វៀតណាម​កុម្ម៉ង់​ទិញ​អាវុធ​រុស្ស៊ី​ក្នុងតម្លៃ​ជាង​១​ពាន់​លាន​ដុល្លារ

ទីភ្នាក់ងារសារព័ត៌មាន TASS របស់​រុស្ស៊ី​បាន​រាយការណ៍​ថា ប្រទេស​វៀតណាម​បានដាក់​ការ​កុម្ម៉ង់​ទិញ​អាវុធ​និង​សេវា​យោធា​របស់​រុស្ស៊ី​ដែលមាន​តម្លៃ​ជាង​១​ពាន់​លាន​ដុល្លារ​ ខណៈ​ប្រទេស​អាស៊ីអាគ្នេយ៍​មួយ​នេះ​ បាន​បង្កើន​សមត្ថភាព​ការពារ​របស់ខ្លួន។

សារព័ត៌មាន TASS បាន​ដកស្រង់​សម្តី​របស់​ប្រធាន​សេវា​សហព័ន្ធរុស្ស៊ី​សម្រាប់​កិច្ចសហប្រតិបត្តិការ​យោធា - បច្ចេកទេស​លោក Dmitry Shugayev ដែល​បាន​និយាយថា “​យើង​មានការ​កុម្ម៉ង់​ទិញ​ក្នុងតម្លៃ​ច្រើនជាង​១​ពាន់​លាន​ដុល្លារ​”​។​

របាយការណ៍​នេះ​បាន​ធ្វើឡើង​ក្នុងអំឡុងពេល​ដំណើរ​ទស្សនកិច្ច​ទៅកាន់​ប្រទេស​រុស្ស៊ី​ដោយ​អគ្គលេខាធិការ​បក្សកុម្មុយនិស្ត​វៀតណាម​លោក Nguyen Phu Trong​។​

ទោះបីជា​យ៉ាងណាក៏ដោយ វា​មិនបាន​ផ្តល់ព័ត៌មាន​លម្អិត​អំពី​កិច្ចព្រមព្រៀង​នេះ​ទេ​។​
​វៀតណាម​និង​រុស្ស៊ី​មាន​ទំនាក់ទំនង​ជិតស្និទ្ធ​អស់​រយៈពេល​ជាច្រើន​ទសវត្ស​មកហើយ​។​
​រុស្ស៊ី​គឺជា​អ្នកផ្គត់ផ្គង់​គ្រឿង​សព្វាវុធ​ដ៏​ធំ​បំផុត​របស់​វៀតណាម​ហើយ​ក្រុមហ៊ុន​រុស្ស៊ី​ជាច្រើន​បាន​ចូលរួម​នៅក្នុង​គម្រោង​ថាមពល​ជាច្រើន​របស់​វៀតណាម​។​

ប្រទេស​វៀតណាម​ធ្លាប់បាន​ទិញ​នាវាមុជទឹក​វាយប្រហារ Kilo ដ៏​ទំនើប​បំផុត​ចំនួន​ប្រាំមួយ​គ្រឿង​រួមជាមួយ​នាវាចម្បាំង យន្តហោះ​ប្រយុទ្ធ​និង​ឧបករណ៍​យោធា​ដទៃទៀត​ពី​ប្រទេស​រុស្ស៊ី​។​

វៀតណាម​ជា​ប្រទេស​នាំចូល​អាវុធ​សកម្ម​បំផុត​មួយ​របស់​ពិភពលោក​ក្នុង​រយៈពេល​ប៉ុន្មាន​ឆ្នាំ​ថ្មីៗ​នេះ​ចំពេល​មានការ​ទាមទារ​ទឹកដី​កាន់តែខ្លាំង​ឡើង​របស់​ចិន​នៅក្នុង​សមុទ្រ​ចិន​ខាងត្បូង​។​

យោងតាម​រដ្ឋាភិបាល​វៀ​ត​ណា​ម​បាន​ឲ្យ​ដឹងថា ក្រុមហ៊ុន​វៀតណាម​និង​រុស្ស៊ី​បាន​ចុះហត្ថលេខា​លើ​កិច្ចព្រមព្រៀង​សហប្រតិបត្តិការ​ជាច្រើន​ក្នុងអំឡុងពេល​ដំណើរ​ទស្សនកិច្ច​របស់​លោក Trong រួមទាំង​កិច្ចសហប្រតិបត្តិកា​រវិ​ស័​យ​ធនាគារ​ចំនួន​៣​ផងដែរ​៕ REUTERS

​

Source: Kampuchea Thmey Daily