ភ្នំពេញ ៖ ក្រុមការងារបច្ចេកទេសត្រីភាគីដែលមានតំណាងភាគីថៅកែរោងចក្រចំនួន១៦រូប ភាគីសហជីព១៦រូបនិងភាគីរាជរដ្ឋាភិបាល១៦រូប នឹងធ្វើការជួបប្រជុំគ្នានៅថ្ងៃទី១០ ខែកញ្ញា ឆ្នាំ២០១៨នេះនៅទីស្តីការក្រសួងការងារដើម្បីចាប់ផ្ដើមការចរចាប្រាក់ឈ្នួលគោលកម្មករក្នុងផ្នែកវាយនភណ្ឌ កាត់ដេរ និងផលិតស្បែកជើងសម្រាប់ឆ្នាំ ឆ្នាំ២០១៩។
ការជួបប្រជុំជាលក្ខណៈត្រីភាគីនេះធ្វើឡើងតាមរយៈកិច្ចប្រជុំរបស់គណៈកម្មការប្រឹក្សាការងារដែលបានបើកកិច្ចប្រជុំរបស់ខ្លួនកាលពីថ្ងៃទី៣ខែកញ្ញាឆ្នាំ២០១៨កន្លងទៅនេះ ដោយបានសម្រេចបន្តប្រើប្រាស់យន្តការក្រុមការងារបច្ចេកទេសត្រីភាគីដែលមានសមាភាពចំនួន១៦រូបមកពីភាគីនីមួយៗដើម្បីធ្វើការពិភាក្សាប្រាក់ឈ្នួលអប្បបរមានេះ។
ជាមួយគ្នានេះដែរការចរចាប្រាក់ឈ្នួលនេះក៏នឹងបន្តការប្រើប្រាស់លក្ខណៈវិនិច្ឆ័យបែបសង្គមនិងសេដ្ឋកិច្ច ដែលក្នុងនោះរួមមាន ស្ថានភាពគ្រួសារ អត្រាអតិផរណា ការចំណាយក្នុងការរស់នៅ ផលិតភាព ភាពប្រកួតប្រ ជែង របស់ប្រទេស ស្ថានភាពទីផ្សារការងារ និងកម្រិតចំណេញរបស់វិស័យក៏ដូចជាបន្ទាត់ភាពក្រីក្រ សម្រាប់ធ្វើជាមូលដ្ឋានក្នុងការពិភាក្សាប្រាក់ឈ្នួលព្រមទាំងលើកអនុសាសន៍ដល់គណៈកម្មការប្រឹក្សាការងារដើម្បីពិនិត្យសម្រេច។
លោក អាត់ ធន ប្រធានសហភាពការងារកម្ពុជាបានឲ្យដឹងថា ដំណើរការចរចាប្រាក់ឈ្នួលសម្រាប់ឆ្នាំ២០១៩ខាងមុខនេះ នឹងប្រព្រឹត្តិទៅដោយធម្មតាដោយសារភាគីនីមួយៗមានភាពចាស់ទុំក្នុងការចចារពិសេសរាជរដ្ឋាភិបាលមានឆន្ទៈខ្ពស់ក្នុងការដំឡើងប្រាក់ឈ្នួលដល់កម្មករ។
លោក អាត់ ធន់បានបន្តថា ការចរចាដំឡើងប្រាក់ឈ្នួ លថ្មីនេះនឹងជួយលើកស្ទួយដល់ជីវភាពរស់នៅរបស់កម្មករនិយោជិតកាន់តែប្រសើរឡើងថែមទៀត ខណៈបច្ចុប្បន្ននេះប្រាក់ឈ្នួលអប្បបរមារបស់កម្មករលើវិស័យនេះទទួលបានចំនួន១៧០ដុល្លារអាមេរិក។
លោកបានបន្តទៀតថា ដើម្បីចូលរួមលើកកម្ពស់ជីវភាពរស់នៅរបស់កម្មករកាន់តែប្រសើរថែមទៀតនោះ សម្ព័ន្ធសហជីពប្រជាធិបតេយ្យកម្មករកាត់ដេរកម្ពុជានឹងដាក់តួលេខចំនួនជាង២០០ដុល្លារអាមេរិកសម្រាប់ការចរចាប្រាក់ឈ្នួលថ្មីនេះតែការសម្រេចយ៉ាងណាៗនោះគឺអាស្រ័យទៅលើការចរចាជាក់ស្តែងប៉ុណ្ណោះ។
លោកបានបន្តថា ការកំណត់តួលេខនៃប្រាក់ឈ្នួលគោលកម្មករនេះគឺផ្អែកលើលក្ខណៈវិនិច្ឆ័យសង្គមនិងសេដ្ឋកិច្ចពិសេសសហជីពបានប្រើប្រាស់លទ្ធផលស្រាវជ្រាវចំនួន៤ខុសៗគ្នា ទៅលើលក្ខណៈវិនិច្ឆ័យទាំង៧។
