ភ្នំពេញ ៖ លោកឃួង ស្រេង អភិបាលនៃគណៈអភិបាលរាជធានីភ្នំពេញ និងជាប្រធានក្រុមការងារគណបក្សប្រជាជនកម្ពុជារាជធានីភ្នំពេញ ចុះជួយខណ្ឌព្រែកព្នៅ បានសំដែងការសោកស្តាយ និងសុំការយោគយល់ពីបងប្អូនប្រជាពលរដ្ឋ ដែលរងគ្រោះដោយសារជំនន់ទឹកភ្លៀងក្នុងរយៈពេលប៉ុន្មានថ្ងៃមកនេះ ដែលក្នុងភូមិសាស្ត្ររាជធានីភ្នំពេញទទួលរងបរិមាណទឹកភ្លៀងរហូតដល់៩៣,៦៤មិល្លីម៉ែត្រ ដែលជាបរិមាណ១ដ៏សំបើម នៅពេលរាជធានីភ្នំពេញអាចធានាបានតែប្រមាណ៤០៤មីលីម៉ែត្រតែប៉ុណ្ណោះ។
ការសូមយោគយល់ពីបងប្អូនប្រជាពលរដ្ឋបែបនេះរបស់លោកឃួង ស្រេង បានធ្វើឡើងក្នុងឱកាសជួបសំណេះសំណាល និងនាំយកអំណោយ១ចំនួនរបស់ សម្តេចអគ្គមហាសេនាបតីតេជោហ៊ុនសែន នាយករដ្ឋមន្ត្រីនៃព្រះរាជាណាចក្រ កម្ពុជា និងសម្តេចកិត្តិព្រឹទ្ធបណ្ឌិតប៊ុនរ៉ានី ហ៊ុនសែន ទៅផ្តល់ជូនប្រជាពលរដ្ឋរងគ្រោះដោយជំនន់ទឹកភ្លៀងចំនួន៧២១គ្រួសារក្នុងសង្កាត់គោករកា ខណ្ឌព្រែកព្នៅកាលពីព្រឹកថ្ងៃទី១៥ ខែកញ្ញា ឆ្នាំ២០១៨នេះ។
លោកឃួង ស្រេង បានបង្ហាញពីការខិតខំយកចិត្តទុកដាក់របស់អាជ្ញាធរសង្កាត់ ខណ្ឌ និងរាជធានីភ្នំពេញក៏ដូចមន្ទីរជំនាញដើម្បីបើកមុខទឹករំដោះជំនន់ទឹកភ្លៀងនេះ ចេញពីភូមិដ្ឋានរបស់ប្រជាពលរដ្ឋ។ ប៉ុន្តែការងារនេះនៅតែមិនទាន់បានឆ្លើយតបបានទាន់ពេលវេលានៅឡើយដោយសារតែ ទឹកហូរធ្លាក់មកពីប៉ែកខាងកំពង់ស្ពឺយ៉ាងគំហុកចាក់មកភូមិសាស្ត្ររាជធានីភ្នំពេញ។ តែទោះបីយ៉ាងណា អាជ្ញាធរមិនបានព្រងើយកន្តើយក្នុងការចាត់វិធានការ ដោះស្រាយសម្រាប់ប្រជាពលរដ្ឋយើងឡើយ ជាពិសេសការគិតគូខ្ពស់ពីសម្តេចអគ្គមហាសេនាបតីតេជោហ៊ុនសែន និងសម្តេចកិត្តិព្រឹទ្ធបណ្ឌិត ចំពោះសុខទុក្ខ ប្រជាពលរដ្ឋដែលរងគ្រោះនៅគ្រប់ទីកន្លែង។
លោកសុខ សម្បត្តិ អភិ បាលខណ្ឌព្រែកព្នៅ បានឲ្យដឹងដែរថា ពេលនេះក្នុងខណ្ឌព្រែកព្នៅ មានសង្កាត់ចំនួន២ដែលរងគ្រោះដោយជំនន់ទឹកភ្លៀងគឺសង្កាត់សំរោង មាន២៨គ្រួសារ,សង្កាត់គោករកា ដែលិចខ្លាំងមានរហូតដល់៧២១គ្រួសារក្នុងនោះក៏មានភូមិ អណ្តូង៤ និងអណ្តូង៦ផងដែរ។
ចំពោះអំណោយដែលត្រូវផ្តល់ជូនប្រជាពលរដ្ឋ រងគ្រោះទាំង៧២១គ្រួសារក្នុង១គ្រួសារទទួលបានអង្ករ២៥គីឡូក្រាម,មី១កេស ,ទឹកសុទ្ធ១កេស,ទឹកត្រី៦ដប និងថវិកា៥ម៉ឺនរៀល៕
Source: Kampuchea Thmey Daily
0 Comments