លី​គ​កំពូល​កម្ពុជា​ ៖​ ណាហ្គា​វើ​ល ប៉ះ​ទ័ព ហើយ​វិសាខា ជួប​ប៉ូលីស និង​ព្រះខ័ន​រាជ​ស្វាយរៀង​ទទួល​សូល​ទី​ឡួ​អង្គរ​

ក្រុមបាល់ទាត់​ណាហ្គា​វើ​ល ត្រូវ​ប៉ះ​ក្រុម​ក្រសួងការពារជាតិ (​ទ័ព​) ហើយ​ក្រុម​វិសាខា ជួប​ក្រុម​អគ្គស្នងការដ្ឋាន​នគរ​បាល​ជាតិ​(​ប៉ូលីស​) និង​ក្រុម​ព្រះខ័ន​រាជ​ស្វាយរៀង​ទទួល​ក្រុម​សូល​ទី​ឡួ​អង្គរ នៅ​ល្ងាច​ថ្ងៃ​សៅរ៍ ទី​១៥ ខែកញ្ញា ឆ្នាំ​២០១៨ លើ​២​ទីលាន​ផ្សេងគ្នា ក្នុង​សប្ដាហ៍​ទី​២០ នៃ​ពានរង្វាន់​លីគ​កំពូល​កម្ពុជា (Metfone Cambodian League 2018)​។



*​ណាហ្គា​វើ​ល ប៉ះ​ក្រសួងការពារជាតិ
ក្រុម​ណាហ្គា​វើ​ល ត្រូវ​ប៉ះ​ក្រុម​ក្រសួងការពារជាតិ នៅវេលា​ម៉ោង​៣​រសៀល​លើ​ទីលាន​កីឡដ្ឋាន​កងយោធពល​ខេមរភូមិន្ទ (​ស្តា​ត​ចាស់​) ហើយ​ប្រកួត​នេះ​មាន​ផ្សាយ​ផ្ទាល់​តាម​ប៉ុស្តិ៍ BTV News​។ ក្រុម​ណាហ្គា​វើ​ល​កំពុង​ឈរ​លេខ​១ ក្នុង​តារាង​រួម ក្រោយ​ប្រកួត​ឈ្នះ​បាន​១៥​លើក ស្មើគ្នា​២​លើក និង​ចាញ់​២​លើក មាន​៤៧​ពិន្ទុ​ក្នុង​ដៃ​។ លោក មាស ចាន់ណា គ្រូបង្វឹក​កាន់​អាជ្ញា​ប័​ណ្ណ AFC A License បាន​អះអាង​ថា ​លោក នឹង​ព្យាយាម​ប្រមូលផ្ដុំ​អារម្មណ៍​កីឡាករ​ឲ្យ​បាន​ល្អ និង កែប្រែ​ចំណុច​ខ្វះខាត​ដើម្បី​រក្សា​កៅអី​កំពូល​តារាង​រហូតដល់​ចប់​រដូវ​កាល​។



កីឡាករ​របួស​និង​កីឡាករ​មួយចំនួន​ចាកចេញ​ជា​បញ្ហា​ប្រឈម​របស់​ក្រុម​ក្រសួងការពារជាតិ នា​ពេល​បច្ចុប្បន្ន​។ ក្នុង​ជើង​ទី​២​នេះ​ក្លិប​បាន​បន្ថែម​កីឡាករ​សំខាន់ៗ​មួយចំនួន​ដើម្បី​ទប់ស្កាត់​ការ​របូត​ពិន្ទុ​ពី​ដៃ ខណៈ​ក្រុម​នេះ​នៅសល់​ឱកាស​ប្រជែង​កំពូល​តារាង​នៅឡើយ​។ ងាក​ទៅ​មើល​១៩​ប្រកួត​មកនេះ​ក្រុម​ក្រសួងការពារជាតិ ឈ្នះ​បាន​១៣​លើក ស្មើ​២​លើក​និង​ចាញ់​៤​លើក ឈរ​លេខ​៤ បណ្តោះអាសន្ន​។

