អ្នកប្រដាល់ជើងខ្លាំងវ័យក្មេង ឡៅ ចិត្រា ក្លិបកងពលតូចទ័ពឆ័ត្រយោង៩១១ នឹងត្រូវជួបជាមួយអ្នកប្រដាល់ថៃឈ្មោះនុត ក.កេសានុន (Nuth Kor.Kesanon) នាយប់ថ្ងៃអាទិត្យទី៣០ ខែកញ្ញា ឆ្នាំ២០១៨នេះ នៅលើសង្វៀនខារ៉ាបាវបាយ័នស្ទឹងមានជ័យ។
ពួកគេទាំងពីរនេះ ជួបគ្នាសម្រាប់ការប្រកួតជុំទី២ នៃការប្រកួតជម្រុះដណ្តើមខ្សែក្រវាត់ខារ៉ាបាវរដូវកាលទី៥ ទម្ងន់៦០គីឡូក្រាម។
ឡៅ ចិត្រា ជាអ្នកប្រដាល់វ័យក្មេង ដែលខ្លាំងជាងគេក្នុងចំណោមអ្នកប្រដាល់កម្ពុជាដែលមានវ័យក្មេងនិងទម្ងន់ដូចគ្នានោះ ហើយចិត្រាគេក៏ជាអ្នកប្រដាល់ជើងខ្លាំងម្នាក់ដែរ សម្រាប់ពេលបច្ចុប្បន្ននេះ ។ ចិត្រា ធ្លាប់ប្រកួតជាមួយអ្នកប្រដាល់ថៃច្រើននាក់មកហើយនាពេលកន្លងមក ដែលភាគច្រើនឈ្នះសឹងតែទាំងអស់រាល់ពេលជួបជាមួយថៃនោះ។
និយាយជារួម ចិត្រាទាំងបទពិសោធន៍ ទាំងស្នៀតប្រដាល់ ល្បិចកលនិងកាយសម្បទា សុទ្ធតែល្អនិងខ្លាំង ដែលអាចទុកចិត្តបានថា អាចយកឈ្នះលើអ្នកប្រដាល់ថៃនុត ក.កេសានុន បានមិនខាន ។
នុត ក.កេសានុន អ្នកប្រដាល់ថៃរូបនេះ គេធ្លាប់មកប្រកួតនៅស្រុកខ្មែរប្រមាណ២-៣ ដងហើយ ដោយវាយចាញ់ពីរប្រកួតនិងឈ្នះ១ប្រកួត ហើយដែលមកប្រកួតចុងក្រោយនេះ គេប៉ះជាមួយរិទ្ធ ភូលូ អ្នកប្រដាល់ជើងខ្លាំងស្រករក្រោយរបស់កម្ពុជា ហើយបានវាយឈ្នះភូលូ ដោយពិន្ទុ(០៩កញ្ញា២០១៨)ក្នុងជម្រុះជុំទី១នោះ ។
ដូច្នេះ ក្នុងការប្រកួតលើកនេះ ជាលើកទី៤សម្រាប់អ្នកប្រដាល់ថៃនេះហើយ ដែលការជួបលើកនេះ នុត ក.កេសានុន មិនរំពឹងបានឈ្នះឡៅ ចិត្រានោះឡើយ ។ អ្នកប្រដាល់ថៃរូបនេះ មានកំនត់ត្រាប្រកួតចំនួន៧៨លើក ឈ្នះ៥៤លើក ចាញ់២៣លើកនិងស្មើ០១លើក ។បើធៀបជាមួយឡៅ ចិត្រា គឺប្រហាក់ប្រហែលគ្នា ដោយចិត្រាគេមានកំនត់ត្រាប្រកួតចំនួន៧៥លើក ក្នុងនោះឈ្នះ៧០លើក ចាញ់០៥លើក មិនដែលស្មើ ។
