ភ្នំពេញ ៖ ឧត្តមក្រុមប្រឹក្សាពិគ្រោះ និងផ្តល់យោបល់ ដែលបង្កើតឡើងដោយនាយករដ្ឋមន្ត្រីកម្ពុជានោះ បានចេញជារូបរាងផ្លូវការហើយ តាមរយៈព្រះរាជក្រឹត្យចុះថ្ងៃទី០៦ ខែកញ្ញា ឆ្នាំ២០១៨ ដែលព្រះរាជក្រឹត្យនេះ មាន៧ជំពូក និង២១មាត្រា ស្មើនឹង៧ទំព័រ។
តាមព្រះរាជក្រឹត្យរបស់ព្រះករុណា ព្រះបាទសម្ដេច ព្រះបរមនាថ នរោត្ដម សីហមុនី ព្រះមហាក្សត្រនៃព្រះរាជាណាចក្រកម្ពុជាបានឲ្យដឹងថា ឧត្តមក្រុមប្រឹក្សាពិគ្រោះ និងផ្តល់យោបល់នេះ បង្កើតឡើងក្នុងគោលបំណងលើកស្ទួយ របបនយោបាយប្រជាធិបតេយ្យ សេរីពហុបក្ស ដើម្បីប្រមូលធាតុចូលនៃទស្សនៈពហុគំនិត ជាប្រយោជន៍ដល់ការស្ថាបនាជាតិ។ ឧត្តមក្រុមប្រឹក្សាពិគ្រោះ និងផ្ដល់យោបល់ មានការចូលរួមពីថ្នាក់បក្សនយោបាយទាំងឡាយ ដែលបានចូលរួមនៅក្នុងការបោះឆ្នោតជ្រើសតាំងតំណាងរាស្ត្រនីតិកាលទី៦ ហើយការចួលរួមរបស់គណបក្សនយោបាយឈរលើគោលការណ៍ស្ម័គ្រចិត្តរបស់សាមីគណបក្សនីមួយនីមួយៗ។
ព្រះរាជក្រឹត្យបញ្ជាក់ថា គណបក្សស្ថាបនិក ដែលប្រើក្នុងព្រះរាជក្រឹត្យនេះ សំដៅដល់គណបក្សចំនួន១៦ ក្នុងចំណោមគណបក្សនយោបាយទាំង២០ ដែលបានចូលរួមការបោះឆ្នោតជ្រើសតាំងតំណាងរាស្ត្រនីតិកាលទី៦ នៃរដ្ឋសភា និងបានចូលរួមក្នុងការប្រជុំដំបូងជាមួយប្រមុខរាជរដ្ឋាភិបាលកាលពីថ្ងៃទី២១ ខែសីហា ឆ្នាំ២០១៨។ ឧត្តមក្រុមប្រឹក្សាពិគ្រោះ និងផ្ដល់យោបល់ ជាយន្តការពិគ្រោះ និងផ្ដល់យោបល់របស់គណបក្សនយោបាយជូនរាជរដ្ឋាភិបាលក្រៅក្របខណ្ឌសភា ក្នុងគោលដៅលើកស្ទួយប្រសិទ្ធភាពការងារ ដើម្បីជាប្រយោជន៍ដល់ការបម្រើសេវាប្រជាជន និងការអភិវឌ្ឍសង្គមជាតិ ប្រកបដោយសក្តានុពល។ ឧត្តមក្រុមប្រឹក្សាពីគ្រោះ និងផ្ដល់យោបល់ មានអាណត្តិ ដូចអាណត្តិរបស់រាជរដ្ឋាភិបាលនីតិកាលទី៦ដែរ។
