សៀមរាប ៖ អ្នកនាំពាក្យសាលា ខេត្តសៀមរាប បានលើកឡើងថា ពលរដ្ឋដែលប្រមូលគ្នាបង្កើតឆាកសម្តែង លក្ខណៈតវ៉ារឿងដីធ្លី គឺសុទ្ធសឹងជាអ្នកកាន់កាប់ដីដោយគ្មានលិខិតស្នាមច្បាស់លាស់។
លោកលី សំរិទ្ធ អភិបាលរងខេត្ត និងជាអ្នកនាំ ពាក្យសាលាខេត្តសៀមរាប លើកឡើងបែបនេះថា ពលរដ្ឋមួយក្រុម ដែលមានដីស្ថិតក្នុងភូមិអញ្ចាញ សង្កាត់នគរធំ ក្រុងសៀមរាប ត្រង់ចំណុចក្រោយបន្ទាយអាវុធហត្ថក្រុងសៀមរាប បានប្រមូលគ្នាតវ៉ា និងមាន ការឡាយវីដេអូ បង្ហោះតាមហ្វេសប៊ុក កាលពីព្រឹកថ្ងៃទី១២ខែកញ្ញាឆ្នាំ២០១៨។
លោកលី សំរិទ្ធ បានបញ្ជាក់ថា ជាការពិតណាស់ពលរដ្ឋគ្រប់រូប ប្រសិនបើមានបញ្ហាណាមួយដែលមិនអាចដោះស្រាយ គឺត្រូវតែមក រកអាជ្ញាធរ ដែលជាអ្នករកដំណោះស្រាយ ឬអាចនិយាយបានថា ជាម៉ែ,ឪ។ មិនមែនសុខៗប្រ មូលផ្តុំបង្កើតឆាកសម្តែង ចោទអាជ្ញាធរមិនដោះស្រាយឲ្យចឹងទេ.!។ សួរថា តើដោះស្រាយអី រឿងអី? បើគ្មាននរណាដឹងរឿងអីផង ហើយសុខ ៗនាំគ្នាបង្កើតឆាកសម្តែងរបៀបចឹងទៅវិញ។
លោកបញ្ជាក់ទៀតថា តាមពិតពលរដ្ឋនៅម្តុំកន្លែងកើតហេតុ គណៈកម្មការចម្រុះ បានរៀបចំវាស់វែងក្បាលដីចែកជូនពួកគាត់អស់ហើយ ចំពោះពលរដ្ឋដែលមានលិខិតស្នាមកាន់កាប់ដីពិតប្រាកដ។ ប៉ុន្តែ ក៏មានពលរដ្ឋមួយចំនួនតូច មិនមានលិខិតស្នាមកាន់កាប់ត្រឹមត្រូវ ដោយអ្នកខ្លះមកពីខេត្តផ្សេងៗ មកអះអាងថា ជាដីរបស់ខ្លួន ទាមទារឲ្យអាជ្ញាធរប្រគល់ឲ្យ វាពិតជាមិនអាច។ ចឹងទេចំណុចទាំងអស់នេះ គណកម្មការចម្រុះ ក៏កំពុងពិនិត្យផ្ទៀងផ្ទាត់ ព្រោះឯកសារក៏មានគ្រប់គ្រាន់ដែរ។
សូមបញ្ជាក់ថា កាលពីព្រឹកថ្ងៃទី១២ ខែកញ្ញា ឆ្នាំ២០១៨ ខណៈដែលខេត្តសៀមរាបកំពុងមានភ្លៀងធ្លាក់យ៉ាងខ្លាំងនោះ ក្រុមពលរដ្ឋនៅភូមិឃុំខាងលើប្រមាណជាង១០គ្រួសារ បានប្រមូលផ្តុំ គ្នាធ្វើការតវ៉ាទាមទារឲ្យអាជ្ញាធរ វាស់វែងក្បាលដី ដើម្បីចេញជាប័ណ្ណកម្មសិទ្ធិដល់ពួកខ្លួន។ ប៉ុន្តែការតវ៉ានោះ ពុំមានអាជ្ញាធរ មាន សមត្ថកិច្ចរូបណាចូលរួមដឹងឮ ឬដោះស្រាយអ្វីនោះទេ។ ដែលសូម្បីតែក្រុមអ្នកកាសែត ប្រចាំខេត្តសៀមរាប ក៏ពុំបានដឹងនិងចុះទៅយកព័ត៌មាននោះដែរ។ ផ្ទុយទៅវិញពួកគាត់(ពលរដ្ឋ) ស្រែកតវ៉ាទាមទារ ហើយឡាយបង្ហោះហ្វេសបុកតែប៉ុណ្ណោះ។
ក្នុងការវ៉ានេះដែរ ក៏មានពលរដ្ឋក្នុង ចំណោមនោះ បរិយាយថា ក្នុងចំណោមពលរដ្ឋ៣១គ្រួសារ មានតែ១០គ្រួសារប៉ុណ្ណោះដែលមិនទាន់បានវាស់ក្បាលដី។ គណៈកម្មការចម្រុះដែលរួមមានអាជ្ញាធរអប្សរាផង បានកំណត់អោយមួយគ្រួសារក្បាលដីមួយឡូត៍ស្មើ៨០០ឬលើសតិចតួច និងមានលិខិតកាន់កាប់ត្រឹមត្រូវ។ ចំណែកអ្នកមានក្បាល ដី ២ឬ៣ឡូត៍ ហើយមិនមានលិខិតកាន់កាប់ច្បាស់ លាស់មិនអាចវាស់ជូននោះទេ។ ប្រភពបន្តថា ចឹងទេអ្នក២១គ្រួសារបានលិខិតទទួលបានការវាស់វែងហើយ ឯចំពោះអ្នក១០គ្រួសារនេះមិនទាន់វាស់ក្បាលដី ព្រោះអ្នកខ្លះមាន២ទៅ៣ ឡូត៍ឯលិខិតកាន់កាប់មិនដឹងថា យ៉ាងម៉េចចឹងហើយទើបពួកគាត់ព្យាយាមតវ៉ាជាបន្តបន្ទាប់រហូតហៅតារាហ្វេសប៊ុក មកឡាយបង្ហោះបែបនេះ។
ក្នុងរឿងតវ៉ានេះ លោកឡុង កុសល អ្នកនាំ ពាក្យ អាជ្ញាធរជាតិអប្សរា បានបញ្ជាក់ថា រឿងនឹងមិនពាក់ព័ន្ធជាមួយអប្សរានោះទេ គឺជាដំណាក់កាលរបស់ខេត្តហើយ។ ព្រោះការ សម្រេចវាស់វែងឬយ៉ាងណានោះ ជាសមត្ថកិច្ចរបស់ខេត្ត។
ករណីនេះដែរ អ្នកច្បាប់មួយរូបបានលើក ឡើងថា ថ្វីត្បិតពួកគាត់ពករដ្ឋលើកគ្នាតវ៉ាតែក្រុមគ្នាឯង តែវាជះឥទ្ធិពលមិនល្អ សម្រាប់ខេត្តទេសចរណ៍មួយនេះ។ចឹងទេបងប្អូនពលរដ្ឋគួរនាំគ្នារកដំណោះស្រាយណាមួយ ដោយធ្វើការរចារជាមួយអាជ្ញាធរជាការល្អជាង៕
Source: Kampuchea Thmey Daily
0 Comments