បើតាមពិនិត្យកម្រិតសមត្ថភាពបច្ចេកទេសនិងកាយសម្បទារបស់ពួកគេទាំងពីរនេះ គេមិនរំពឹងថា ឡៅ ចិត្រា ចាញ់ នុត ក.កេសានុន នោះទេ ដោយសារចិត្រា គេមានផ្លែល្អជាង ។ យ៉ាងណា ឡៅ ចិត្រា មិនអាចមើលស្រាលនុត ក.កេសានុន នោះឡើយ ព្រោះថាអ្នកប្រដាល់ថៃរូបនេះ អាចយកឈ្នះរិទ្ធ ភូលូបាននោះ គឺមិនធម្មតាឡើយ ។ឡៅ ចិត្រា កាលពីជុំទី១ គេវាយឈ្នះឃុមភីជិត ប៉ាយ៉ាក់ណុងហ៊ិន(Khumpichit Payaknoronghin) ដោយពិន្ទុ។
ចំណែក អ្នកប្រដាល់ជើងខ្លាំងវ័យក្មេងកម្ពុជារិទ្ធ ភូលូ ក្លិបអាណាចក្រគុនខ្មែរ នឹងត្រូវជួបប្រកួតជាមួយអ្នកប្រដាល់ឡាវ ណាំផេត ឆ.ឆេមពាន្ត (Nampetch Chhor Champaion) សម្រាប់ការប្រកួតជុំទី២ ជម្រុះដណ្តើមខ្សែក្រវាត់ខារ៉ាបាវទម្ងន់ ៦០គីឡូក្រាមដែរ ។ ពួកគេទាំងពីរនាក់នេះ ធ្លាប់ជួបគ្នាម្តងហើយមុនចូលរួមដណ្តើមខ្សែក្រវាត់នេះ ដោយភូលូ វាយចាញ់អ្នកប្រដាល់ឡាវនេះដោយពិន្ទុ ។
ណាំផេត ឆ.ឆេមពាន្ត អ្នកប្រដាល់ឡាវរូបនេះ មានកំនត់ត្រាប្រកួតចំនួន៨០លើក ឈ្នះ៥៨លើក ចាញ់ ២១លើក និងស្មើ០១លើក ។ បើធៀបជាមួយរិទ្ធ ភូលូ គឺច្រើនជាងភូលូ ដោយភូលូ គេមានកំនត់ត្រាប្រកួតចំនួន៥៥លើក ក្នុងនោះឈ្នះ៦៩លើក ចាញ់០៦លើក មិនដែលស្មើ ។ ចាំមើល រវាងរិទ្ធ ភូលូ និង ណាំផេត ឆ.ឆេមពាន្ត តើនរណានឹងយកបាន៣ពិន្ទុនោះ? ។
ចំពោះការប្រកួតរវាងអ្នកប្រដាល់រួមជាតិវិញ ចាន់ វ៉ារិទ្ធ អ្នកប្រដាល់ស្រករក្រោយក្លិបនិរោធមានជ័យ ត្រូវគេផ្តល់ឪកាសអោយជួបសងសឹកជាមួយ ថន វាសនាអ្នកប្រដាល់ជើងចាស់ក្លិបនាគរាជមានជ័យ ដោយប្រកួតក្នុងទម្ងន់៦៣,៥០០គីឡូក្រាម។ ពីរនាក់នេះ ធ្លាប់ជួបគ្នាម្តងហើយកាលពីថ្ងៃទី១៦កញ្ញា២០១៨ ដោយចាន់ វ៉ារិទ្ធ វាយចាញ់ថន វាសនា ក្នុងទឹកទី២។ សម្រាប់ការជួបសងសឹកនេះ ពុំដឹងថាចាន់ វ៉ារិទ្ធ គេសងសឹកថន វាសនា បានសម្រេចឬអត់នោះទេ?៕
Source: Kampuchea Thmey Daily
0 Comments