សមាសភាពរបស់ឧត្តមក្រុមប្រឹក្សាពិគ្រោះ និងផ្ដល់យោបល់ ត្រូវបានចាត់តាំងដោយគណបក្សនយោបាយ ដោយអនុលោមតាមមាត្រា២ នៃព្រះរាជក្រឹត្យនេះ ហើយដែលសាមីគណបក្សនយោបាយនីមួយៗត្រូវបញ្ជូនប្រតិភូចំនួនពីររូប។ ក្នុងករណីមានគណបក្សនយោបាយណាមួយក្រៅពីគណបក្សស្ថាបនិកសុំចូលរួម ក្នុងឧត្តមក្រុមប្រឹក្សាពិគ្រោះ និងផ្ដល់យោបល់បន្ទាប់ពីព្រះរាជក្រឹត្យនេះ ចូលជាធរមានគណបក្សនយោបាយនោះ ត្រូវដាក់ពាក្យស្នើសុំជាផ្លូវការ និងត្រូវមានការយល់ព្រមពីនាយករដ្ឋមន្ត្រី។ ក្រោយពីមានការយល់ព្រមពីនាយករដ្ឋមន្ត្រីស្ដាប់បក្សនយោបាយនោះ ត្រូវបញ្ជូនប្រតិភូចំនួនពីររូបជាតំណាងមកចូលរួម។
ប្រតិភូគណបក្សនយោបាយមានសមាសភាពចំនួន២រូប គឺ១រូបជាប្រធានប្រតិភូមានឋានៈស្មើទេសរដ្ឋមន្ត្រី និង១រូបទៀត ជាអនុប្រធានប្រតិភូ មានឋានៈស្មើរដ្ឋមន្ត្រី។ ប្រតិភូគណបក្សនយោបាយម្នាក់ៗ របស់ឧត្ដមក្រុមប្រឹក្សាពិគ្រោះ និងផ្ដល់យោបល់មានតួនាទីជាទីប្រឹក្សារាជរដ្ឋាភិបាលផងដែរ។ ប្រតិភូគណបក្សនយោបាយ គឺជាប្រធាន អនុប្រធាន ឬអគ្គលេខាធិការនៃគណបក្សនយោបាយសាមីនីមួយៗ។ ក្នុងករណីគណបក្សចាត់តាំងឥស្សរជនកំពូលរបស់ខ្លួនផ្សេងពីនេះ តម្រូវឲ្យមានការយល់ព្រមពីនាយករដ្ឋមន្ត្រី។
ឧត្តមក្រុមប្រឹក្សាពិគ្រោះ និងផ្ដល់យោបល់ ជួបប្រជុំពីគ្រោះ និងផ្លាស់ប្ដូរយោបល់រៀងរាល់មួយខែម្តង តាមការកោះប្រជំពីប្រធានក្រុមប្រឹក្សា។ ឧត្តមក្រុមប្រឹក្សាពិគ្រោះ និងផ្ដល់យោបល់ ជួបប្រជុំពិគ្រោះ និងផ្លាស់ប្ដូរយោបល់ជាមួយនាយករដ្ឋមន្ត្រីជារៀងរាល់៦ខែម្តង តាមការកោះប្រជុំរបស់នាយករដ្ឋមន្ត្រី។ ក្នុងករណីចាំបាច់ក្នុងចន្លោះ៦ខែ ឧត្តមក្រុមប្រឹក្សាពិគ្រោះ និងផ្ដល់យោបល់ អាចជួបប្រជុំពិគ្រោះ និងផ្លាស់ប្ដូរយោបល់ ជាសាមញ្ញជាមួយនាយករដ្ឋមន្ត្រីតាមការស្នើសុំពីប្រតិភូគណបក្សចំនួនចំនួនមួយភាគបីយ៉ាងតិច។
