មន្ទីរបញ្ចកោណបាននិយាយកាលពីថ្ងៃពុធថា យន្តហោះទម្លាក់គ្រាប់បែកអាមេរិក B-52 នាពេលថ្មីៗនេះ បានធ្វើប្រតិបត្តិការឆ្លងកាត់សមុទ្រចិនខាងត្បូងនិងសមុទ្រចិនខាងកើតចំពេលមានភាពតានតឹងកើនឡើងជាមួយទីក្រុងប៉េកាំងអំពីពន្ធគយពាណិជ្ជកម្ម។
អ្នកនាំពាក្យមន្ទីរបញ្ចកោណលោកវរសេនីយ៍ឯក Dave Eastburn បាននិយាយថា កាលពីល្ងាចថ្ងៃអង្គារ យន្តហោះទម្លាក់គ្រាប់បែកធុនធ្ងន់បានចូលរួមនៅក្នុងប្រតិបត្តិការជាទៀងទាត់មួយនៅក្នុងសមុទ្រចិនខាងកើត។
មន្ដ្រីការពារជាតិរូបនេះបាននិយាយថា យន្ដហោះដើរដោយថាមពលនុយក្លេអ៊ែរប្រភេទនេះត្រូវបានអមដោយយន្តហោះចម្បាំងរបស់ជប៉ុនហើយការហោះហើរនេះគឺជាផ្នែកមួយនៃ “វត្តមានយន្តហោះទម្លាក់គ្រាប់បែកជាបន្ត” របស់មន្ទីរបញ្ចកោណនៅក្នុងតំបន់នេះ។
លោក Eastburn បាននិយាយថា កាលពីដើមសប្តាហ៍នេះ យន្តហោះ B-52 បានហោះឆ្លងកាត់ ដែនអាកាសអន្តរជាតិលើសមុទ្រចិនខាងត្បូង។ លោក Eastburn បាននិយាយទៀតថា ការហោះហើរនេះគឺជាផ្នែកមួយនៃ “ប្រតិបត្តិការកំណត់ពេលទៀងទាត់”។
ប្រទេសចិនបានទាមទារផ្លូវទឹកធំៗជាយុទ្ធសាស្ត្រនិងបានបង្កើតកោះជាច្រើនព្រមទាំងអ្វីៗផ្សេងទៀតដែលពាក់ព័ន្ធនឹងសមុទ្រផងដែរហើយប្រែក្លាយវាទៅជាទីតាំងយោធា។
ប្រទេសប្រ៊ុយណេ ម៉ាឡេស៊ី ហ្វីលីពីន តៃវ៉ាន់និងវៀតណាមបានប្រកួតប្រជែងទាមទារតំបន់នេះហើយតុលាការសមុទ្រអន្តរជាតិបានសម្រេចកាលពីឆ្នាំ២០១៦ថា ការអះអាងរបស់ចិនមិនមានមូលដ្ឋានច្បាប់ឡើយ។
សហរដ្ឋអាមេរិកបានបដិសេធនូវការទាមទារទឹកដីរបស់ប្រទេសចិនហើយជាទម្លាប់បាននិយាយថា យោធានឹងបន្តហោះហើរ បើកនាវានិងធ្វើប្រតិបត្តិការនៅគ្រប់ទីកន្លែងដែលច្បាប់អន្តរជាតិអនុញ្ញាតតាមពេលនិងទីកន្លែងដែលពួកគេជ្រើសរើស។
ក្រុងវ៉ាស៊ីនតោននៅសប្តាហ៍នេះបានអនុម័តច្បាប់ពន្ធថ្មីប្រឆាំងនឹងប្រទេសចិនដែលគ្របដណ្ដប់លើការនាំចូលរបស់ខ្លួនក្នុងចំនួនទឹកប្រាក់២០០ពាន់លានដុល្លារ។
ប្រទេសចិនបានប្រតិកម្មយ៉ាងខឹងសម្បាហើយនៅសប្តាហ៍នេះ បានលុបចោលដំណើរទស្សនកិច្ចកំពង់ផែរបស់នាវាចម្បាំងអាមេរិកមួយគ្រឿងទៅកាន់ទីក្រុងហុងកុងហើយបានលុបចោលកិច្ចប្រជុំរវាងប្រមុខកងទ័ពជើងទឹកចិននិងសមភាគីអាមេរិករបស់លោក៕ AFP
Source: Kampuchea Thmey Daily
0 Comments