ពានរ​បស់ AFF Suzuki Cup នឹង​បង្ហាញខ្លួន​ក្នុង​រាជធានី​ភ្នំពេញ រសៀល​ថ្ងៃ​សៅរ៍​នេះ​

ពាន AFF Suzuki Cup ដែល​ប្រគល់ជូន​ក្រុម​ឈ្នះ​ជើងឯក​ប្រចាំ​កម្មវិធី​ដែល​ធំជាងគេ​ប្រចាំ​តំបន់​អាស៊ាន​រាល់ពេល​ប្រកួត​២​ឆ្នាំ​ម្តង នឹង​បង្ហាញខ្លួន​នៅ​រាជធានី​ភ្នំពេញ ប្រទេស​កម្ពុជា បាន​មុនគេ​បើ​ធៀប​នឹង​ដំណើរ​ទៅដល់​ប្រទេស​ផ្សេងៗ​ប្រចាំ​តំបន់ ខណៈ​កម្មវិធី​នេះ​មាន​ឈ្មោះថា AFF Suzuki Trophy Tour​។

​ការបង្ហាញ​របស់​ពាន​នេះ​នឹង​ធ្វើឡើង​នៅវេលា​ម៉ោង​៣​ដល់​ម៉ោង​៤​ល្ងាច ក្នុង​ថ្ងៃ​សៅរ៍ ទី​១៥ ខែកញ្ញា ឆ្នាំ​២០១៨ នៅ​ផ្សារ​ទំនើប AEON I ជាន់​ទី​១ ពោល​គឺ​ដាក់​តាំង​បង្ហាញ​ពានរង្វាន់ AFF Suzuki Cup​តែម្តង​។ លោក អ៊ុង កង​យ៉ា​និ​ត គ្រូ​ជំនួយ​ប្រចាំ​ក្រុម​ជម្រើសជាតិ​កម្ពុជា និង​បង្ហាញខ្លួន​ក្នុង​ពិធី​នេះ​ជាមួយ​ភ្ញៀវ​ពិសេស​ផ្សេងៗ បូក​ទាំង​តំណាង​អ្នក​ឧបត្ថម្ភ​ផ្សេងទៀត​។

ដំណើរ​មកកាន់​ប្រទេស​កម្ពុជា​មុនគេ​ក្នុង​ពិធី AFF Suzuki Trophy Tour នេះ​គឺ​ចំ​ពេល​ដែល​ក្រុម​ជម្រើសជាតិ​កម្ពុជា ត្រូវ​ប្រកួត​បើកឆាក​ជាមួយ​ក្រុម​ម៉ាឡេស៊ី មុនគេ​ក្នុង​វគ្គ​ជម្រុះ​តាម​ពូ​ល​សន្សំ​ពិន្ទុ​នៅ​ដើមខែ​វិច្ឆិកា​។ ចំណែក​នៅ​ខែ​បន្ទាប់​ពាន​នេះ​នឹង​ហែរ​ទៅដល់​រាជធានី​បាងកក របស់​ថៃ​,​រដ្ឋធានី​ហាណូយ របស់​វៀតណាម​,​ទីក្រុង​ចា​កាតា របស់​ឥណ្ឌូណេស៊ី​,​ម៉ានីល របស់​ហ្វីលីពីន និង​រ៉ង់​ហ្គូ​ន​រប​ស់មី​យ៉ាន់​ម៉ា ជាដើម​។

​បើ​និយាយ​ពី​ពានរង្វាន់ AFF Suzuki Cup 2018 ឆ្នាំនេះ​ពូ​ល A មាន​វៀតណាម ម៉ាឡេស៊ី មី​យ៉ាន់​ម៉ា កម្ពុជា និង​ឡាវ ខណៈ​ពូ​ល B មាន​ថៃ ឥណ្ឌូណេស៊ី ហ្វីលីពីន សិង្ហ​បុរី និង​ក្រុម​ឈ្នះ​នៅ​វគ្គ​ជម្រុះ​បឋម​គឺ​ទី​ម័​រ​ខាងកើត​។ តាម​គម្រោងការ​វគ្គ​ជម្រុះ​តាម​ពូ​ល​នេះ​នឹងធ្វើ​ឡើ​ចាប់ពី​ថ្ងៃទី​៨ ខែវិច្ឆិកា ដល់​ថ្ងៃទី​១៥​ខែធ្នូ ឆ្នាំ​២០១៨​។

ពានរង្វាន់​ជើងឯក​តំបន់​អាស៊ាន មាន​ឈ្មោះថា AFF Championship ដោយ​បង្កើត​ឡើង​តាំងពី​ឆ្នាំ​១៩៩៦ មក​ម្ល៉េះ​ដោយ​ត្រូវ​ប្រកួត​រាល់​២​ឆ្នាំ​ម្ដង ប៉ុន្តែ​កាលនោះ​ក្រុម​ឧ​ប​ត្ថម្ភ​ដោយ​ក្រុមហ៊ុន Tiger ទើប​ប្តូរ​ឈ្មោះថា AFF Tiger Cup​។ ចូលដល់​ឆ្នាំ​២០០៧ ក្រុមហ៊ុន Suzuki ទទួល​សិទ្ធិ​បាន​ឧ​ប​ត្ថម្ភ​ធំ​ដល់​ព្រឹត្តិការណ៍​ទើប​ប្តូរ​ឈ្មោះ​ទៅជា AFF Suzuki Cup មកទល់​បច្ចុប្បន្ន​។ ក្រុម​ជម្រើសជាតិ​ថៃ ធ្លាប់​ឈ្នះ​ពានរង្វាន់​នេះ​បាន​ច្រើន​ជាង​គេ​គឺ​រហូតដល់​៥​លើក ហើយ​ឈ្នះ​ចុងក្រោយ​នៅ​ឆ្នាំ​២០១៦ ថ្មីៗ​នេះ​។

សម្រាប់​កម្មវិធី​ប្រកួត​ជម្រុះ​ពូ​ល A របស់​ក្រុម​កម្ពុជា វិញ​នឹង​ប្រកួត​បើកឆាក​ប៉ះ​ក្រុម​ម៉ាឡេស៊ី នៅ​ថ្ងៃទី​៨ ខែវិច្ឆិកា នៅ​រាជធានី​ភ្នំពេញ ខណៈ​ត្រូវ​ប៉ះ​ម្ចាស់ផ្ទះ​មី​យ៉ាន់​ម៉ា នៅ​ថ្ងៃទី​១២ ខែវិច្ឆិកា នៅ​ទីក្រុង​រ៉ង់​ហ្គូ​ន រហូតដល់​ថ្ងៃទី​២០ ខែវិច្ឆិកា ក្រុម​កម្ពុជា ត្រូវ​ប៉ះ​ឡាវ នៅ​រាជធានី​ភ្នំពេញ ហើយ​នៅ​ថ្ងៃទី​២៤ ខែ​វិច្ឆិកា ​ត្រូវ​ធ្វើ​ដំណើរ​ទៅ​ប៉ះ​ម្ចាស់​ផ្ទះ​វៀត​ណាម​នៅទី​ក្រុង​ហាណូយ៕

Source: Kampuchea Thmey Daily