បន្ទាយមានជ័យ ៖ ព្រឹកថ្ងៃទី១២ ខែកញ្ញា ឆ្នាំ២០១៨នេះ លោកនាយឧត្តមសេនីយ៍ កែ គឹមយ៉ាន សមាជិកអចិន្ត្រៃយ៍គណៈកម្មាធិការកណ្តាល អ្នកតំណាងរាស្ត្រ ប្រធានក្រុមការងារថ្នាក់កណ្ដាលចុះជួយខេត្តបន្ទាយមានជ័យ លោកសួនបវរអភិបាលខេត្តបន្ទាយមានជ័យ និងអ្នកតំណាងរាស្ត្រជាច្រើននាក់ទៀតបានធ្វើពិធីជប់លៀងដល់ប្រជាពលរដ្ឋរស់នៅក្នុងខេត្តបន្ទាយមានជ័យទាំងអស់រាប់ពាន់នាក់ដើម្បីធ្វើការថ្លែងអំណរគុណដល់ពួកគាត់ដែលខិតខំទៅបោះឆ្នោតជូនគណបក្សប្រជាជនកម្ពុជាឈ្នះប្លូកទឹកប្លូកដីបោះឆ្នោតជ្រើសរើសអ្នកតំណាងរាស្ត្រអាណត្តិទី៦ក្នុងនោះខេត្តបន្ទាយមានជ័យបាន ឈ្នះអាសនៈអ្នកតំណាងរាស្ត្រ៦លើ៦អាសនៈ។
លោក សួន បវរ អភិបាលខេត្តបន្ទាយមានជ័យបានប្រាប់អ្នកយកព័ត៌មានឲ្យដឹងថា ការធ្វើពិធីជប់លៀងនេះប្រព្រឹត្តនៅថ្ងៃត្រង់ ថ្ងៃទី១៥ ខែកញ្ញា ឆ្នាំ២០១៨ ខាងមុខនេះ។ ក្នុងនោះលោកសួន បវរ បានធ្វើការថ្លែងអំណរគុណដល់កម្លាំងប្រដាប់អាវុធទាំង៣មាន នគរបាល អាវុធហត្ថ ទាហាន និងគ្រប់មន្ទីរជុំវិញខេត្តដែលបានធ្វើការទប់ស្កាត់សកម្មភាពទាំងឡាយណាដែលមានការប៉ុនប៉ងញុះញង់បំផ្លាញការបោះឆ្នោតតំណាងរាស្ត្រអាណត្តិទី៦នៅ ថ្ងៃទី២៩ ខែកក្កដា ឆ្នាំ២០១៨ ចុះបង្ក្រាបរាល់ការប្រឆាំងបាតុកម្មទប់ស្កាត់បង្ក្រាបសកម្មភាពទាំងឡាយណា ដែលមានការប៉ុនប៉ងញុះញង់បំផ្លាញការបោះឆ្នោត និងចេញប្រតិបត្តិការការពារសន្តិសុខ សណ្តាប់ធ្នាប់ រក្សាសុវត្ថិភាព នាំមកនូវបរិយាកាសល្អ សម្រាប់ថ្ងៃបោះឆ្នោតជ្រើសតាំងសមាជិករដ្ឋសភានីតិកាលទី៦នេះ។
លោកសួន បវរ បានបញ្ជាក់ឲ្យដឹងទៀតថា ប្រជាពលរដ្ឋដែលគាំទ្រគណបក្សប្រជាជនទាំងអស់គ្នាដឹងហើយថា គណបក្សប្រជាជនដឹកនាំដោយសម្តេចតេជោហ៊ុន សែន ដែលមានគោលនយោបាយប្រែក្លាយតំបន់អតីតសង្គ្រាមទាំងអស់ទៅជាទីផ្សារ និងការអភិវឌ្ឍ ហើយសព្វថ្ងៃនេះតំបន់អតីតសមរភូមិសង្គ្រាមជាច្រើនបាននឹងកំពុងក្លាយជាតំបន់អភិវឌ្ឍន៍ និងយុទ្ធសាស្ត្រកាត់បន្ថយភាពក្រីក្របានកសាងផ្លូវថ្នល់ មន្ទីរពេទ្យ ពិសេសការដាក់ពង្រាយសាលារៀន រោងចក្រ ដល់មូលដ្ឋានដើម្បីបណ្តុះបណ្តាលធនធានមនុស្ស និងផ្តល់ឱកាសការងារជូនក្មួយៗបងប្អូនឲ្យបានកាន់តែច្រើន កាន់តែជិត និងកាន់តែងាយស្រួលបន្ថែមទៀត។
ជាមួយគ្នានេះ លោកសួនបវរ បានថ្លែងអំណរគុណនិងដឹងគុណដល់សមាជិក សមាជិកាទាំងអស់នៃមហាគ្រួសារអ្នកបន្ទាយមានជ័យដែលបានបោះឆ្នោតគាំទ្រគណបក្សប្រជាជនកម្ពុជាដែលដឹកនាំដោយសម្តេចតេជោហ៊ុន សែន គ្រប់ៗអាណត្តិកន្លងមក ដើម្បីសម្តេចតេជោហ៊ុន សែន បន្តមិនយកពន្ធលើដីស្រែ និងការលក់ដូរកញ្ច្រែងកញ្ជើល្អីថែមទៀតសំអាងថា គណបក្សប្រជាជនកម្ពុជាមានស្នាដៃជាច្រើន ក្នុងការកសាងជាតិរយៈពេលជាង៣០ឆ្នាំកន្លងមករួមមានប្រទេសជាតិដោយរក្សាបាននូវស្ថិរភាព សុខសន្តិភាព ជំរុញការអភិវឌ្ឍឥតឈប់ឈរលើគ្រប់វិស័យ ជាពិសេសបានធ្វើឲ្យជីវភាពរស់នៅ របស់ប្រជាពលរដ្ឋកាន់តែមានការផ្លាស់ប្តូររីកចម្រើនធូរធារជាលំដាប់ផងដែរ៕
Source: Kampuchea Thmey Daily
0 Comments