ភ្នំពេញ ៖ នេះជាការបញ្ជាក់នៅក្នុងសេចក្តីប្រកាសព័ត៌មានរបស់ក្រសួងការបរទេស ស្តីពីលទ្ធផលនៃទស្សនកិច្ចរបស់ សម្តេចអគ្គមហាសេនាបតីតេជោ ហ៊ុន សែន នៅសាធារណរដ្ឋសង្គមនិយមវៀតណាម ដើម្បីអញ្ជើញចូលរួមវេទិកាសេដ្ឋកិច្ចពិភពលោកស្តីពីអាស៊ានលើកទី២៧ នៅទីក្រុងហាណូយ ពីថ្ងៃទី១២-១៣ ខែកញ្ញា ឆ្នាំ២០១៨។
ក្រសួងការបរទេសបញ្ជាក់ថា តបតាមការអញ្ជើញរបស់ លោក ង្វៀន សួនហ្វ៊ុក នាយករដ្ឋមន្ត្រីនៃសាធារណរដ្ឋសង្គមនិយមវៀតណាម សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា បានដឹកនាំគណៈប្រតិភូជាន់ខ្ពស់ចូលរួម “វេទិកាសេដ្ឋកិច្ចពិភពលោកស្តីពីអាស៊ានលើកទី២៧” ដែលបានប្រព្រឹត្តទៅនៅថ្ងៃទី១២-១៣ ខែកញ្ញា ឆ្នាំ២០១៨ នៅទីក្រុងហាណូយ ក្រោមមូលបទ “អាស៊ាន ៤.០: សហគ្រិនភាព និងបដិវត្តន៍ឧស្សាហកម្មជំនាន់ទី៤” ។
វេទិកានេះ ចូលរួមដោយប្រមុខរដ្ឋ/រដ្ឋាភិបាលអាស៊ាន មន្ត្រីជាន់ខ្ពស់ និងថ្នាក់ដឹកនាំពីបណ្តា ប្រទេសក្នុងតំបន់ ព្រមទាំងអ្នកចូលរួមប្រមាណជាង ១០០០នាក់ ដែលជាមន្ត្រីពីស្ថាប័នរដ្ឋាភិបាល ធុរកិច្ច អង្គការអន្តរជាតិ និងអ្នកសិក្សាស្រាវជ្រាវនៅជុំវិញពិភពលោក ដែលបានយកឱកាសនេះ ដើម្បីផ្លាស់ប្តូរទស្សនៈ អំពីវិធីសាស្ត្រតម្រង់ទិសដំណើរការបច្ចុប្បន្ននៃបដិវត្តន៍បច្ចេកវិទ្យា និងការជំរុញថាមភាពសហគ្រិន សំដៅបម្រើការអភិវឌ្ឍដោយរលូន នៅក្នុងយុគសម័យនៃការផ្លាស់ប្តូរសេដ្ឋកិច្ច និងភូមិសាស្ត្រនយោបាយ។
នៅក្នុងពិធីបើកកិច្ចប្រជុំពេញអង្គស្តីពី “អាទិភាពអាស៊ានក្នុងបដិវត្តន៍ឧស្សាហកម្មជំនាន់ទី៤” សម្តេចតេជោនាយករដ្ឋមន្ត្រី បានលើកមតិថា អាស៊ានអាចចាប់យកនូវការអភិវឌ្ឍជាវិជ្ជមាន និងកាត់បន្ថយនូវកង្វល់នានា ដែលជាផលវិបាកនៃការរីកចម្រើនបច្ចេកវិទ្យាបច្ចុប្បន្ន តាមរយៈវិធានការមួយចំនួន គឺបង្កើតនូវចក្ខុវិស័យអាស៊ានសម្រាប់ឧស្សាហកម្មជំនាន់ទី៤ (ASEAN Vision for Industry 4.0) ប្រកបដោយបរិយាប័ន្ន និងគ្រប់ជ្រុងជ្រោយ ដោយផ្អែកលើគំនិតផ្តួចផ្ដើមដែលមានស្រាប់ របស់អាស៊ាន, រៀបចំកម្មវិធីរួមសម្រាប់កសាងធនធានមនុស្ស ដើម្បីដោះស្រាយបញ្ហាបាត់បង់ការងារ និងវិសមភាពសេដ្ឋកិច្ច និងសង្គម, ជំរុញការអភិវឌ្ឍប្រព័ន្ធទ្រទ្រង់ការស្រាវជ្រាវ និងនវានុវត្តន៍ក្នុងតំបន់ ដើម្បីពង្រឹងសមត្ថភាពសហគ្រិនក្នុងការរៀបចំគំរូធុរកិច្ចថ្មីៗ បង្កើតការងារថ្មី និងតម្រង់ទិសសេដ្ឋកិច្ចនាពេលអនាគត, បន្តកែលម្អការតភ្ជាប់ហេដ្ឋារចនាសម្ព័ន្ធទាំងផ្នែករឹង និងទន់ ក្នុងតំបន់ និងអន្តរតំបន់ ដើម្បីជាមូលដ្ឋានគ្រឹះរឹងមាំសម្រាប់ប្រជាជាតិឤស៊ាន ទាញយកផលប្រយោជន៍ពីបរិបទនៃកំណើនថ្មីក្នុងពិភពលោក។
