ភ្នំពេញ ៖ លោកអធិការរងខណ្ឌពោធិ៍សែនជ័យម្នាក់ បានជួបឧប្បត្តិហេតុគ្រោះថ្នាក់ចរាចរណ៍ ដោយជិះម៉ូតូបុកឡានបើកឆ្លងផ្លូវបណ្ដាលឲ្យរងរបួសបាក់ជើងស្តាំម្ខាង និង បែកមុខមាត់ធ្ងន់ធ្ងរខណៈជិះម៉ូតូត្រឡប់មកពីកន្លែងធ្វើការវិញ កាលវេលាម៉ោង៦ល្ងាច ថ្ងៃទី៧ ខែកញ្ញា ឆ្នាំ២០១៨ នៅតាមបណ្ដោយផ្លូវទំនប់កប់ស្រូវ ជិតម្តុំផ្លូវរថភ្លើងក្នុង ភូមិចែងចែង សង្កាត់សំរោងក្រោម ខណ្ឌពោធិ៍សែនជ័យ។
រថយន្តបង្កម៉ាកហីយ៉ាន់ដាយ ពណ៌ខៀវ ពាក់ស្លាកភ្នំពេញ2V-0823 បើកបរឆ្លងផ្លូវពីកើតទៅលិច។ ចំណែកជនរងគ្រោះជិះម៉ូតូសេ១១០(បិច) ពណ៌ខ្មៅ ពាក់ស្លាកលេខព្រៃវែង1A-7090 បើកបរក្នុងទិសដៅពីត្បូងទៅជើង។
ជនរងគ្រោះ មានឈ្មោះ ពាន សុខុម អាយុជាង៥០ឆ្នាំ មានតួនាទីជាអធិការរងនៃអធិការដ្ឋាននគរបាលខណ្ឌពោធិ៍សែនជ័យ រស់នៅសង្កាត់ត្រពាំងក្រសាំងខណ្ឌពោធិ៍សែនជ័យរាជធានីភ្នំពេញ។
តាមប្រភពព័ត៌មានពី ជនរងគ្រោះបានឲ្យដឹងថា នៅមុនពេលកើតហេតុរូបគាត់បន្ទាប់ពីបញ្ចប់ម៉ោងការងារបានធ្វើដំណើរចេញពីអធិការដ្ឋានត្រឡប់ទៅផ្ទះវិញ ដោយជិះម៉ូតូម្នាក់ឯង ខណៈកំពុងបើកលឿនគួរសមផងនោះ មកដល់ចំណុចកើតហេតុ ស្រាប់តែមានរថយន្តមួយគ្រឿងបានបើកឆ្លងផ្លូវមិនបានប្រុង ប្រយ័ត្នមើលឆ្វេងមើលស្តាំត្រូវបានរូបគាត់ ជាន់ហ្វ្រាំងមិនជាប់បុកចំពាក់កណ្តាលតួរថយន្ត បណ្តាលឲ្យជាប់ម៉ូតូជាមួយរថយន្ដហើយជនរងគ្រោះបានរងរបួសបាក់ជើងខាងស្ដាំនិងបែកប្រអប់ មាត់រងរបួសយ៉ាងធ្ងន់ធ្ងរ។
ប្រភពព័ត៌មានពីប្រជាពលរដ្ឋនៅកន្លែងកើតហេតុក៏បានឲ្យដឹងដែរថា ខណៈពេល គ្រោះថ្នាក់ភ្លាមៗ ជនរងគ្រោះត្រូវបានប្រជាពលរដ្ឋនៅក្បែរកន្លែងកើតហេតុបានជួយលើកជនរងគ្រោះចេញ ដើម្បីសង្គ្រោះបឋមហើយជនរងគ្រោះ បានសំពះអគុណបងប្អូនប្រជាពលរដ្ឋដែលជួយសង្គ្រោះផងដែរ តែប្រជាពលរដ្ឋមិនដឹងថា ជនរងគ្រោះជាលោកអធិការរងខណ្ឌពោធិ៍សែនជ័យផងឡើយ។
បន្ទាប់មកជនរងគ្រោះត្រូវបានសាមុយឯកជន សម្ភពសុធារិទ្ធបែកចានមកដឹកយកទៅសង្គ្រោះភ្លាមៗផងដែរតែដោយជនរងគ្រោះរងរបួសធ្ងន់ធ្ងរពេក ទើបខាងមន្ទីរពេទ្យមិនមានសមត្ថភាពព្យាបាលហើយបានបញ្ជូនជនរងគ្រោះទៅ មន្ទីរពេទ្យព្រះកុសុមៈដើម្បីព្យាបាលបន្ត។
ចំណែកតៃកុងរថយន្តត្រូវបានប្រជាពលរដ្ឋឃាត់ខ្លួននិងប្រគល់សមត្ថកិច្ចនគរបាលប៉ុស្តិ៍សំរោងក្រោម យកទៅឃុំភ្លាមៗផងដែរ។
ក្រោយពេលកើតហេតុកម្លាំងផ្នែកជំនាញចរាចរណ៍ខណ្ឌពោធិ៍សែនជ័យបានទៅដល់ ហើយបានប្រគល់ឲ្យជំនាញចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញធ្វើការវាស់វែងយកម៉ូតូនិងរថយន្ដបង្កព្រមទាំងអ្នកបើកបរទៅជំនាញផ្នែកចរាចរកក្រុងដើម្បីរង់ចាំធ្វើ ការដោះស្រាយគ្នានៅពេលក្រោយ៕
Source: Kampuchea Thmey Daily
0 Comments