ភ្នំពេញ ៖ ភាគីនិយោជក ភាគីសហជីពនិងភាគីរាជរដ្ឋាភិបាលបានបង្ហាញនូវតួលេខប្រាក់ឈ្នួលអប្បបរមាកម្មករនិយោជិតសម្រាប់ឆ្នាំ២០១៩ខុសៗគ្នាគឺតួលេខទាបបំផុត១៧៥និងខ្ពស់បំផុត១៩២ដុល្លារអាមេរិក។
តែទោះយ៉ាងណាក៏ដោយតួលេចនេះនៅមិនទាន់សម្រេចជាផ្លូវការទេដោយរង់ចាំបើកកិច្ចប្រជុំពិភាក្សា លើកទី៣នៅសប្តាហ៍ក្រោយនេះដើម្បីចរចាស្វែងរកតួលេខ ប្រាក់ឈ្នួលអប្បបរមាមួយដែលប្រកបដោយលក្ខណៈវិទ្យាសាស្ត្រ ហើយអាចទទួលយកបានពីគ្រប់ភាគីទាំងអស់។
លោក ហេង សួរ អនុប្រធានលេខាធិការដ្ឋានគណៈកម្មការប្រឹក្សាការងារបានមានប្រសាសន៍ប្រាប់ដល់ក្រុមអ្នកព័ត៌មានក្រោយបញ្ចប់កិច្ចប្រជុំត្រីភាគីកាលពីព្រឹកថ្ងៃទី១៤ខែកញ្ញាឆ្នាំ២០១៨ថា «ថ្ងៃនេះក្រុមការងារបច្ចេកទេសបានបន្តកិច្ចពិភាក្សា និងលើកឡើងពីគោលជំហររបស់ខ្លួន នៃតួលេខប្រាក់ឈ្នួលអប្បបរមាសម្រាប់ឆ្នាំខាងមុខ ដោយក្នុងនោះភាគីសហជីពតំណាងឲ្យកម្មករនិយោជិតជ្រើសយកតួរលេខ១៩២ដុល្លារ, ភាគីនិយោជក១៧៥ដុល្លារ ដោយឡែកភាគីរដ្ឋាភិបាលសម្រេចដាក់តួរលេខចំនួន១៧៧.៥៧ដុល្លារអាមេរិក»។
លោកហេង សួរបានបន្តថា ចំពោះភាគីសហជីពនិងភាគីនិយោជកផ្តើមពីតួលេខទាបឡើងម្តងបន្តិចៗប៉ុន្តែរាល់តួលេខណាមួយដែលបង្ហាញដោយភាគីនីមួយៗក្រៅផ្លូវការក្នុងរយៈពេលប៉ុន្មានថ្ងៃនេះនៅមិនទាន់ក្លាយជាតួលេខផ្លូវការដែលតំណាងឲ្យភាគីរបស់ខ្លួននៅឡើយទេ ខណៈដែលភាគីនីមួយៗព្យាយាមស្តាប់នូវធាតុចូលពាក់ព័ន្ធជាមួយនឹងលក្ខណៈវិនិច្ឆ័យតាមបែបសង្គមនិងសេដ្ឋកិច្ច។
នៅក្នុងកិច្ចប្រជុំនោះលោក ហេង សួរ បានលើកឡើង ពីចំណុចមួយចំនួន សម្រាប់ឲ្យភាគីទាំងពីរ ធ្វើការពិចារណា ដើម្បីឲ្យការចរចានេះ ទទួលបាននូវតួលេខ ប្រាក់ឈ្នួលអប្បបរមាមួយ ដែលប្រកបដោយលក្ខណៈវិទ្យាសាស្ត្រ ហើយអាចទទួលយកបានពីគ្រប់ភាគី និងជាមូលដ្ឋាន ដល់គណៈកម្មការប្រឹក្សាការងារ ក្នុងការប្រជុំសម្រេច នៅដើមខែតុលាខាងមុខនេះ។
ចំណែកលោក ហ្វា សាលី ប្រធានសម្ព័ន្ធសហជីពជាតិ បានបញ្ជាក់ដែរថា តួលេខពិតប្រាកដដែលគ្រោងនឹងបង្ហាញក្នុងកិច្ចប្រជុំលើកទី៣នេះ សម្រាប់ភាគីសហជីពមានចំនួន១៩២ដុល្លារ រីឯភាគីរបស់រដ្ឋាភិបាលមានចំនួន ១៧៧ដុល្លារ។
លោកបន្ថែមទៀតថា ទាក់ទងកិច្ចប្រជុំប្រាក់ឈ្នួលឆ្នាំ២០១៩ អាចនឹងបញ្ចប់យ៉ាងហោចត្រឹមចុងខែកញ្ញានេះដោយសារភាគីនីមួយៗមានភាពចាស់ទុំនិងយោគយល់គ្នាច្រើន។