សម្តេចតេជោនាយករដ្ឋមន្ត្រី បានចូលរួមផងដែរ ក្នុងកម្មវិធីពិសារអាហារថ្ងៃត្រង់រៀបចំដោយ លោកសាស្ត្រាចារ្យ ក្លូស ស្វប់ ស្ថាបនិក និងជាប្រធានប្រតិបត្តិវេទិកាសេដ្ឋកិច្ចពិភពលោក ដែលក្នុងឱកាសនោះ នាយកប្រតិបត្តិក្រុមហ៊ុនសំខាន់ៗមួយចំនួន មានឱកាសជួបប្រាស្រ័យសន្ទនាជាមួយប្រមុខរដ្ឋ/រដ្ឋាភិបាល និងចែករំលែកនូវគំនិតសំខាន់ៗរបស់ពួកគេលើប្រធានបទ “អាស៊ានក្នុងយុគសម័យបដិវត្តន៍ឧស្សាហកម្មជំនាន់ទី៤” ។
បន្ទាប់មក សម្តេចតេជោនាយករដ្ឋមន្ត្រី បានចូលរួមក្នុងកិច្ចប្រជុំស្តីពី “ទស្សនវិស័យថ្មីសម្រាប់តំបន់មេគង្គ” ដែលផ្តោតលើប្រធានបទមួយចំនួន ដែលជាផលប្រយោជន៍រួមដូចជា ការវិវត្តន៍ថ្មីៗ និងសមាហរណកម្មសេដ្ឋកិច្ចក្នុងតំបន់មេគង្គ ទិដ្ឋភាពដោយឡែកពីគ្នានៃប្រទេសនីមួយៗ ដែលនឹងរួមចំណែកដល់សេដ្ឋកិច្ចក្នុងតំបន់ ទម្រង់ថ្មីៗនៃសមាហរណកម្ម ដែលក្នុងនោះ ការតភ្ជាប់ឌីជីថលត្រូវបានផ្តល់សារៈសំខាន់ជាងការតភ្ជាប់រូបវ័ន្ត អាទិភាពសម្រាប់ការវិនិយោគនាពេលអនាគត លើផ្នែកហេដ្ឋារចនាសម្ព័ន្ធរឹងឆ្លងកាត់ព្រំដែន និងលទ្ធផលដែលរំពឹងថានឹងបានទទួលពីការប្រែប្រួលខាងផ្នែកហេដ្ឋារចនាសម្ព័ន្ធជាដើម។
សម្តេចតេជោនាយករដ្ឋមន្ត្រី បានចែករំលែកទស្សនសំខាន់ៗស្តីពីសមិទ្ធផល និងការប្រឈមនានាសម្រាប់តំបន់មេគង្គ ដោយបានលើកឡើងនូវភាពជាក់ស្តែងសំខាន់ៗ ដែលយើងបានចូលដល់ បដិវត្តន៍ឧស្សាហកម្មជំនាន់ទី៤ ហើយយើងកំពុងតែប្រើប្រាស់បច្ចេកវិទ្យា ដើម្បីដោះស្រាយការប្រឈមជាក់ស្តែងមួយចំនួន។ ដោយមិនគិតដល់និន្នាការថ្មីនេះ ទស្សនៈវិស័យ និងការប្រាស្រ័យទាក់ទងរវាង កម្ពុជានិងប្រទេសជិតខាងក្នុងតំបន់មេគង្គ ព្រមទាំងជាមួយប្រទេសនៅក្រៅតំបន់ គឺមិនមានអ្វីប្រែប្រួលទេ។
សម្តេចតេជោនាយករដ្ឋមន្ត្រី បានសង្កត់ធ្ងន់ជាពិសេសអំពីសារៈសំខាន់ជាអាទិភាពនៃការតភ្ជាប់ ទាំងការតភ្ជាប់រូបវន្ត និងឌីជីថល ដើម្បីប្រទេសទាំងអស់អាចធ្វើការរួមគ្នាទៅតាមមធ្យោបាយជាក់ស្តែង។ សម្តេចតេជោ បានគូសបញ្ជាក់បន្ថែមអំពីទំនាក់ទំនងរវាងសេដ្ឋកិច្ច និងចីរភាពបរិស្ថាន និងការគ្រប់គ្រងគ្រោះមហន្តរាយ ហើយនិងការជំរុញការសម្រួលពាណិជ្ជកម្ម និងការធ្វើសមាហរណកម្មនីតិវិធីច្បាប់តំបន់។
ក្នុងឱកាសអញ្ជើញចូលរួមវេទិកានេះ សម្តេចតេជោនាយករដ្ឋមន្ត្រី បានជួបពិភាក្សាទ្វេភាគីជាមួយ លោក ង្វៀន សួនហ្វ៊ុក នាយករដ្ឋមន្ត្រីនៃសាធារណរដ្ឋសង្គមនិយមវៀតណាម លោក ថោងលូន ស៊ីស៊ូលីត នាយករដ្ឋមន្ត្រីនៃសាធារណរដ្ឋប្រជាធិបតេយ្យប្រជាមានិតឡាវ និងលោក រ៉ានីល វីកក្រេមមេស៊ីងហេ នាយករដ្ឋមន្ត្រីស្រីលង្កា និងទទួលការចូលជួបសម្តែងការគួរសមដោយលោក តារ៉ូ កូណូ រដ្ឋមន្រី្តការបរទេសជប៉ុន។ ជំនួបទាំងនេះ បានផ្តោតលើការពង្រឹងពង្រីកកិច្ចសហប្រតិបត្តិការទ្វេភាគី ហើយទន្ទឹមនេះក៏មានការផ្លាស់ប្តូរយោបល់លើបញ្ហាដែលមានការយកចិត្តទុកដាក់រួមគ្នាផងដែរ។
សម្តេចតេជោនាយករដ្ឋមន្ត្រី ក៏បានទទួលការចូលជួបសម្តែងការគួរសមដោយលោកសាស្ត្រាចារ្យ ក្លូស ស្វប់ ស្ថាបនិក និងជាប្រធានប្រតិបត្តិវេទិកាសេដ្ឋកិច្ចពិភពលោក៕
Source: Kampuchea Thmey Daily
0 Comments