្តាប់ដៃខ្លាំង និងវាយល្អ ហើយមានចិត្តប្រដាល់ធំ និងមានទិចនិចប្រកួតច្រើន ដើម្បីយកឈ្នះលើគូប្រកួត។ ដោយសារតែយ៉ាងដូច្នេះហើយ ទើបឡើងប្រកួតឈ្នះច្រើនជាងចាញ់។ តួយ៉ាង ការប្រកួតលើកចុងក្រោយនេះ ស៊ូ វណ្ណះបានវាយឈ្នះជើងចាស់ហួន សុខនីម អ្នកប្រដាល់ក្លិបមហិទ្ធរិទ្ធតាដំបងដែក ដោយពិន្ទុ។
ម៉ន ព្រហ្មម៉ាញ គេជាអ្នកប្រដាល់ជើងខ្លាំង តែបច្ចុប្បន្នរាងស្រុតធ្លាក់ចុះ ដោយសារការហ្វឹកហាត់មិនសូវជាប់លាប់។ គេក៏មានចិត្តប្រដាល់ធំដែរ ប៉ុន្តែមានកម្លាំងស៊ុហ្វមិនសូវរឹងមាំ។ ព្រហ្មម៉ាញ វាយមិនសូវសម្រុកចូលទេ ប៉ុន្តែរាល់ការវាយចេញរបស់គេ ភាគច្រើនចំគោលដៅល្អ។ ការប្រកួតចុងក្រោយគេនេះ ម៉ន ព្រហ្មម៉ាញ វាយចាញ់ លាភ រដ្ឋា អ្នកប្រដាល់ក្លិបដីឡូតិ៍មានរិទ្ធ ដោយពិន្ទុ។ ចាំមើល រវាងស៊ូ វណ្ណះ និង ម៉ន ព្រហ្មម៉ាញ តើអ្នកណាឈ្នះ អ្នកណាចាញ់នោះ ?។
រីឯ ងួន គា អ្នកប្រដាល់ក្លិបបរាជសីហ៍ខេត្តរតនគិរី ត្រូវគេផ្គូអោយជួបប្រកួតជាមួយនួន រ៉ាថេន អ្នកប្រដាល់ក្លិបតាឯកដំបងដែកមានរិទ្ធខេត្តព្រៃវែង ។ អ្នកប្រដាល់ទាំងពីរនាក់នេះ ប្រកួតគ្នាក្នុងទម្ងន់៥៧គីឡូក្រាម ហើយសល់ ស្រស់ ក្លិបសាលវ័ន្តកីឡា ជួបប្រកួតជាមួយ គង់ វិរៈ ក្លិបយុវវាលស្បូវខណ្ឌច្បារអំពៅ ដោយប្រកួតក្នុងទម្ងន់៥១គីឡូក្រាម៕
Source: Kampuchea Thmey Daily
0 Comments