គួរបញ្ជាក់ថា ការចរចាប្រាក់ឈ្នួលនេះ ក៏នឹងបន្តការប្រើប្រាស់លក្ខណៈវិនិច្ឆ័យបែបសង្គមនិងសេដ្ឋកិច្ច ដែលក្នុងនោះរួមមាន ស្ថានភាពគ្រួសារ អត្រាអតិផរណា ការចំណាយក្នុងការរស់នៅ ផលិតភាព ភាពប្រកួតប្រជែង របស់ប្រទេស ស្ថានភាពទីផ្សារការងារ និងកម្រិតចំណេញរបស់វិស័យក៏ដូចជាបន្ទាត់ភាពក្រីក្រ សម្រាប់ធ្វើជាមូលដ្ឋានក្នុងការពិភាក្សាប្រាក់ឈ្នួលព្រមទាំងលើកអនុសាសន៍ដល់គណៈកម្មការប្រឹក្សាការងារដើម្បីពិនិត្យសម្រេច។
លោក កាំង ម៉ូនីកា អគ្គលេខាធិការរងនៃសមាគមរោងចក្រកាត់ដេរកម្ពុជាធ្លាប់បានបង្ហាញនូវជំនឿថាការចរចាប្រាក់ឈ្នួលនេះនឹងប្រព្រឹត្តិធម្មតាដូចបណ្តាឆ្នាំមុនៗដែរដោយសារតែការចចារនេះគឺផ្អែកទៅលើរូបមន្តដែលធ្លាប់បានប្រើចាប់តាំងពីឆ្នាំ២០១៥កន្លងទៅនេះ។
លោកបានបន្តថា សមាគមនឹងត្រៀមដាក់សំណើ និង សំណូមពរមួយចំនួនទៅរាជរដ្ឋាភិបាលបន្ទាប់ពីកិច្ចប្រជុំត្រីភាគីរួច។
លោកបណ្ឌិត អ៊ិត សំហេង រដ្ឋមន្ត្រីក្រសួងការងារនិងបណ្តុះបណ្តាលវិជ្ជាជីវៈនិងជាប្រធានគណៈកម្មការប្រឹក្សាការងារសង្ឃឹមថាឆ្នាំនេះការជែកពិភាក្សាប្រាក់ឈ្នួលនឹងប្រព្រឹត្តិទៅដោយរលូនក្នុងស្មារតីយោគយល់គ្នានិងឈ្នះៗទាំងអស់គ្នា ហើយយើងនៅតែប្រកាន់យកយុទ្ធសាស្ត្រពិភាក្សាៗរហូតដល់យើងអាចរកបាននូវការភាពស្រុះស្រួលគ្នាមួយឬមួយអាចទៅរកតួលេខមួយដែលអាចខិតខជិតរកគ្នានិងមានចំនួនតិចបំផុតដើម្បីយកមកអនុវត្តចុងក្រោយ។
លោករដ្ឋមន្ត្រីបានឲ្យដឹងទៀតថា «ចំពោះលទ្ធផលនៃប្រាក់ឈ្នួលអប្បបរមាសម្រាប់ឆ្នាំ២០១៩នឹងចេញនៅមុនពេលពិធីបុណ្យភ្ជុំបិណ្ឌខាងមុខនេះហើយក្មួយៗកម្មករកម្មាការិនីនឹងទទួលបានដំណឹងល្អមុនពិធីបុណ្យភ្ជុំបិណ្ឌហើយសង្ឃឹមថា ប្រាក់ឈ្នួលនឹងប្រសើរជាងឆ្នាំ២០១៨ទៅទៀត»។
ចំណែកលោក ឧកញ៉ា ណាង សុធី អនុប្រធានគណៈកម្មការប្រឹក្សាការងារនិងតំណាងឲ្យភាគីនិយោជកក៏មានក្តីសង្ឃឹមថា ប្រាក់ឈ្នួលអប្បបរមាសម្រាប់ឆ្នាំ២០១៩នេះភាគីនីមួយៗនឹងរកឃើញតួលេខមួយយ៉ាងល្អដែលគ្រប់ភាគីទាំងអស់អាចទទួលយកបានទាំងថៅកែរោងចក្រក៏ដូចជាកម្មករនិយោជិត។
សូមរំលឹកថា ប្រាក់ឈ្នួលអប្បបរមាផ្នែកវាយនភណ្ឌ កាត់ដេរនិងផលិតស្បែកជើងសម្រាប់សម្រាប់ឆ្នាំ២០១៨នេះមានចំនួន១៧០ដុល្លារអាមេរិកនេះ នៅមិនទាន់គិតប្រាក់អត្ថប្រយោជន៍ផ្សេងៗទៀតឡើយ៕
Source: Kampuchea Thmey Daily
0 Comments