ដោយឡែកនៅជំពូកទី៤ បានបញ្ជាក់ថា ឧត្តមក្រុមប្រឹក្សាពិគ្រោះ និងផ្ដល់យោបល់ មានភារកិច្ចចម្បងធំចំនួន៣ គឺទី១, ផ្ដើមគំនិត ឬផ្ដល់យោបល់លើការរៀបចំគោលនយោបាយនានារបស់រាជរដ្ឋាភិបាលក្រៅក្របខណ្ឌសភា ដែលមានចែងក្នុងមាត្រា១១ នៃរាជក្រឹត្យនេះ។ទី២, ផ្ដើមគំនិតតាក់តែង ឬផ្ដល់យោបល់លើការរៀបចំធ្វើសេចក្តីព្រាងច្បាប់ និងសេចក្តីព្រាងលិខិតបទដ្ឋានគតិយុត្តផ្សេងទៀត មករាជរដ្ឋាភិបាល ហើយនិងផ្ដល់យោបល់លើសេចក្តីព្រាងច្បាប់ និងសេចក្តីព្រាងលិខិតបទដ្ឋានគតិយុត្តិផ្សេងទៀត របស់រាជរដ្ឋាភិបាលក្នុងដំណាក់កាលនៃដំណើរការនីតិវិធីធ្វើច្បាប់កំពុងឋិតក្នុងក្របខ័ណ្ឌអំណាចនីតិបញ្ញត្តិ ដែលមានចែងក្នុងមាត្រា១២ និងមាត្រា១៣ នៃព្រះរាជក្រឹត្យនេះ។ ទី៣, តាមដានដំណើរការអនុវត្តច្បាប់ និងគោលនយោបាយរបស់រាជរដ្ឋាភិបាលទាំងនៅថ្នាក់ជាតិ ទាំងនៅថ្នាក់ក្រោមជាតិ និងផ្ដល់អនុសាសន៍កែលម្អភាពអសកម្ម និងភាពមិនប្រក្រតី ដែលមានចែងក្នុងមាត្រា១៥ និងមាត្រា១៦ នៃព្រះរាជក្រឹត្យនេះ។
សូមបញ្ជាក់ថា ប្រមុខនៃរាជរដ្ឋាភិបាលកម្ពុជាសម្ដេចតេជោ ហ៊ុន សែន បានសម្រេចបង្កើត ឧត្តមក្រុមប្រឹក្សាពិគ្រោះ និងផ្ដល់យោបល់នេះ កាលពីថ្ងៃទី២១ ខែសីហា ឆ្នាំ២០១៨ ដើម្បីផ្តល់ឱកាសដល់គណបក្សនយោបាយក្រៅរដ្ឋសភាចូលរួមបម្រើជាតិ ហើយសមាសភាពនៃឧត្តមប្រឹក្សាពិគ្រោះ និងផ្ដល់យោបល់នេះ ត្រូវបានជ្រើសចេញពីគណបក្សនយោបាយចំនួន១៦ ក្នុងចំណោមចំនួន២០ ដែលបានចូលរួមប្រកួតប្រជែងការបោះឆ្នោតជ្រើសតាំងតំណាងរាស្ត្រ នីតិកាលទី៦ ឆ្នាំ២០១៨។
ឧត្តមក្រុមប្រឹក្សាពិគ្រោះ និងផ្ដល់យោបល់ គឺជាយន្ដការថ្មីមួយទៀត ដើម្បីចូលរួមឆ្លើយតបនឹងផ្ដល់ផលប្រយោជន៍ប្រជាពលរដ្ឋទាំងមូល ហើយប្រធានគណបក្សនយោបាយទាំងអស់ ដែលចូលរួមកិច្ចពិគ្រោះយោបល់នោះ ក៏បានប្រកាសគាំទ្រទាំងស្រុងចំពោះគំនិតផ្ដួចផ្តើមនេះផងដែរ ប៉ុន្តែទោះជាយ៉ាងនេះក្តី គណបក្សនយោបាយចំនួន៤ផ្សេងទៀត មិនបានចូលរួមជាមួយឧត្តមក្រុមប្រឹក្សាពិគ្រោះ និងផ្តល់យោបល់នេះនៅឡើយទេ ក្នុងនោះរួមមាន ១, គណបក្សមាតុភូមិយើង ២, គណបក្សប្រជាធិបតេយ្យមូលដ្ឋាន ៣, គណបក្សសម្ព័ន្ធដើម្បីប្រជាធិបតេយ្យ និងទី៤, គណបក្សខ្មែរឈប់ក្រ៕
Source: Kampuchea Thmey Daily
0 Comments