លោកបានបន្តទៀតថា ម្យ៉ាងទៀតការដាក់តួលេខនេះដោយសារតែការចរចាប្រាក់ឈ្នួលនៅឆ្នាំនេះមានបរិយាកាសល្អដោយភាគីនីមួយៗមានភាពចាស់ទុំក្នុងការចចារ។ តែយ៉ាងណាក៏ដោយលោកអាត់ធន់បានបញ្ជាក់ថា ការសម្រេចយ៉ាងណាៗនោះគឺវាអាស្រ័យទៅលើការចរចាជាលក្ខណៈត្រីភាគីប៉ុណ្ណោះ។
លោក កាំង ម៉ូនីកា អគ្គលេខាធិការរងនៃសមាគមរោងចក្រកាត់ដេរកម្ពុជាបានបង្ហាញនូវជំនឿថាការចរចាប្រាក់ឈ្នួលនេះ នឹងប្រព្រឹត្តិធម្មតាដូចបណ្តាឆ្នាំមុនៗដែរ ដោយសារតែការចរចានេះគឺផ្អែកទៅលើរូបមន្តដែលធ្លាប់បានប្រើចាប់តាំងពីឆ្នាំ២០១៥កន្លងទៅនេះ។
លោកបានបន្តថាសមាគមនឹងត្រៀមដាក់សំណើ និងសំណូមពរមួយចំនួនទៅរាជរដ្ឋាភិបាលបន្ទាប់ពីកិច្ចប្រជុំត្រីភាគីរួច។
លោកបណ្ឌិត អ៊ិត សំហេង រដ្ឋមន្ត្រីក្រសួងការងារនិងបណ្តុះបណ្តាលវិជ្ជាជីវៈនិងជាប្រធានគណៈកម្មការប្រឹក្សាការងារសង្ឃឹមថាឆ្នាំនេះការជែកពិភាក្សាប្រាក់ឈ្នួលនឹងប្រព្រឹត្តិទៅដោយរលូនក្នុងស្មារតីយោគយល់គ្នា និងឈ្នះៗទាំងអស់គ្នា ហើយយើងនៅតែប្រកាន់យកយុទ្ធសាស្ត្រពិភាក្សាៗរហូតដល់យើងអាចរកបាននូវការភាពស្រុះស្រួលគ្នាមួយឬមួយអាចទៅរកតួលេខមួយដែលអាចខិតខជិតរកគ្នានិងមានចំនួនតិចបំផុតដើម្បីយកមកអនុវត្តចុងក្រោយ។
លោករដ្ឋមន្ត្រីបានឲ្យដឹងទៀតថា «ចំពោះលទ្ធផលនៃប្រាក់ឈ្នួលអប្បបរមាសម្រាប់ឆ្នាំ២០១៩ នឹងចេញនៅមុនពេលពិធីបុណ្យភ្ជុំបិណ្ឌខាងមុខនេះហើយក្មួយៗកម្មករកម្មការិនី នឹងទទួលបានដំណឹងល្អមុនពិធីបុណ្យភ្ជុំបិណ្ឌហើយសង្ឃឹមថាប្រាក់ឈ្នួលនឹងប្រសើរជាងឆ្នាំ២០១៨ទៅទៀត»។
ចំណែកលោក ឧកញ៉ា ណាង សុធី អនុប្រធាគណៈកម្មការប្រឹក្សាការងារនិងតំណាងឲ្យភាគីនិយោជកក៏មានក្តីសង្ឃឹមថា ប្រាក់ឈ្នួលអប្បបរមាសម្រាប់ឆ្នាំ២០១៩នេះភាគីនីមួយៗនឹងរកឃើញតួលេខមួយយ៉ាងល្អដែលគ្រប់ភាគីទាំងអស់អាចទទួលយកបានទាំងថៅកែរោងចក្រក៏ដូចជាកម្មករនិយោជិត ។
លោកឧកញ៉ាបានបន្តថាភាគីថៅកែរោងចក្រនឹងអនុវត្តទៅតាមការសម្រេចរបស់រាជរដ្ឋាភិបាលក្នុងការកំណត់ប្រាក់ឈ្នួលអប្បបរមាផ្នែកវាយនភណ្ឌ កាត់ដេរនិងផលិតស្បែកជើងសម្រាប់ឆ្នាំ២០១៩ខាងមុខនេះទាំងស្រុង។
សូមរំលឹកថា ប្រាក់ឈ្នួលអប្បបរមាផ្នែកវាយនភណ្ឌ កាត់ដេរនិងផលិតស្បែកជើងសម្រាប់សម្រាប់ឆ្នាំ២០១៨នេះ មានចំនួន១៧០ដុល្លារអាមេរិកនេះ នៅមិនទាន់គិតប្រាក់អត្ថប្រយោជន៍ផ្សេងៗទៀតឡើយ៕
Source: Kampuchea Thmey Daily
0 Comments