*​វិសាខា ប៉ះ​អគ្គស្នងការដ្ឋាន​នគរ​បាល​ជាតិ
ក្រុមបាល់ទាត់​វិសាខា ត្រូវ​ប៉ះ​ក្រុម​អគ្គស្នងការដ្ឋាន​នគរ​បាល​ជាតិ នៅវេលា​ម៉ោង​៦​ល្ងាច​លើ​ទីលាន​កីឡដ្ឋាន​ស្តា​ត​ចាស់​ដូចគ្នា ខណៈ​ការប្រកួត​នេះ​នឹងមាន​ផ្សាយ​ផ្ទាល់​តាម​ប៉ុស្តិ៍ BTV News ផងដែរ​។ ក្រុម​វិសាខា កំពុងតែ​ត្រូវការ​ពិន្ទុ​ជា​ខ្លាំង​ដើម្បី​ប្រជែង​នៅ​តំបន់​កំពូល​តារាង​ក្រោយ​ប្រកួត​បាន​១៩​លើក​ឈ្នះ​បាន​១៣​លើក ស្មើគ្នា​បាន​៣​លើក​និង​ចាញ់​៣​លើក​មាន​៤២​ពិន្ទុ និង​កំពុងតែ​ឈរ​ចំណាត់ថ្នាក់​លេខ​៣​បណ្តោះអាសន្ន​ក្នុងចំណោម​ក្លិប​ទាំង​១២​។ លោក ហុក សុ​ជី​វ័​ន្ត គ្រូបង្វឹក​របស់​វិសាខា បាន​រំពឹងថា ​កូនក្រុម​អាច​បន្ត​ជ័យជម្នះ​ថែមទៀត​ដើម្បី​ដណ្តើម​កៅអី​កំពូល​តារាង​។



ក្រុម​ប៉ូលីស វិញ​កំពុង​ឈរ​លេខ​៧​ក្នុងចំណោម​ក្លិប​ទាំង​១២ បន្ទាប់ពី​ឈ្នះ​បាន​៧​លើក ស្មើគ្នា​៣​លើក​និង​ចាញ់​៩​លើក​។ លោក សារ៉េត ស៊ីដន គ្រូបង្វឹក​ថ្មី​ក្នុង​ក្រុម​នេះ​រំពឹងថា​កូនក្រុម​នឹងធ្វើ​បានល្អ​បន្ថែមទៀត​ក្នុង​ប្រកួត​នៅពេល​ខាងមុខៗ ស្របពេល​មាន​កីឡាករ​ស្ទើរតែ​ពាក់កណ្ដាល​ក្រុម ទើបតែ​បញ្ចប់​បំពេញ​កាតព្វកិច្ច​នៅ​សាលា​បណ្ឌិតសភា​នគរបាល​ជាតិ​។ ម្យ៉ាងទៀត​ក្លិប​មាន​កីឡាករ​សំខាន់​ម្នាក់​បាន​ផ្ទេរចេញ​គឺ ទិ​ត្យ ឌី​ណា ទៅ​ចូលរួម​ក្រុម​វិសាខា ខណៈ​ក្លិប​បាន​បន្ថែម​កម្លាំង​ចំនួន​២​នាក់​វិញ​គឺ សុះ ប្រុស​ហ៊ីម និង​កីឡាករ​កូរ៉េខាងត្បូង No Dae-ho​។

*​ព្រះខ័ន​រាជ​ស្វាយរៀង ប៉ះ​សូល​ទី​ឡូ​អង្គរ
ក្រុមបាល់ទាត់​ព្រះខ័ន​រាជ​ស្វាយរៀង ត្រូវ​ប៉ះ​ក្រុម​សូល​ទី​ឡូ​អង្គរ នៅ​វេលា​ម៉ោង​៦​ល្ងាច​លើ​ទីលាន​កីឡដ្ឋាន​ខេត្តស្វាយរៀង​។ ប្រកួត​នេះ​មាន​ផ្សាយ​ផ្ទាល់​តាម​ទំព័រ​ហ្វេ​ស​ប៊ុ​ករ​បស់ CNCC​។ ក្រុមព្រះ​ខ័ន​រាជ​ស្វាយរៀង មួយ​រយៈ​ចុងក្រោយ​នេះ​ហាក់​ជួប​បញ្ហា​រឿង​កីឡាករ​របួស​និង​កីឡាករ​សំខាន់ៗ​ជាប់​ពិន័យ​ពី​សំណាក់​គណៈកម្មការ​វិន័យ​របស់​សហព័ន្ធ​កីឡាបាល់ទាត់​កម្ពុជា​។ លោក Conor Nestor គ្រូ​បង្គោល​ក្លិប​ព្រះខ័ន​រាជ​ស្វាយរៀង សរសើរ​កូនក្រុម​ក្នុង​ប្រកួត​ចុងក្រោយ​ដែល​ធ្វើ​បានល្អ​។ យ៉ាងណា​លោក​បាន​ដោះដូរ​កីឡាករ​គួរ​ឲ្យ​ភ្ញាក់ផ្អើល​មួយ​ដើម្បី​ត្រៀម​ជើង​ទី​២​នេះ​។ ក្រុមព្រះ​ខ័ន​រាជ​ស្វាយរៀង កំពុងតែ​ឈរ​ចំណាត់ថ្នាក់​លេខ​៦​បណ្តោះអាសន្ន​ក្នុងចំណោម​ក្លិប​ទាំង​១២ បន្ទាប់ពី​ឈ្នះ​បាន​៧​លើក​ស្មើគ្នា​៣​លើក​និង​ចាញ់​៩​លើក​។



ចំណែក​ក្រុម​សូល​ទី​ឡូ​អង្គរ ក្រោម​ការដឹកនាំ​របស់​គ្រូបង្វឹក​ជនជាតិ​ជប៉ុន Yuki Matsuda កំពុងតែ​ត្រូវការ​ពិន្ទុ​គេច​ឲ្យ​ផុត​ពី​តំបន់​គ្រោះថ្នាក់​។ គ្រូបង្វឹក​រូប​នេះ ​ទើបតែ​បញ្ចប់​វគ្គ​សិក្សា​គ្រូបង្វឹក​បាល់ទាត់​កម្រិត AFC A License នៅ​ប្រទេស​សិង្ហ​បុរី កាលពីដើមឆ្នាំ​។ ១៩​ប្រកួត​កន្លងមក​ក្រុម​សូល​ទី​ឡូ​អង្គរ ឈ្នះ​បាន​៤​លើក ស្មើគ្នា​៤​លើក​និង​ចាញ់​ដល់​ទៅ​១១​លើក​។

ចំណែក​៣​ប្រកួត​ផ្សេងទៀត​ប្រចាំ​សប្តាហ៍​ទី​២០​នេះ​នឹង​បន្ត​ធ្វើ​ឡើង​នៅ​ថ្ងៃអាទិត្យ ទី​១៦ ខែកញ្ញា ឆ្នាំ​២០១៨ ក្រុម​វេ​ស្ទើ​ន​ភ្នំពេញ ប៉ះ​អង្គ​រថា​យ​ហ្គឺ​រ នៅវេលា​ម៉ោង​៣​រសៀល​លើ​ទីលាន​កីឡដ្ឋាន​វេ​ស្ទើ​ន មាន​ផ្សាយ​ផ្ទាល់​តាម​ហ្វេ​ស​ប៊ុ​ក​របស់​កម្ពុ​ជាថ្មី ហើយ​ក្រុម​អាស៊ី​អឺរ៉ុប ទទួល​ក្រុម​ភ្នំពេញ​ក្រោ​ន នៅវេលា​៣​រសៀល​លើ​ទីលាន​កីឡដ្ឋាន AEU Sport Park និង​ក្រុម​បឹងកេត ប៉ះ​អគ្គីសនី​កម្ពុជា នៅ​ម៉ោង​៦​ល្ងាច​លើ​ទីលាន​ពហុ​កីឡដ្ឋាន​ជាតិ មាន​ផ្សាយ​ផ្ទាល់​តាម​ប៉ុស្តិ៍ BTV News ដូចគ្នា​៕

Source: Kampuchea Thmey Daily